"ޗިކިންގ" ގެ ރެސްޓްރޯންޓް އަލުން މާލޭގައި ހުޅުވައިފި

ދުބާއީގެ މަޝްހޫރު ފާސްޓްފުޑް ފްރެންޗައިޒް "ޗިކިންގ" ރެސްޓޯރަންޓް އަލުން މާލޭގައި ހުޅުވައިފިއެވެ.

ހ. ސުއެޒްގައި ހަދާފައިވާ ޗިކިންގ ރެސްޓޯރެންޓް ހުޅުވައި ދެއްވީ، ރައްޔިތުންގެ މަޖިލީހުގެ މީދޫ ދާއިރާގެ މެމްބަރު ރޮޒައިނާ އާދަމްއެވެ.

ޗިކިންގގެ އައުޓްލެޓް ރާއްޖޭގައި ހިންގުމުގައި ހަވާލުވެ ހުންނަވަނީ ބްރޫ އެންޑް ފީސްޓް ޕްރައިވެޓް ލިމިޓެޑްގެ ޑައިރެކްޓަރ އަހުމަދު ސައީދުއެވެ. އެގޮތުން ސައީދު ވިދާޅުވެފައިވަނީ، އަލުން ޗިކިންގ މާލެއަށް ގެނައީ މުޅި ދުނިޔޭގައި ވެސް ވަރަށް ބާރަށް ފުޅާވަމުންދާ ހަލާލް ފުޑް ބްރޭންޑަކަށްވުމާއި، ދިވެހިންނަށް ވެސް ވަރަށް ކަމުދާ ރަހައަކަށް ޗިކިންގގެ ރަހަތައް ވެފައިވާތީ ކަމަށެވެ.

ޗިކިންގ އިން 17 އަށް ވުރެ ގިނަ ގައުމުގައި 150 އަށް ވުރެ ގިނަ އައުޓްލެޓް ހުރެއެވެ. ކޮންމެ ގައުމެއްގައި ވެސް ޗިކިންގް ގެ އައުޓްލެޓުން ވިއްކަނީ ހަލާލު ކާނާ ކަން ފާހަގަ ކޮށްލެވެއެވެ.

ޗިކިންގ ގެ ހާއްސަ ބާވަތްތަކުގެ ތެރޭގައި ގްރިލްޑް ޗިކަން، ޕެރި ޕެރި ޗިކެން، ބާގަރ، ރެޕްސް، ޕިއްޒާ، ޑެޒަރޓްގެ އިތުރުން އަދި އެހެނިހެން ބާވަތްތައް ވެސް ހިމެނެއެވެ.

މީގެ އިތުރުން، ސައީދު ވިދާޅުވީ، ކުރިއަށް އޮތް ހަފްތާގެ ތެރޭގައި އާ ވެރައިޓީސްތައް އަލުން ނިކުންނާނެ ކަމަށެވެ.

މި ރެސްޓްރޯންޓް ހުޅުވިފައި ހުންނާނީ ހުކުރު ދުވަސް ފިޔަވައި ކޮންމެ ދުވަހެއްގެ ހެނދުނު 9:00 ން ރޭގަނޑު 12:00 އަށެވެ. އަދި ހުކުރު ދުވަހު ހުޅުވާނީ ހަވީރު 4:00 ން 12:00 އަށެވެ.

ޗިކިންގގެ ފައުންޑަރ އަދި މެނޭޖިންގ ޑިރެކްޓަރ އޭކޭ މަންސޫރު ރާއްޖެ އެމްވީއަށް މައުލޫމާތު ދެއްވަމުން ވިދާޅުވީ، ރާއްޖޭގެ އިތުރު ރަށްތަކުގައި ވެސް އަދި އިތުރު އައުޓްލެޓްތައް ހުޅުވުމަށް ހިޔާލުކުރައްވާ ކަމަށެވެ.

ޗިކިންގގެ ވާހަކަ ފެށިގެން އައީ އިންޑިއާގެ ރައްޔިތެއް ކަމުގައިވާ އޭކޭ މަންސޫރުއާއި ހަމައިންނެވެ. އޭނާގެ ހުވަފެން ހަގީގަތަކަށް ވެގެން ދިޔައީ ދުނިޔޭގެ އެންމެ ބޮޑު އެއް ވިޔަފާރި ހަބް، ދުބާއީގައި 2000 ވަނަ އަހަރު ހުޅުވި ޗިކިންގ ރެސްޓްރޯންޓުގެ ފުރަތަމަ އައުޓްލެޓާއެކުއެވެ. އިސާހިތަކު، ޗިކިންގގެ ކުކުޅުގެ ރަހަ ދުބާއީގައި ދިރިއުޅޭ ހުރިހާ ނަސްލެއްގެ ބަޔަކަށް ކަމުދާން ފެށިއެވެ.

މިހާރު ޗިކިންގ ބްރޭންޑަކީ ދުނިޔޭގައި ނަން މަޝްހޫރު ބްރޭންޑެކެވެ. އެގޮތުން، އިތުރު އައުޓްލެޓްތައް މިއަހަރު ތެރޭގައިވެސް ހުޅުވުމަށް ވަނީ ހަމަޖެހިފައެވެ.

މީގެ ކުރިން ރާއްޖޭގައި ޗިކިންގ ރެސްޓްރޯންޓް ހުޅުވީ ރަސްފަންނުގައި ހުންނަ ޕެވިލިއަންގައި 2018 ވަނަ އަހަރުގެ ޖޫން މަހުއެވެ.