އެހެން އަހަރުތަކޭ އެއްފަދައިން އިނގިރޭސިވިލާތަށް މަތީ ތައުލީމު ހާސިލްކުރަންދާ ފަރާތްތަކަށް ފަސޭހަކަމާއިއެކު ވިސާ ހޯދުމަށް މަގުފަހިކޮށް ދިނުމަށް މި އަހަރުވެސް ފޮރިން މިނިސްޓްރީ ގައި ވަގުތީ ވިސާ ސެންޓަރެއް ގާއިމްކުރާ ގޮތަށް ހަމަޖެހިފައިވާ ކަމަށް އެ މިނިސްޓްރީން ބުނެފިއެވެ.
ފޮރިން މިނިސްޓްރީން ބުނީ، ޓެމްޕަރަރީ ޔޫކޭ ވިސާ އެޕްލިކޭޝަން ސެންޓަރު އޮގަސްޓު މަހު 5 އިން 6 އަށް ފޮރިން މިނިސްޓްރީ ގައި ކުރިޔަށްދާނެ ކަމަށެވެ.
ޔޫކޭ ވިސާއަށް އެދި ހުށަހެޅުން ކުރިއަށް ދާނީ އެ ދެ ދުވަހުގެ ހެނދުނު 9:00 އިން ހަވީރު 17:00 އަށް ފޮރިން މިނިސްޓްރީގައެވެ. ވިސާ އަށް އެދި ހުށަހެޅުމަށް ބުކިންގ ހަދަން ޖެހެއެވެ.
މިދިޔަ އަަހަރު ވަގުތީ ވިސާ ސެންޓަރު ކުރިޔަށް ގެންގޮސްފައި ވަނީ އޮގަސްޓު ހަތަކުން އަށަކަށެވެ. އާއްމުކޮށް އިނގިރޭސިވިލާތަށް ދާ ވިސާ ޖަހަން ޖެހެނީ ސްރީލަންކާއިންނެވެ.
ދިވެހިންނަށް އިނގިރޭސިވިލާތަށް އޮންއެރައިވަލް ވިސާ ހަ މަހަށް ލިބޭއިރު، ގިނަ ދިވެހިން ތަކެއް އިނގިރޭސިވިލާތުގައި ދިރިއުޅެއެވެ. ފޮރިން މިނިސްޓްރީން ބުނީ، ޔޫކޭގެ އެމްބަސީ އެއް ރާއްޖޭގައި ހުޅުވިގެން ދިޔުމުން ވިސާ ހޯދުމަށް ބޭރަށް ނުގޮސް ފަސޭހާތަކެއް ވެގެންދާނެ ކަމަށެވެ.
އިނގިރޭސިވިލާތުގެ އެމްބަސީ އެއް ރާއްޖޭގައި ގާއިމްކުރަން ނިންމާފައިވާ ކަމަށް އެގައުމުން ލަންކާގެ އިތުރުން ރާއްޖެއަށް ކަނޑައަޅުއްވާފައިވާ ޖޭމްސް ޑޯރިސް ވަނީ ފޮރިން މިނިސްޓަރު އަބްދުﷲ ޝާހިދާއެކު މި އަހަރު ޖެނުއަރީ ކުރީކޮޅު ބޭއްވި ބައްދަލުވުމެއްގައި ވިދާޅުވެފައެވެ.
