ކުރީގެ ރައީސް އަބްދުﷲ ޔާމީންގެ މައްޗަށް ދައުލަތުން އުފުލާފައިވާ މަނީލޯންޑަރ ކުރުމުގެ ދައުވާގެ ޝަރީއަތް އާދީއްތަ ދުވަހުގެ 12:45 ގައި ފެށުމަށް ތާވަލްކޮށްފި އެވެ.

ކުރިން ޝަރީއަތް ފަށާގޮތަށް ތާވަލްކުރީ 11:30 އަށެވެ. ނަމަވެސް ފަހުން ވަނީ 12:45 އަށް ބަދަލުކޮށްފަ އެވެ.

މި ޝަރީއަތް ޓީވީ މެދުވެރިކޮށް ލައިވްކޮށް ބާއްވަން ހަމަޖެހިފައިވާއިރު މިއީ ރާއްޖޭގެ ތާރީޚުގައި ޓީވީ މެދުވެރިކޮށް ލައިވްކޮށްގެން ބާއްވާ މިފަދަ ފުރަތަމަ އަޑުއެހުމެކެވެ. ރައީސް ޔާމީންގެ ޝަރީއަތް ލައިވްކޮށްގެން ބޭއްވުމަށް ހަމަޖެހިފައިވާ ކަމަށް ނިންމައި ކްރިމިނަލް ކޯޓުން ކުރި އިއުލާނެއްގައި ބުނީ އެގޮތަށް ނިންމީ އެމައްސަލައަކީ ދައުލަތުގެ ފައިސާއާއި ގުޅުން ހުރި އަދި އާންމު ރައްޔިތުންގެ ކަންބޮޑުވުން އެމައްސަލައަކާއި މެދު ނުހަނު ބޮޑަށް އޮތް މައްސަލައަކަށްވާތީ ކަމަށެވެ.

ޖިނާއީ އިޖުރާއަތުގެ ގާނޫނުން ޝަރީޢަތުގެ މަޖިލިސް ޢާންމުކޮށް ހުޅުވާލައިގެން ބޭއްވުމަށް ފުރުސަތު ލިބެ އެވެ.

ޔާމީންގެ މައްޗަށް އުފުލާފައިވާ ދައުވާގެ ޝަރީއަތުގައި މީގެ ކުރިން ކުރިއަށް ގޮސްފައިވަނީ އިބްތިދާއީ އަޑުއެހުންތަކެކެވެ. އެ ޝަރީއަތުގެ އަޑުއެހުން ބާއްވާފައިވަނީ މިދިޔަ އެޕްރީލް މަހުގެ 25 ވަނަ ދުވަހުއެވެ.

ޖިނާއީ އިޖުރާއަތުގެ ގާނޫނުގައި ބޮޑެތި ކުށް ކަމަށް ކަނޑައަޅާފައިވާ ކުށްތަކުގެ ތެރޭގައި އެއްލައްކަ ރުފިޔާއިން މަތީގެ މައްސަލަތައް ހިމެނެއެވެ.

އެމްއެމްޕީއާރުސީގެ މައްސަލަ އޭސީސީ އިން ބެލިބެލުމުގައި އެ ފައިސާ ދައުލަތަށް އަނބުރާ ހަވާލުކުރުމަށް އެމަނިކުފާނަށް އެންގުމުން އެ ފައިސާ ދައުލަތާ ހަވާލުނުކޮށް އެއް މިލިއަން ޑޮލަރު ބޭނުންކޮށްގެން ފައިސާ ދައުރުވާ ގޮތަށް މާލީ މަންފާއެއް ލިބޭ ގޮތަށް އެސްކްރޯ އެކައުންޓެއް އޭސީސީ ހިއްސާވާ ގޮތަށް ބޭނުން ކުރައްވާފައި ވެއެވެ.

އެކަމުގައި އޭސީސީގެ ކުރީގެ ރައީސް ހަސަން ލުތުފީގެ އެހީތެރިކަމެއް އޮތް ކަމުގެ ތުހުމަތުތައް ކުރެވޭއިރު އެ ކޮމިޝަނާ އެކު އެއްބަސްވެވަޑައިގެންނެވި ގޮތައް ފައިސާ ޖަމާކުރައްވާފައިވާ ކަމަށް ރައީސް އޮފީހުގެ އޭރުގެ ލީގަލް އެފެއާޒް މިނިސްޓަރު އާޒިމާ ވަނީ ލިޔުމުން އޭސީސީ އަށް އަންގަވައިފައެވެ. ނަމަވެސް އެކަމުގައި އޮޅުވާލުންތަކެއް އުޅޭކަން ފަހުން ފަޅާއެރުމުން އޭސީސީން ފުލުހުން ކިބައިން އެ މައްސަލަ ބަލައިދޭން ހުށައެޅި އެވެ.

އެންމެ ފަހުން ބޭއްވި އިބްތިދާއީ އަޑުއެހުމުގައި ހެކީގެ ގޮތުގައި އޭސީސީއިން ހެދި އެސްކޮރޯ އެކައުންޓް އެއްބަސްވުމާއި، އޭސީސީގެ ތަހުގީގު ރިޕޯޓާއި، އެމްއެމްޕީއާރްސީގެ އޮޑިޓް ރިޕޯޓާއި، ރައީސް ޔާމީން އޭސީސީއަށް ދިން ބަޔާނާއި، މައްސަލާގައި ހިމެނޭ ޓްރާންސްސެކްޝަންތަކުގެ ޗެކްތަކާއި، ސްލިޕްތަކާއި، ބޭންކް ސްޓޭޓްމެންޓްތަކާއި، ޔާމީންގެ މާލީ ބަޔާން ހުށައަޅާފައެވެ.

ކުރީގެ ރައީސް ޔާމީންގެ ޝަރީއަތް ޓީވީ މެދުވެރިކޮށް ލައިވް ކުރަން ހަމަޖެހިފައިވާއިރު ދުނިޔޭގެ އެހެން ގައުމުތަކުގައި ޝަރީއަތްތައް ލައިވް ކޮށްގެން ބާއްވާފައި ވެއެވެ. އެގޮތުން މިދިޔަ އަހަރުގެ ތެރޭގައި ދެކުނު ކޮރެއާގެ ކުރީގެ ރައީސާ ޕާކް ގެއުންގެ މައްޗަށް އުފުލާފައިވާ ކޮރަޕްޝަންގެ ދައުވާގެ ހުކުމް ކުރުން ވެސް ވަނީ ޓީވީ މެދުވެރިކޮށް ލައިވް ކޮށްފައެވެ.ދައުލަތުން ބުނެފައިވަނީ ރައީސް ޔާމީންގެ ނަމުގައި ހުޅުވާފައިވާ އެކްސްކްރޯ އެކައުންޓުން 36 މަސް ދުވަހުގެ މުއްދަތަށް އިންވެސްޓް ކޮށްފައިވާ ކަން ހާމަވާ ކަމަށެވެ.