ރަށްރަށުގައި ގޭދޮށު މަސްފެކްޓްރީ ގާއިމް ކުރުމަށް މަޖިލީހަށް ގަރާރެއް
މި ގަރާރު މަޖިލީހަށް ހުށަހެޅުއްވީ ތޮއްޑޫ ދާއިރާގެ މެމްބަރު ހަސަން ޝިޔާން
ތޮއްޑޫ ދާއިރާގެ މެމްބަރު ހަސަން ޝިޔާން
ރަށު ކައުންސިލާއި އަދި އަމިއްލަ ފަރާތްތަކާއި ގުޅިގެން ރަށްރަށުގައި ގޭ ދޮށު މަސްފެކްޓްރީ ގާއިމް ކުރުމާއި ގުޅޭ ގޮތުން މަޖިލީހަށް ގަރާރެއް ހުށަހަޅައިފިއެވެ.
މި ގަރާރު މަޖިލީހަށް ހުށަހެޅުއްވީ ތޮއްޑޫ ދާއިރާގެ މެމްބަރު ހަސަން ޝިޔާންއެވެ.
މި ގަރާރަކީ މަސްވެރިކަމާއި ބެހޭ ބިލަށް ގެންނަން ޖެހޭ ބަދަލުތަކުގެ މައިގަނޑުތަކާއި ގުޅޭ އިތުރު ބަހުސްތަކެއް ކުރިއަށް ގެންދިއުމުގެ ގޮތުން ހުށަހެޅުނު ގަރާރެކެއެވެ.
ގަރާރުގައި ބުނެފައިވަނީ ރާއްޖޭގެ އެކި ސަރަހައްދުތަކުގައި ކައުންސިލާއި އަމިއްލަ ފަރާތްތައް ގުޅިގެން ގޭދޮށު މަސްޕްލާންޓްތައް ތަރައްގީކޮށް ހިންގުމަކީ އިގްތިސާދީގޮތުން ދިވެހި އިންވެސްޓަރުންނަށް ނަފާހުރި ވިޔަފާރިއަކަށް ވެގެންދާނެ ކަމަށެވެ. މަހަށް ރަނގަޅު އަގެއް ލިބިގެން ނުދާ ކަމަށް ގަރާރުގައި ވަނީ ބުނެފައެވެ.
ދިވެހިމަސް ސްރީލަންކާ އަދި ތައިލެންޑް ފަދަ ގައުމުތަކަށް ބޭރުކޮށް އެ ގައުމުތަކުގައި ވެލިއު އެޑިޝަންގެ ތަފާތު ބާވަތްތައް ހަދައި ދިވެހި ކަނޑުމަހުގެ ލޭބަލްގައި ވިލާތުގެ ގައުމުތަކަށް ނިސްބަތުން ބޮޑު އަގުގައި ވިއްކައިގެން އެތަކެތިން ބޮޑު މަންފާއެއް ހޯދަމުން އަންނަ ކަމަށް ގަރާރުގައި ވަނީ ބުނެފައެވެ.
މި ކަމާއި ގުޅޭ އިންތިޒާމްތައް ހަމަޖެއްސުމަށް ސަރުކާރުގެ ކަމާބެހޭ އިދާރާތަކުގެ އިތުރުން ރައީސް އިބްރާހިމް މުހައްމަދު ސޯލިހަށް އިލްތިމާސް ކުރުމަށް ގަރާރުގައި ވަނީ ހުށަހަޅައިފަ އެވެ.
ދިވެހި މަސްވެރިކަމުގެ ސިނާއަތު ކުރިއަރުވައި، ދިވެހި މަސްވެރިން ބާނާ މަހަށް ހަމަ އަގުހޯދާދީ ދިވެހި އުފެއްދުންތެރިކަން އިތުރުކުރުމަކީ ސަރުކާރުގެ އިތުރުން ސަރުކާރު ހިންގާ މައި ޕާޓީ އެމްޑީޕީގެ ވައުދެކެވެ.
