ޓޫރިޒަމް މިނިސްޓްރީގެ ފަސް ވަނަ މާސްޓަރ ޕްލޭން: ހުރިހާ ކަމަކަށް ހައްލު ލިބޭނެ
9 ޖުލައި 2019 | އަންގާރަ 14:41ޓޫރިޒަމް މިނިސްޓްރީގެ ފަސްވަނަ މާސްޓާ ޕްލޭން ޖުލައި 30 ވަނަ ދުވަހު އިފްތިތާހުކުރާނެ
ޓޫރިޒަމް މިނިސްޓަރ އަލީ ވަހީދު ނޫސްވެރިންނާ ބައްދަލު ކުރައްވާ ވާހަކަފުޅު ދައްކަވަނީ
ޓޫރިޒަމް މިނިސްޓްރީގެ ފަސް ވަނަ މާސްޓަރ ޕްލޭނުން ޓޫރިޒަމް ސިނާއަތަށް ކުރިމަތިވެފައިވާ ހުރިހާ މައްސަލަތަކަށް ހައްލު ލިބިގެންދާނެ ކަަމަށް ޓޫރިޒަމް މިނިސްޓަރ އަލީ ވަހީދު ވިދާޅުވެއްޖެއެވެ.
ޓޫރިޒަމް މިނިސްޓްރީގައި ހޯމަ ދުވަހު ނޫސްވެރިންނާ ބައްދަލުކުރައްވާ ވާހަކަފުޅު ދައްކަވަމުން މިނިސްޓަރ އަލީ ވަހީދު ވިދާޅުވީ އެ މިނިސްޓްރީގެ ފަސްވަނަ މާސްޓާ ޕްލޭންގެ މަސައްކަތް ޖުލައި 30 ވަނަ ދުވަހު އިފްތިތާހު ކުރައްވާނެ ކަމަށެވެ. މިނިސްޓަރ ވިދާޅުވީ މިނިސްޓްރީގެ މާސްޓަރ ޕްލޭން އިފްތިތާހު ކުރުމަށް ފަހު މަސައްކަތް ކުރާނެ ގޮތް ކިޔައިދޭނެ ކަމަށާއި ސިޔާސީ އެއްވެސް ނުފޫޒެއް އޭގެ ތެރެއަށް ވަނުމުގެ ޖާގަ ނުދެއްވާނެ ކަމަށެވެ.
އޭގެ އިތުުރުން ފަތުރު ވެރިކަމުގެ ދާއިރާގައި މަސައްކަތް ކުރާތާ ގިނަ ދުވަސްތަކެއް ވެފައިވާ ދިވެހީން އެބަ ތިބި ކަމަށާއި، މިފަހަރުގެ މާސްޓާ ޕްލޭން އެކުލަވާލާނީ ރާއްޖޭގައި ގިނަ ދުވަސްތަކެއް ވަންދެން މަސައްކަތް ކޮށްފައިވާ ބޭރުގެ ފަރާތްތަކާއި ދިވެހިންގެ ލަފަޔާ އެކު ކަމަށް މިނިސްޓަރ ވިދާޅުވިއެވެ.
މި ފަހަރު ހަދަން ބޭނުންވަނީ އޮއްޓަރު ހުރި މާސްޓަރ ޕްލޭނެއް ކަމަށް މިނިސްޓަރ ވަނީ ވިދާޅުވެފައެވެ. އެގޮތުން މިހާރު ކުރިޔަށް ގެންދާ އިންސްޕެކްޝަން ތަކުގައި ދިވެހިރާއްޖޭގެ ފަތުރުވެރިކަމުގެ ދާއިރާގައި މަސައްކަތް ކުރާ ދިވެހި އަންހެނުންގެ އިންސައްތައަކީ ހަތެއް ކަމަށާއި، އެކަން ވެސް ބަދަލުކުރަން ބޭނުންވާ ކަމަށް އަލީ ވަހީދު ވިދާޅުވިއެވެ.
އެއް މަސައްކަތެއް ކުރާ ދިވެހިންނާއި ބިދޭސީންނާއި ދޭތެރޭ މުސާރައިގެ ފަރަގު އޮތް ކަމަށް ގަބޫލުކުރައްވާ ކަމަށާއި އެ ފަރަގު ވެސް ނައްތާލާނެ ކަމަށް މިނިސްޓަރ ވިދާޅުވިއެވެ. ޖުމްލަކޮށް ހުރިހާ ކަމަކަށް ވެސް ހައްލު ލިބިގެން ދާއިރު، މިކަން ކުރެވޭނީ ހުރިހާ ފަރާތްތަކުން ގުޅިގެން ކަމަށް އެމަނިކުފާނު ފާހަގަކުރެއްވިއެވެ. އެގޮތުން މިނިސްޓަރ އަލީ ވަހީދު ވަނީ މިހާރު އެ މިނިސްޓްރީން ކުރަމުންގެންދާ މަސައްކަތްތަކަށް މަޓީ (މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ) އިން ދެއްވާ އެއްބާރުލުމަށް ޝުކުރު އަދާކުރައްވާފައެވެ.
އެންމެ ފަހުން އެކުލަވާލި ޓޫރިޒަމްގެ މާސްޓަރ ޕްލޭން އެކުލަވާލާފައި ވަނީ ރައިސް ޔާމީނުގެ ސަރުކާރުގައި 2013 ވަނަ އަހަރުއެވެ. އޭރު ޓޫރިޒަމް މިނިސްޓަރ ގެ މަގާމުގައި ހުންނެވީ އަހްމަދު އަދީބުއެވެ.
