ބްރެޒިލްގެ ޕާރާގައި ހިނގި ގޭންގް މާރާމާރިއެއްގައި 52 މީހުން މަރުވެއްޖެ
30 ޖުލައި 2019 | އަންގާރަ 03:19މަރުވެފައިވާ މީހުންގެ 16 މީހުން މަރާލެވިފާ ވަނީ އެމީހުންގެ ކަރު ބުރިކޮށްލައިގެން
މި ހަމަނުޖެހުން ވަނީ ފަސް ގަޑި އިރަށް ދެމިގެން ގޮސްފައެވެ.
ބްރެޒިލްގެ ޕާރާގެ ޖަލެއްގައި ދެ ގޭންގެއްގެ ދެމެދުގައި ފަސް ގަނޑި އިރަށް ހިނގި މާރާމާރިއެއްގައި 52 މީހުން މަރުވެފައި ވާކަމަށް އެ ގައުމުގެ ކަމާބެހޭ އިދާރާތަކުން ބުނެފިއެވެ.
އަލްޓަމީރާ ޖަލުގެ އެއް ބްލޮކްގައި ތިބި "ކޮމާންޑޯ ކްލާސް އޭ" ގޭންގްގެ މީހުންވަނީ ޖަލުގެ އެހެން ބްލޮކަކަށް ގޮސް އެ ބްލޮކުގައި ތިބި "ކޮމާންޑީ ވާމެލޯ" ގެ މީހުންނާއެކު އެ ގައުމުގެ ގަޑިން ހެދުނު ހަތެއް ޖެހި އިރު ހަމަނުޖެހުން ފަށާފައެވެ. ހަމަނުޖެހުން ހަމަޔަކަށް އެޅިފައިވަނީ މެންދުރުގެ ވަގުތެއްގައި ކަމަށް އޮފިޝަލުން މައުލޫމާތު ދެއެވެ.
މަރުވެފައިވާ މީހުންގެ 16 މީހުން މަރާލެވިފާ ވަނީ އެމީހުންގެ ކަރު ބުރިކޮށްލައިގެންނެވެ. ބާކީ ތިބި މީހުން މަރުވެފައިވަނީ ޖަލުގައި ރޯކޮށްލުމުގެ ސަބަބުން ދުމުގެ އަސަރު ކޮށްގެންނެވެ.
ކޮމާންޑޯ ކްލާސް އޭ ގެ މީހުން ރޯކޮށްލި އަލިފާންގަނޑު ފެތުރި އޭގެ އަސަރު ވަނީ ޖަލުގައި ތިބި އެހެން ކުއްވެރީންނަށް ވެސް ކޮށްފައެވެ. މި ހަމަނުޖެހުމުގައި އިސްކޮށް ހަރަކާތްތެރިވި ގޭންގް ލީޑަރުން ހޯދާ އެމީހުން ފެޑަރަލް ޖަލުތަކަށް ބަދަލުކުރާނެ ކަމަށް ބްރެޒިލްގެ އޮފިޝަލުން ވަނީ ބުނެފައެވެ.
ހަމަނުޖެހުން ފެށުމުގެ ގޮތުން ރަހީނު ކުރި ޖަލުގެ ދެ އޮފިޝަލުން ވަނީ ދޫކޮށްލާފައެވެ.
މި އަހަރުގެ މޭ މަހު ބްރެޒިލްގެ ހަތަރު ޖަލެއްގައި އެއްދުވަހެއްގެ އެއް ގަޑިއެއްގައި ހިންގި ގޭންގް މާރާމާރި ތަކެއްގައި ވަނީ 40 މީހުން މަރުވެފައެވެ. ގޭންގް މާރާމާރި ތަކަކީ ބްރެޒިލްގައި އާންމު ކަމެކެވެ.
