އިންތިޚާބުގެ ނަތީޖާ އަދިވެސް ގަބޫލު ނުކުރައްވާކަމަށް ރައީސް ޔާމީން ވިދާޅުވުން އީސީ ޝަރީފަށްވީ ކުރުވާހަކަ އަކަށް
28 ޖުލައި 2019 | އާދީއްތަ 09:38އެއީ ކުރު ވާހަކަ މުބާރާތުގައި ބައިވެރި ކުރަން ރަނގަޅު ވާހަކައެއް ކަމަށް ވިދާޅުވި
ކުރީގެ ރައީސް އަބްދުﷲ ޔާމީން
ނިމިދިޔަ ރިޔާސީ އިންތިޚާބުގެ ނަތީޖާ އަދިވެސް ގަބޫލު ނުކުރައްވާ ކަމަށް ކުރީގެ ރައީސް އަބްދުﷲ ޔާމީން ވިދާޅުވުމުން އެއީ ކުރު ވާހަކަ މުބާރާތުގައި ބައިވެރި ކުރަން ރަނގަޅު ވާހަކައެއް ކަމަށް އިލެކްޝަންސް ކަމިޝަންގެ ރައީސް އަހުމަދު ޝަރީފު ވިދާޅުވެއްޖެއެވެ.
ދަ ޕްރެސްއަށް ދެއްވި އިންޓަވިއުއެއްގައި ރައީސް ޔާމީން ވިދާޅުވީ "ނިމިގެން ދިޔަ ރިޔާސީ އިންތިހާބުގެ ބަލި ގަބޫލުފުޅު ކުރައްވަން ދަތިފުޅު ކަމަށާއި، ކަންކަން ހިނގައި ދިޔަ ގޮތުން ރިޔާސީ އިންތިހާބުގެ ނަތީޖާވެސް ގަބޫލުފުޅު ކުރައްވަން ދަތިފުޅު" ކަމަށެވެ.
ރައީސް ޔާމީން އެގޮތަށް ވިދާޅުވުމުން ޝަރީފު ކުރެއްވި ޓްވީޓުގައި ވިދާޅުވީ ކުރު ވާހަކަ މުބާރާތެއްގައި ބައިވެރި ކުރަން ރަނގަޅު ވާހަކައެއް ކަމަށެވެ. ރިޔާސީ އިންތިޚާބުގެ ނަތީޖާ ރައީސް ޔާމީނު ބޭނުންފުޅުވި ގޮތަށް ބަދަލުނުވުމާއި ގުޅިގެން އިލެކްޝަންސް ކޮމިޝަންގެ މެމްބަރުންގެ މައްޗަށް އިންތިޚާބު އޮޅުވާލި ކަމަށް ބުނެ އެތައް ތުހުމަތުތަކެއް ޕީޕީއެމުން އޭރު ކޮށްފައި ވެއެވެ.
ޝަރީފުގެ އެ ޓްވީޓަށް ކޮމެންޓް ކުރައްވަމުން އީސީގެ މެމްބަރު އަދި ތަރުޖަމާނު ވިދާޅުވީ ސިޔާސީ މަންފާ ހޯދުމަށް އިލެކްޝަންސް ކޮމިޝަން ބަދުނާމުވާ ގޮތަށް ބުހުތާނު ދޮގު ހެދުމީ ހިތާމަވެރި ކަމެއް ކަމަށެވެ.
ޕީޕީއެމް އާއި ޕީއެންސީން އިންތިޒާމު ކޮށްގެން ސަރުކާރާ ދެކޮޅަށް އަޑުއުފުލުމަށް މިމަހުގެ ފަސްވަނަ ދުވަހު ބޭއްވި ޖަލްސާގައި ވާހަކަ ދައްކަވަމުން ފެބްރުއަރީ މަހުގެ 1 ގައި ނެރުނު އަމުރަށް އިޝާރާތް ކުރައްވާ ރައީސް ޔާމީން ވިދާޅުވީ ފެބްރުއަރީ 1 ވަނަ ދުވަހުގެ އަމުރަކީ ހިފި ހަނދުކޭތައެއް ކަމަށެވެ. ހަނދުކޭތައެއް ކަމަށް އިޝާރާތް ކުރައްވާ އެމަނިކުފާނު ވިދާޅުވީ ރިޔާސީ އިންތިޚާބު ނިމުނު އިރު ވެސް އެ ހަނދުކޭތަ ނުފިލާ ކަމަށާއި އިންތިޚާބާއި ބެހޭ ގޮތުން ސުޕްރީމް ކޯޓަށް ހުށައެޅުއްވި ޝަކުވާތަކުގެ ތަހުގީގު ކުރިއަށް ނުދިޔައީ މުއައްސަސާތަކުގައި އެމަނިކުފާނުގެ ބާރު ނެތުމުން ކަމަށެވެ. އަދި އެކަން ތަހުގީގު ނުކޮށް ފުލުހުންގެ އިދާރާއަށް ހުށައެޅި މައްސަލަތަކުގެ ކަރުދާސް ވެސް ނައްތާލި ކަމަށް ވިދާޅުވިއެވެ.
