ބާ ކައުންސިލްގެ އިންތިޚާބާއި ގުޅޭ ޝަކުވާ 12 ޝަކުވާއެއްވަނީ ހުށައަޅާފައި: އީ.ސީ

މިމަހުގެ 13 ވަނަ ދުވަހު ބޭއްވުމަށް ހަމަޖެހިފައިވާ ބާ ކައުންސިލްގެ އިންތިޚާބާއި ގުޅޭ ޝަކުވާ ހުށައެޅުމުގެ މުއްދަތު ހަމަވިއިރު 12 ޝަކުވާ ހުށައަޅާފައިވާ ކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ.

އިލެކްޝަންސް ކޮމިޝަންގެ މެމްބަރ އަކްރަމް ވިދާޅުވީ، ހުށައަޅާފައިވާ ޝަކުވާތަކުގެ ތެރޭގައި، އެޑްރެސް ނުބައިކޮށް އޮވެގެން 8 ޝަކުވާއަކާއި، ލިސްޓުގައި ނަން ނެތިގެން ތިން ޝަކުވާ އަދި ނަން ނުބައިކޮށް އޮވެގެން އެއް ޝަކުވާ ހުށަހަޅާފައިވާކަމަށެވެ. އަދި ޝަކުވާތަކަށް ބެލުމަށްފަހު ވޯޓާސް ލިސްޓުގެ ކުރީގެ ޖުމުލަ އަދަދު 1،487 އިން ޖުމްލަ އަދަދު 1،490 އަށް އިތުރުކޮށްފައި ކަމަށް އަކްރަމް ވިދާޅުވިއެވެ.

ބާ ކައުންސިލްގެ އިންތިޚާބުގެ ވޯޓުލުން ކުރިއަށްދާނީ ހަމައެކަނި މާލޭ ސިޓީއާއި އައްޑޫ ސިޓީގައި ކަމަށާއި އެގޮތުން މާލޭގައި ވޯޓުލުން ކުރިއަށްދާނީ އިންތިޚާބާބެހޭ މަރުކަޒުގެ ހޯލުގައި ކަމަށާއި، އައްޑޫގައި ވޯޓުލުން ކުރިއަށްދާނީ ހިތަދޫ ޝަރަފުއްދީން ސްކޫލުގެ ހޯލުގައިކަމަށް އަކްރަމް ވިދާޅުވިއެވެ. އަދި ބާ ކައުންސިލްގެ ރައީސް އާއި ނައިބު ރައީސްގެ ނަން އެއް ކަރުދާސް ކޮޅެއްގައި ހިމެނުމަށް އިލެކްޝަންސް ކޮމިޝަނުން ކުރިން ނިންމި ނަމަވެސް، ވޯޓު ކަރުދާހުގައި ފާހަގަޖެހުމުގެ އުޞޫލަށް ގެނެވުނު ބަދަލުތަކާއެކު ކައުންސިލްގެ ރައީސްކަމަށަށާއި، ނައިބު ރައީސްކަމުގެ މަޤާމަށް ކުރިމަލައްވާފައިވާ ކެނޑިޑޭޓުންގެ ނަން 2 ކަރުދާހަކަށް ޗާޕުކުރުމަށް މިހާރު ނިންމާފައިވާކަމަށްވެސް އަކްރަމް ވިދާޅުވިއެވެ.

ބާ ކައުންސިލްގެ އިންތިޚާބުގައި ޖުމްލަ 23 ކެނޑިޑޭޓަކު ވާދަކުރާއިރު، ކައުންސިލްގެ ރައީސްކަށް ކުރިމަތިލައްވާފައިވަނީ ޤާނޫނީ ވަކީލް ޙުސްނުއް ސުޢޫދުގެ އިތުރުން ޤާނޫނީ ވަކީލް މައުމޫން ޙަމީދުއެވެ. ކައުންސިލްގެ ނާއިބު ރައީސްކަމުގެ މަޤާމަށް ކުރިމަތިލާފައިވަނީ މުހައްމަދު ހަލީމްގެ އިތުރުން އަބްދުﷲ މުއިއްޒު އެވެ. އަދި އެގްޒެކްޓިވް ކޮމިޓީގެ މެމްބަރުކަމަށް ޖުމުލަ 19 ފަރާތަކުން ވަނީ ކުރިމަތިލާފައެވެ.

ބާ ކައުންސިލްގެ އިންތިޚާބުގެ ވޯޓުލުން ކުރިއަށްދަނީ މި އަންނަ ހޮނިހިރު ދުވަހުގެ ހެނދުނު 9 އިން ހަވީރު 5 ޖެހުމަށާއި ހަމައަށެވެ. އަދި ކެންޕޭން ކުރުމުގެ ފުރުސަތު މިހާރުން ފެށިގެން ޖުލައި 12 ވާ ހުކުރުދުވަހުގެ ހަވީރު 6 ޖެހުމާއި ހަމައަށް ކުރެވޭނެ ކަމަށްވެސް އިލެކްޝަންސް ކޮމިޝަނުން ވިދާޅުވިއެވެ.