ޕްރޮފެޝަނަލް އެންޑް ކެރިއަރ ވިމެން އެވޯޑްސް 2019 ގެ މީޑިއާ ދާއިރާގެ އެވޯޑް ނައުހާ އިބްރާހީމް އަށް ލިބިއްޖެއެވެ.

ވިމް އެވޯޑްސް މި އަހަރު އެކި ކެޓެގަރީތަކުން 29 ކަނބަލަކަށާއި ދެ ކުންފުންޏަކަށް ވަނީ ހަވާލުކޮށްފައެވެ. ނައުހާ އަކީ މީޑިއާ ދާއިރާގެ 13 އަހަރުގެ ތަޖުރިބާ ލިބިފައިވާ ރާއްޖޭގެ މަޝްހޫރު ޕްރެޒެންޓަރެކެވެ.

ނައުހާ ފުރަތަމަ ފެނިގެން ގޮސްފައި ވަނީ ޓީވީއެމްގެ މަޝްހޫރު ޕްރޮގްރާމެއް ކަމަށްވާ ފިލްމީ އުދަރެހުންނެވެ. ނައުހާ ވަނީ ޓީވީއެމްގައި 7 އަހަރު މަސައްކަތްކޮށްފައެވެ. ނައުހާ ވަނީ މީޑިއާ ދާއިރާގައި ހޭދަކުރި ދިގު މުއްދަތުގައި ރާއްޖެޓީވީގައި ހަބަރު ކިޔުމުގެ އިތުރުން އެކި ސިޔާސީ އަދި މުނިފޫހިފިލުވުމުގެ ގިނަ ޕްރޮގްރާމްތަކެއް ހުށަހަޅައިދީފައެވެ. މީގެ އިތުރުން ނައުހާ ވަނީ ރާއްޖެއިން ބޭރުގައި އެކި ޝޯތައް ވެސް ހުށަހަޅާފައެވެ.

ދިވެހި އަދި އިނގިރޭސި ބަހުން ތަފާތު އެކި ހަފްލާތައް ހޯސްޓް ކުރަމުން އަންނަ ނައުހާ އެންމެ ފަހުން މަސައްކަތްކޮށްފައިވަނީ ރާއްޖެޓީވީގެ އެޑްމިން އެންޑް އެޗްއާރް މެނޭޖަރަކަށެވެ. ނައުހާ ތައުލީމް ހާސިލުކޮށްފައިވަނީ ޔޫކޭގެ މިޑްލް ސެކްސް ޔުނިވަރސިޓީ (ކޮލަންބޯ) އިން ބެޗިލާސް އޮފް އާޓްސް އިން ބިޒްނަސް މެނޭޖްމަންޓް އަދި ބެޗިލާސް އިން ހިއުމަން ރިސޯސަސް ކޮލަމްބޯގެ އައިސީބީޓީ އިންނެވެ.

ނިމިގެންދިޔަ ރޯދަ މަހު ނައުހާ ވަނީ ރާއްޖޭގެ ސިޔާސީ ބޭފުޅުންގެ ތަފާތު ކަންކަން ދައްކުވައިދޭ ރާއްޖެޓީވީގެ "ނުރަސްމީ ގަޑި" ޕްރޮގްރާމް ޕްރޮޑިއުސްކޮށް، ހޯސްޓްކޮށްފައެވެ.

ނައުހާ އަކީ ތަފާތު އިވެންޓްތަކުގައި އަދި ޕްރޮގްރާމްތަކުގައި ވަރަށް ތަފާތުކޮށް ހެދުން އަޅާ ވަރަށް ތަފާތު ހެއަރ ސްޓައިލް ބޭނުންކުރާ ޕްރެޒެންޓަރެކެވެ. ނައުހާއަކީ ރާއްޖެޓީވީގައި ބިޒްނަސް ޑިވަލޮޕްމަންޓް މެނޭޖަރެއްގެ ގޮތުގައި ހަރަކާތްތެރިވަމުން އަންނަ މީހެކެވެ.

ވިމްސް އެވޯޑްގައި ގިނަ ކެޓަގަރީތަކުން އެވޯޑްތައް ހަވާލުކޮށްފައިވާއިރު މިއީ މި އެވޯޑް ދޭ ދެވަނަ އަހަރެވެ.