ވޭސްޓް މެނޭޖްމަންޓް ކޯޕަރޭޝަން (ވެމްކޯ) އަށް ކުނި އުކާލައިގެން ލިބެންޖެހޭ މިލިއަނެއްހާ ރުފިޔާ ނުލިބިވާ ކަމަށް އެ ކުންފުނިން ބުނެފިއެވެ.
ރާއްޖެއެމްވީއަށް މައުލޫމާތު ދެމުން އެ ކުންފުނީގެ އެމްޑީ އާދަމް މުހައްމަދު (އެޑަމް) ވިދާޅުވީ ނުލިބިވާ ފައިސާގެ ތެރޭގައި ކުނި އުކާލައިގެން ލިބެން ޖެހޭ ފައިސާ (ވޭސްޓް ކަލެކްޝަން ފައިސާ) އާއި ކުނި ޑިސްޕޯސަލް ހިދުމަތުގެ ފައިސާ ހިމެނޭ ކަމަށެވެ.
އެޑަމް ވިދާޅުވީ ލިބެންޖެހޭ ފައިސާގެ އަދަދުތައް މިހާރު ހަފުތާއަކު އެއްފަހަރު މޮނިޓަރ ކުރަމުންދާ ކަމަށެވެ. ތިރީގައި މިވަނީ މިހިނގާ ޖުމައި މަހުގެ 18 ގެ ނިޔަލަށް ވެމްކޯއަށް ކުނިއުކައިގެން ލިބެން ޖެހޭ ފައިސާގެ ތެރެއިން ނުލިބިވާ ޖުމްލަ ފައިސާގެ ތަފްސީލެވެ.
މީގެ އިތުރުން އެޑަމް ވިދާޅުވީ ވޭސްޓް މެނޭޖްމަންޓްގެ ސިޔާސަތު ކަނޑައަޅަނީ އެމްވަޔަރަންމަންޓް މިނިސްޓްރީން ކަމަށާއި، އެސިޔާސަތު ބައްޓަންކޮށް ތަންފީޒުކުރާނީ ވެސް އެމިނިސްޓްރީން ކަމަށެވެ. ވެމްކޯ ހިންގުމަށް މިނިސްޓްރީން އެކަށީގެންވާ އެހީތެރިކަން ނުލިބޭކަމަށް ވެސް އެޑަމް ވިދާޅުވިއެވެ.
އެޑަމް ވިދާޅުވީ ކުނި މެނޭޖް ކުރުމުގައި ވެމްކޯ ހަރަކާތްތެރިވާއިރު އެކުންފުންޏަށް މިހާރު ކުރެވޭ ހަމައެކަނި މަސައްކަތަކީ ކުނި ކަލެކްޓް ކުރުމާއި ކުނި އުކާލުން ކަމަށެވެ. ކުނި މެނޭޖް ކުރުމަށް ބޭނުންވާ އާލާތްތަކާއި މެޝިނަރީ ނެތްކަން އެޑަމް ފާހަގަ ކުރެއްވިއެވެ.
ވެމްކޯ އުފައްދާފައި ވަނީ 2016 ވަނަ އަހަރު ރައީސް އަބްދުﷲ ޔާމީންގެ ވެރިކަމުގައެވެ. އެކުންފުނި އުފެއްދި ފަހުން މިއަދާ ހަމައަށް ވެސް ހިނގަމުން ދަނީ ގެއްލުމުގައި ކަމަށް އެ ކުންފުނީގެ ފައިނޭންޝަލް ހެޑް މުހައްމަދު އިގްބާލް ވަނީ އަންގާރަ ދުވަހު ބޭއްވި މަޖިލީހުގެ ސްޓޭޓް އޯންޑް އެންޓަޕްރައިސިސް ކޮމެޓީގައި ވިދާޅުވެފަ އެވެ.
