ނޭމާ ހޯދުމަށް ރެއާލް އަދި ބާސާއިން ކުރި ބިޑު ޕީއެސްޖީން ރިޖެކްޓްކޮށްފި

ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ ބްރެޒިލްގެ ފޯވާޑް ނޭމާ ހޯދުމަށް ރެއާލް މެޑްރިޑް އަދި ބާސެލޯނާއިން ކުރި ބިޑު ޕީއެސްޖީން ރިޖެކްޓްކޮށްފި ކަމަށް ރިޕޯޓްތައް ބުނެފިއެވެ.

މީޑިއާ ރިޕޯޓްތައް ބުނާގޮތުން ނޭމާ ހޯދުމަށް ބާސާއިން 92.4 މިލިއަން ޕައުންޑުގެ އިތުރުން އެޓީމުގެ ފިލިޕޭ ކުޓީނިއޯ ހުށަހަޅާފައިވާއިރު، ރަކިޓިޗްވެސް ހުށަހެޅުމަށް ވަނީ މަޝްވަރާ ކޮށްފައެވެ.

ރެއާލްއިން ނޭމާ ހޯދުމަށް ފައިސާގެ އިތުރުން ހުށަހަޅާފައިވަނީ ހަމޭސް ރޮޑްރިގޭޒް އާއި ގެރެތު ބޭލްއެވެ. ޕީއެސްޖީން ރެއާލްގެ ވިނީސިއަސް ޖޫނިއާ މި އެއްބަސްވުމުގެ ތެރެއަށް ލުމަށް އެދުމުން ރެއާލްއިން އެކަން އެގޮތަށް ކުރަން އެއްބަސްނުވިއެވެ.

ޕީއެސްޖީން ރެއާލް އާއި ބާސާގެ މި ދެ ހުށަހެޅުން ރިޖެކްޓްކުރި ނަމަވެސް، އެ ކްލަބުން ނޭމާ ވިއްކާލަން ބޭނުންވެއެވެ. އަދި ވިއްކާލާނެ ކަމަށް ބޮޑަށް ބެލެވެނީ ރެއާލްއަށެވެ.

ބްރެޒިލްގެ ސަންޓޯސްގައި ކާމިޔާބު ދުވަސްތަކެއް ހޭދަކުރުމަށް ފަހު ނޭމާ ބާސާއަށް ބަދަލުވީ 2013 ވަނަ އަހަރެވެ.

އެގޮތުން އޭނާ ވަނީ އެޓީމަށް ކުޅުނު 186 މެޗުގައި 105 ލަނޑު ކާމިޔާބުކޮށް އެޓީމާއެކު ސްޕެނިޝް ލީގު ދެފަހަރު، ކޮޕާ ޑެލްރޭ ދެފަހަރު، ސްޕެނިޝް ސުޕަރކަޕް ޔުއެފާ ޗެމްޕިއަންސް ލީގު އަދި ފީފާ ކްލަބް ވޯލްޑް ކަޕް ވެސް ކާމިޔާބު ކޮށްފައެވެ.

ނޭމާ އަންނަނީ ޕީއެސްޖީއަށް ބަދަލުވެ، އެ ކްލަބުގައި މޮޅު ކުޅުމެއް ދައްކަމުންނެވެ. އެގޮތުން އޭނާ ވަނީ އެ ކްލަބަށް މިހާތަނަށް ކުޅުނު 58 މެޗުގައި 51 ލަނޑު ކާމިޔާބު ކޮށްފައެވެ.

ބްރެޒިލް ގައުމީ ޓީމާއެކު އޮލިމްޕިކްސް ރަން މެޑަލް މިދިޔަ އަހަރު ކާމިޔާބުކުރި ނޭމާ ވަނީ ގައުމީ ޓީމަށް ކުޅުނު 97 މެޗުގައި 60 ލަނޑު ކާމިޔާބު ކޮށްފައެވެ.

މީގެ އިތުރުން އޭނާ ވަނީ ފީފާ ކޮންފެޑެރޭޝަންސް ކަޕް 2013 ވަނަ އަހަރު އަދި ސައުތު އެމެރިކަން ޔޫތް ޗެމްޕިއަންޝިޕް 2011 ވަނަ އަހަރު ބްރެޒިލްއާއެކު ކާމިޔާބު ކޮށްފައެވެ.