ނަޝީދު ޔާމީނަށް: އެގްރިމެންޓްތައް އެފުށް މިފުށަށް ޖެހުން އެއީ ވެރިކަން ނުދޭނެ އެއް ސަބަބު

މިހާރު މިއޮތް ސަރުކާރު ބަދަލުވެ އިދިކޮޅު ފަރާތްތަކަށް ވެރިކަން ލިބޭ ދުވަހަކުން މި ސަރުކާރުން އެހެން ގައުމުތަކާއެކު ހަދާފައިވާ އެއްބަސްވުންތައް އެފުށް މިފުށަށް ޖަހާނެ ކަމަށް ކުރީގެ ރައީސް އަބްދުﷲ ޔާމީން ވިދާޅުވުމާއިގުޅިގެން އެކަމަށް ކުރީގެ ރައީސް މުހައްމަދު ނަޝީދު ރައްދުދެއްވައިފި އެވެ.

ރައީސް ޔާމީންގެ ވާހަކަފުޅަށް ރައްދުދެއްވައި ރައީސް ނަޝީދު ވިދާޅުވީ އެގްރިމެންޓްތައް އެފުށް މިފުށަށް ޖެހުމުން ދައުލަތަށް ލިބުނު މާލީ ގެއްލުން އެތަށް ބިލިއަނަކަށް އަރާފައިވާ ކަމަށެވެ. އަދި ރައްޔިތުންނަށް ލިބޭ ގެއްލުމަށް ބަލާލުމެއް ނެތި އަނެއްކާވެސް އެގްރިމެންޓްތައް އެފުށް މިފުށަށް ޖަހަން ވިސްނުމަކީ ރައީސް ޔާމީނަށް ރައްޔިތުން ވެރިކަން ނުދޭނެ އެއް ސަބަބު ކަމަށެވެ.

ފޭރުމާ ދެކޮޅަށް ޕީޕީއެމުން ކާނިވާ ސަރަހައްދުގައި ބޭއްވި އެއްވުމުގައި ރައީސް ޔާމީން ވިދާޅުވީ ދައުލަތުގެ ހަރު މުދާ ވިއްކަން އެމަނިކުފާނު ތާއީދު ނުކުރައްވާނެކަމަށެވެ. އަދި އެމަނިކުފާނުގެ ސަރުކާރެއް އައިސްފިކަމުގައިވާނަމަ މިސަރުކާރުން ހަދާފައިވާ ހުރިހާ އެގްރިމެންޓެއް އެފުށް މިފުށަށް ޖަހާނެ ކަމަށް ވިދާޅުވިއެވެ.

އެގްރިމެންޓައް އެފުށް މިފުށަށް ޖަހާނެ ކަމަށް ރައީސް ޔާމީން ވިދާޅުވިއިރު މި ސަރުކާރުން ދަނީ ޖިނާއީ މައްސަލަތަކުގައި އިންޑިއާ އާއި ރާއްޖެއާ ދެމެދު އެހީތެރިކަން ދިނުމުގެ ބޮޑު އެއްބަސްވުމެއް ގާއިމްކުރުމުގެ މަސައްކަތް ކުރަމުންނެވެ. މީގެ އިތުރުން އިތުރުން ކޮޗިން އާއި ހދ. ކުޅުދުއްފުއްޓާ ދެމެދު ފެރީ ނިޒާމެއް ގާއިމްކުރުމުގެ އެއްބަސްވުމެއް ވެސް ގާއިމްކޮށްފައިވެ އެވެ.

އެއާޕޯޓު 35 އަހަރަށް އިންޑިއާގެ ކުންފުންޏެއްކަމަށްވާ ޖީއެމްއާރަށް ކުއްޔަށް ދިނީ ރައީސް ނަޝީދުގެ ވެރިކަމުގައއެވެ. އެކަމަށް އިޝާރާތް ކުރައްވާ ރައީސް ޔާމީން ވިދާޅުވީ އެމަނިކުފާނުގެ ވެރިކަމުގައި ދުނިޔޭގެ އެންމެ ބޮޑެތި ބޯޓުފަހަރު ކަމަށްވާ ޑަބަލް-ޑެކް އޭ-380 ޖައްސާނެ ރަންވޭއެއް ހުޅުވާފައިވާކަމަށާއި އެކަހަލަ އާޕޯޓެއް އެހެން ބަޔަކަށް ދޭންވީ ސަބަބެއް ނެތްކަމަށެވެ.

ޖީއެމްއާރާއެކު ހެދި އެއްބަސްވުން ކުރީގެ ރައީސް މުހައްމަދު ވަހީދުގެ ސަރުކާރުން ބާތިލް ކުރި އެވެ. އޭގެ ފަހުން އެއާޕޯޓް ހިންގަމުން އަންނަނީ ސަރުކާރުގެ ކުންފުނި އެމްއޭސީއެލުންނެވެ.