ނިއުކާސަލް ޔުނައިޓެޑުގެ ކޯޗުކަމުގެ މަގާމު ހުށަހެޅުމުން، ލިވަޕޫލްގެ ލެޖެންޑް ސްޓީވެން ޖެރާޑު އެ ހުށަހެޅުން ރިޖެކްޓްކޮށްފި ކަމަށް ރިޕޯޓްތައް ބުނެފިއެވެ.

ދަ މިރާއިން ބުނީ، ނިއުކާސަލްގެ އޯނަރު ވަނީ ޖެރާޑް އެ ކްލަބަށް ގެންނަން މަސައްކަތް ކޮށްފައި ކަމަށާއި، ނަމަވެސް ޖެރާޑް އެކަމަށް އެއްބަސްނުވި ކަމަށް ވެސް ރިޕޯޓްތައް ބުނެއެވެ.

ހަތަރު އަހަރުގެ އެއްބަސްވުމުގެ ދަށުން ރޭންޖާސްގެ ކޯޗުކަމާ 2018 ވަނަ އަހަރު ޖެރާޑް ހަވާލުވިއިރު، އޭނާ އެ ކްލަބާއެކު ހަދާފައިވާ އެއްބަސްވުން ހަމަވާނީ 2022 ވަނަ އަހަރެވެ.

ފުޓުބޯޅަ ކުޅުން 2016 ވަނަ އަހަރު ޖެރާޑް ހުއްޓާލާފައިވާއިރު، އޭނާ ވަނީ ލިވަޕޫލްގައި 17 ސީޒަން ހޭދަކޮށްފައެވެ. އަދި އޭނާ ވަނީ އެ ކްލަބަށް ކުޅުނު 710 މެޗުގައި 186 ލަނޑު ކާމިޔާބު ކޮށްފައެވެ.

ލިވަޕޫލް ދޫކޮށް 2015 ވަނަ އަހަރު ޖެރާޑް އެލްއޭ ގެލެކްސީއަށް ބަދަލުވިއިރު، އޭނާ ވަނީ އެ ކްލަބަށް ކުޅުނު 38 މެޗުގައި ފަސް ލަނޑު ކާމިޔާބު ކޮށްފައެވެ. މިއީ އޭނާ އެންމެ ފަހުން ކުޅުނު ކްލަބެވެ.

އިނގިރޭސި ގައުމީ ޓީމަށް 114 މެޗު ކުޅެ 21 ލަނޑު ކާމިޔާބު ކޮށްފައިވާ ޖެރާޑް ވަނީ ލިވަޕޫލްއާއެކު ދެ އެފްއޭ ކަޕް، ތިން ލީގް ކަޕް އަދި ޔުއެފާ ޗެމްޕިއަންސް ލީގު އެއްފަހަރު ކާމިޔާބުކޮށްފައެވެ.

ރޭންޖާސްއަށް މިހާތަނަށް ޖެރާޑް އިރުޝާދުދިން 60 މެޗުގެ ތެރެއިން 32 މެޗުން އެޓީމު މޮޅުވެފައިވާއިރު، 18 މެޗުން ވަނީ އެއްވަރުވެފައެވެ. އެޓީމު ބަލިވީ އެންމެ 10 މެޗުންނެވެ.