މަސްވެރިކަންކުރާ ސަރަހައްދުތަކެއް ފާހަގަކޮށް "އޮފް ޝޯ ޕްލެޓްފޯމެއް" ގާއިމު ކުރުމުގެ ގަރާރު ބަލައިގެންފި
29 ޖުލައި 2019 | ހޯމަ 08:40ގަރާރު މަޖިލީހަށް ހުށަހެޅުއްވީ މާފަންނު މެދު ދާއިރާގެ މެމްބަރު އިބްރާހިމް ރަޝީދު
ރައްޔިތުންގެ މަޖިލީހުގެ ޗެމްބަރުގައި މެމްބަރުން
މަސްވެރިކަން ކުރާ ސަރަހައްދުތަކެއް ފާހަގަކޮށް "އޮފް ޝޯ ޕްލެޓްފޯމެއް" ގާއިމު ކުރުމަށް މަޖިލީހަށް ހުށަހެޅި ގަރާރު ފާސްކޮށްފިއެވެ.
މި ގަރާރަށް 71 މެމްބަރުން ވަނީ ތާއީދު ކުރައްވާފައެވެ.
ގަރާރު އިތުރަށް ދިރާސާ ކުރުމަށް އިގްތިސާދީ ކޮމިޓީއަށް ވަނީ ފޮނުވާފައެވެ.
މި ގަރާރު މަޖިލީހަށް ހުށަހެޅުއްވީ މާފަންނު މެދު ދާއިރާގެ މެމްބަރު އިބްރާހިމް ރަޝީދުއެވެ. މި ގަރާރަކީ މަސްވެރިކަމާއި ބެހޭ ބިލަށް ގެންނަން ޖެހޭ ބަދަލުތަކުގެ މައިގަނޑުތަކާއި ގުޅޭ އިތުރު ބަހުސްތަކެއް ކުރިއަށް ގެންދިއުމުގެ ގޮތުން ހުށަހެޅުނު ގަރާރެކެވެ.
މަސްވެރިކަމުގެ ސިނާއަތަކީ ދިވެހިރާއްޖޭގެ އިގްތިސާދީ މުހިއްމު ސިނާއަތެއް ކަމަށާއި، ގިނަ އަދަދެއްގެ ދިވެހިން އެ މަސައްކަތުގައި ހަރަކާތްތެރިވާ ސިނާއަތަކަށްވާއިރު، ދިވެހިރާއްޖޭގެ މަސްވެރިކަމުގެ ސިނާއަތު ފުޅާކޮށް އެ މަސައްކަތުގެ ސީދާ ނަފާ ވީހާވެސް ފުޅާ ދާއިރާއެއްގައި ދިވެހިންނަށް ހޯދައިދިނުމަކީ މި ގަރާރުގެ މަގްސަދުކަމުގައި ވަނީ ބުނެފައެވެ.
މަސްވެރިން ބާނާ މަހަށް ހަމަ އަގު ހޯދާދިނުމަށްޓަކައި ބޭރުކަނޑުގައި މަސްވެރިކަން ކުރާ މަސްވެރިން ބާނާ މަސްވިއްކުމުގައި ފަސޭހަ އިންތިޒާމުތަކެއް ހަމަޖެއްސުމަކީ މުހިއްމު ކަމަކަށްވީ ހިނދު، ރާއްޖޭގެ ރައްތަކާއި ދުރަށް ދުއްވައިގެން އާއްމުކޮށް މަސްވެރިކަން ކުރެވޭ ސަރަހައްދުތަކެއް ފާހަގަކޮށް އޮފްޝޯ ޕްލެޓްފޯމްތަކެއް ގާއިމް ކުރުމަށް ގަރާރުގައި ވަނީ ބުނެފައެވެ.
ގަރާރުގައި ހިމަނާފައިވާ ކަންތައްތައް ކުރުމަށް ކަމާއި ބެހޭ ވުޒާރާތަކަށާއި، ރައީސުލްޖުމްހޫރިއްޔާއަށް އިލްތިމާސް ކުރުމަށް ރައްޔިތުންގެ މަޖިލީހުން އިގްރާރްވާ ކަމަށް ގަރާރުގައި ވަނީ ބުނެފައެވެ
