ފިތުނައިން ރައްކާތެރިވުމަށް ހުކުރު ހުތުބާގައި ގޮވާލައިފި
5 ޖުލައި 2019 | ހުކުރު 14:03ލޮބުވެތި ނަބިއްޔާ ވަނީ ފިތުނައިގެ ތެރެއަށް ނުވެއްޓި، ފިތުނައިން ރައްކާތެރި ވެގެން އުޅުމަށް އިރުޝާދު ދެއްވާފަ
ރާއްޖޭގެ މިސްކިތެއް
ފިތުނައިން ރައްކާތެރިވުމަށް ހުކުރު ހުތުބާގައި ގޮވާލައިފިއެވެ.
"ފިތުނައިން ރައްކާތެރިވުން" މި މައުލޫގެ މައްޗަށް ބިނާކޮށްފައިވާ ހުތުބާގައި ބުނީ ފިތުނަވެރިކަމުންނާއި ދުޝްމަނުންގެ ނުބައި ނިޔަތްތަކުން ރައްކާތެރިކޮށްދެއްވުމަށް އެދި މާތް ﷲ ހަޟްރަތަށް ދުއާ ދަންނަވަން ޖެހޭނެ ކަމަށެވެ.
މީގެ އިތުރުން، އެންމެ ވަރުގަދަ ފިތުނައަކީ ދީނީ ފިތުނަ ކަމަށާ އެ ފިތުނައަކީ އެމީހަކާ ވެރި ރަސްކަލާނގެއާ ދެމެދުގައިވާ ގުޅުން އިމްތިހާނު ކުރެއްވުމަށްޓަކައި ކުރިމަތި ކުރައްވާ ފިތުނައެއް ކަމަށް ހުތުބާގައި ބުނެފައިވެއެވެ.
ފިތުނައިން ދުރުވެވޭނީ ތާކުން ތާކު ނުޖެހޭ ވާހަކައިން ދުރުވުމެގެން ކަމަށް ވެސް ހުތުބާގައި ފާހަގަކުރިއެވެ.
އަދި އިލްމާއި ހޭލުންތެރިކަން އިތުރުވުމުން ފިތުނައިން ސަލާމަތް ވެވޭނެ ކަމަށް ހުތުބާގައި ބުނެފައިވެއެވެ. އަދި ވިސްނާ ފިކުރުކޮށް ރަނގަޅުގޮތް ދެނެގަނެ އެ ގޮތަށް ތަބާވުމުން ވެސް ފިތުނައިން ދުރުވެވޭނެ ކަމަށް ހުތުބާގައި ބުނެފައިވެއެވެ.
ހުތުބާގައި އިތުރަށް ބުނެފައިވަނީ، މުސީބާތްތަކުން ސަލާމަތް ވެވޭނީ މާތް ﷲ ގެ އަމުރުފުޅުތަކަށް ތަބާވެ އެންމެން އެކަތިގަނޑަކަށްވެ އެއްބާރުލައިގެން ކަމަށާ އިސްލާމްދީނާއި ގައުމުގެ ވަހްދަތު ދެމެހެއްޓުމަށްޓަކައި މަސައްކަތް ކުރުމަށް އަޒުމު ކަނޑައަޅައިގެން ކަމަށެވެ.
