މެންޗިސްޓަރ ސިޓީއަށް ކުޅެމުން އަންނަ ސާނޭ އެ ޓީމުގައި މަޑުކުރާނެ ކަމުގެ އުންމީދު އެބައޮތްކަމަށް ސިޓީގެ ކޯޗު ޕެޕް ގާޑިއޯލާ ބުނެފިއެވެ.

ގާޑިއޯލާ މިހެންބުނެފައިވަނީ ޖަރުމަނުގެ ޗެމްޕިއަން ބަޔާން މިޔުނިކުން ސާނޭ އަށް ޝައުގުވެރިކަން ފާޅުކޮށްފައިވަނިކޮންނެވެ.

ހުކުރު ދުވަހު އޮތް ނޫސްވެރިންގެ ބައްދަލުވުމުގައި ގާޑިއޯލާ ބުނީ ސާނޭގެ ހޯދުމަށް ބަޔާނުން މަސައްކަތް ކުރާކަން އެނާއަށް އިނގިފައެއް ނުވާ ކަމަށާއި ސާނޭ ސިޓީގައި މަޑުކުރާނެކަމުގެ އުންމީދު އެބަ އޮތް ކަމަށެވެ.

ޖަރުމަނުގެ ކުޅުންތެރިޔެއްކަމަށްވާ ލޮތައަރް އީއެސްޕީއެން އަށް ދިން އިންޓަރވިއުއެއްގައި އޭނާ ބުނީ ބަޔާންމިޔުނިކް އިން މިފަހަރު ފެންނާނެ އާ ކުޅުންތެރިޔަކަށް ސާނޭ ވެގެން ދާނެކަމަށެވެ.

ސިޓީއިން އެންމެ ފަހުން ކުޅުނު މެޗުގައި ސާނޭ ކުޅެން އެރީ ބަދަލު ކުޅުންތެރިޔެއްގެ ގޮތުގައެވެ. ސާނޭ ސިޓީއާއެކު ހަދައިފައިވާ ކޮންޓްރެކްޓްގައި ބާކީ ދެއަހަރު އެބައޮތެވެ.

ޝާލްކޭ އިން 2013 ވަނަ އަހަރުގެ ސީޒަނުގައި ކެރިޔަރު ފެށި ސާނޭ ވަނީ އެ ކްލަބަށް ކުޅުނު 57 މެޗުގައި 13 ލަނޑު ކާމިޔާބު ކޮށްފައެވެ. އޭނާ އެ ކްލަބް ދޫކޮށް ސިޓީއަށް ބަދަލުވީ 2016 ވަނަ އަހަރުގެ ސީޒަނުގައެވެ.

އެގޮތުން ސާނޭ ވަނީ ސިޓީއަށް މިހާތަނަށް ކުޅުނު 133 މެޗުގައި 39 ލަނޑު ކާމިޔާބު ކޮށްފައެވެ. އަދި އޭނާ ވަނީ އެ ކްލަބާއެކު ޕްރިމިއާ ލީގު ދެފަހަރު، ލީގު ކަޕް ދެފަހަރު އަދި އެފްއޭ ކޮމިއުނިޓީ ޝިލްޑް އެއް ފަހަރު ކާމިޔާބު ކޮށްފައެވެ.

މީގެ އިތުރުން ސާނޭ ވަނީ 2017 ވަނަ އަހަރުގެ ސީޒަނުގައި ޕްރިމިއާ ލީގުގެ އެންމެ ޒުވާން ކުޅުންތެރިޔާގެ މަގާމު ހޯދުމުގެ އިތުރުން ޖަރުމަން ގައުމީ ޓީމަށް ކުޅުނު 19 މެޗުގައި ތިން ލަނޑު ކާމިޔާބު ކޮށްފައެވެ