ރިޔާސީ އިންތިޚާބަށް ކިހިނެތްތޯ ވީ. މިދެންނެވި ގޮތަށް ހަނދުކޭތަ ހިފައިގެން ހަނދުކޭތަ ނުފިލައި ދިޔައީ ރިޔާސީ އިންތިޚާބު ނިމުނު އިރު ވެސް. ހުރިހާ މުއައްސަސާ ވެސް ކަތުރުފަނިއަޅާ ހުސްވީ. ގައިމު އިންތިޚާބު ނިމިގެން ދިޔައިރު އެތައް ބަޔަކު މައްސަލަތައް ހުށައަޅަމުން ދިޔަ އަޅުގަނޑުމެންގެ ފަރާތުން މައްސަލަތައް ހުށައަޅަމުން ދިޔަ. އަދި ސުޕްރީމް ކޯޓުން ނެރުނު އަމުރުން އަޅުގަނޑުމެންނަށް ބާރު ލިބިގެންދިޔަ ތަހުގީގު ކުރަން. ފުލުހުންގެ މުއައްސަސާއެއީ އެންމެ އިސް މުއައްސަސާ މިކަހަލަ މައްސަލަތައް ތަހުގީގު ކުރަން އޮންނަ، ތަހުގީގު ފެށިތަނާ ދެން ކިހިނެތްތޯ ވީ. ހުރިހާ ކަރުދާސްތައް ނައްތާލީ ނޫންތޯ.
ނިމިދިޔަ ސެޕްޓެމްބަރު މަހު ބޭއްވި ރިޔާސީ އިންތިޚާބުގެ ނަތީޖާ ރައީސް ޔާމީން ގަބޫލުކުރެއްވުމަށް ފަހު ނަތީޖާ ބާތިލުކުރަން ސުޕްރީމް ކޯޓަށް ހުށަހެޅިއެވެ. އިންތިޚާބު ބާތިލް ކުރަން ސުޕްރީމް ކޯޓަށް ހުށައެޅި މައްސަލަތަކުގައި މައިގަނޑު ގޮތެއްގައި ހެކީގެ ގޮތުގައި ހުށަހަޅާފައި ވަނީ ވޯޓު ކަރުދާހުގައި ކެމިކަލެއް ބޭނުންކޮށްފައި ހުރުމުން ފާހަގަ ފޮހެވިގެން ދާ މައްސަލަ އާއި ފާހަގަ ޖަހާ އަނގޮޓި އާއި ދެލި ފޮހެވިގެންދާ ގަލަމުގެ މައްސަލައެވެ. އެ މައްސަލަތަކަށް ބެލުމަށް ފަހު ސުޕްރީމް ކޯޓުން ކަނޑައެޅީ އިންތިޚާބު ބާތިލް ކުރަން ޖެހޭ ސަބަބެއް ނެތް ކަމަށެވެ.
އިންތިޚާބުގެ ނަތީޖާ އައިގޮތުން އީސީގެ މުއައްޒަފުންނާއި މެމްބަރުންނަށް ވަކި ގޮތަކަށް ވޯޓު ބަދަލު ކުރުމަށް ބިރު ދައްކާފައިވާ ކަމަށް އީސީއިން އޭރު ބުނެފައިވެއެވެ.
ރިޔާސީ އިންތިހާބުގެ ނަތީޖާގައިވާ ގޮތުން ކުރީގެ ރައީސް ޔާމީނަށް ލިބިވަޑައިގަތީ 96،052 ވޯޓެވެ. މިހާރުގެ ރައީސް އިބްރާޙިމް މުހައްމަދު ސޯލިހަށް ލިބިވަޑައިގަތީ 134،705 ވޯޓެވެ.
