ޖަރުމަނުގެ ފްރޭންކްފަރޓް ރެއިލްވޭ ސްޓޭޝަންގައި ރޭލެއްގެ ކުރިމައްޗަށް ކޮށްޕާލި އަށް އަހަރުގެ ކުއްޖެއް މަރުވެ އޭނާގެ މަންމަ އަށް އެކި ވަރުގެ އަނިޔާ ވެއްޖެއެވެ.
މަންޒަރު ދުށް މީހުން ބުނާގޮތުގައި އެމީހާ ކުޑަ ކުއްޖާއާ އޭނާގެ މަންމަ ކޮށްޕާލުމަށް ފަހު ފިލަން ދުއްވައި ގަތެވެ. ގަސްތުގާ އެ ދެ މީހުން ކޮށްޕާލުމަށް ފަހު އޭނާ ފިލަން އުޅުމުން އެވަގުތު ސްޓޭޝަންގައި ތިބި މީހުންވަނީ އޭނާ ހުއްޓުވާފައެވެ.
އެފްރިކާގެ އެރިޓްރީއަށް ނިސްބަތްވާ މި ފިރިހެން މީހާ މިހާރުވަނީ ޖަރުމަނު ފުލުހުންގެ ބެލުމުގެ ދަށުގައެވެ. ޖަރުމަނު ފުލުހުން ބުނީ 40 އަހަރުގެ މި މީހާ ވަނީ ތިންވަނަ މީހަކު ވެސް ރޭލުގެ ކުރިމައްޗަށް ކޮށްޕާލަން މަސައްކަތް ކޮށްފައި ކަމަށެވެ. އަދި މީނާގެ މައްޗަށް ގަސްތުގައި މީހަކު މަރާލި ކަމުގެ ތުހުމަތު ކުރެވި ތަހުގީގު ފަށާފައިވާ ކަމަށް ވެސް ފުލުހުންވަނީ ބުނެފައެވެ.
ހަބަރު ލިބުމާއެކު ޖަރުމަނުގެ އިންޓީރިއަރ މިނިސްޓަރ ހޯސްޓް ސީހޮފަރ ވަނީ އެ މަނިކުފާނުގެ ޗުއްޓީ ދަތުރުފުޅު ކުރުކޮށްލުމަށް ފަހު އެބުރި ވަޑައިގެން ސަލާމަތީ ކަންކަމާ ހަވާލުވެ ތިބި އިސްބޭފުޅުންނާ ބައްދަލުކުރައްވާނެ ކަމަށް ވިދާޅުވެފައެވެ.
މި ހާދިސާގައި އަނިޔާވި މަންމަ ވަނީ ހޮސްޕިޓަލަށް ގެންގޮސްފައެވެ. އެހެންނަމަވެސް އޭނާ އަށް ލިބިފައިވާ އަނިޔާ ތަކަކީ ކިހާ ވަރެއްގެ އަނިޔާތަކެއް ކަމަށް ބުނަން ނޭނގޭ ކަމަށް ކަމާ ބެހޭ އިދާރާތަކުން ބުނެއެވެ.
ފްރޭންކްފަރޓް ރެއިލްވޭ ސްޓޭޝަންގައި ހިނގި މި ހާދިސާ ހިނގާފައި މިވަނީ ޖަރުމަނުގެ ވޯރޑްގެ ރެއިލްވޭ ސްޓޭޝަންގައި ފިރިހެނަކު 34 އަހަރުގެ އަންހެނަކު ގަސްތުގާ ރޭލެއްގެ ކުރިމައްޗަށް ކޮށްޕާލާ މަރާލާފާ ވާތާ ދިހަ ދުވަސް ފަހުންނެވެ.
