ސައުދީގެ މިއުޒިކް ފެސްޓިވަލެއްގައި އެމެރިކާގެ ހިޕްހޮޕް ތަރި ނިކީ މިނާޖް!
ފެސްޓިވަލްގައި ސްޓީވް އައޯކީ އަދި ލިއަމް ޕޭން ވެސް ޕާފޯރމް ކުރާން
އެމެރިކާގެ ހިޕްހޮޕް ތަރި ނިކީ މިނާޖް
ސައުދީގައި މި މަހު ބާއްވަން ހަމަޖެހިފައިވާ "ޖިއްދާ ވާލްޑް ފެސްޓް" ގައި އެމެރިކާގެ މަޝްހޫރު ހިޕްހޮޕް ތަރި ނިކީ މިނާޖް ޕާފޯރމް ކުރާ ގޮތަށް ހަމަޖެހިއްޖެއެވެ.
ޖުލައި މަހުގެ 18 ވަނަ ދުވަހު ފަށަން ހަމަޖެހިފައިވާ މިއުޒިކް ފެސްޓިވަލުގައި މިނާޖްގެ އިތުރުން ޑީޖޭ ސްޓީވް އައޯކީ އާއި ލަވަކިޔުންތެރިޔާ ލިއަމް ޕޭން ވެސް ފެނިގެންދާނެއެވެ. މި ފެސްޓިވަލަށް އަންނަން ބޭނުންވާ ބޭރުގެ ގައުމުތަކުގެ މީހުންނަށް ފަސޭހައިން އޮންލައިންކޮށް ވިސާ ލިބޭނެ އިންތިޒާމްތައް ސައުދީން ވަނީ ހަމަޖައްސާފައެވެ.
ނިކީ މިނާޖްއަކީ އޭނާގެ ޕާފޯރމަންސްތަކުގައި ލަވަ ކިޔުމުގެ އިތުރަށް، ނިވާކަން ކުޑަ ހެދުން އެޅުމާއި ގައިގޯޅި މަންޒަރުތައް ވެސް ހިމަނާ ތަރިއަކަށް ވުމުން، އޭނާއަށް ސައުދީގައި ޕާފޯރމް ކުރަން ދައުވަތު ދިނުމުން ގިނަ ބަޔަކަށް ވަނީ ހައިރާންކަމެއް ލިބިފައެވެ.
އެގޮތުން ނިކީ މިނާޖް ގެންނަން ސައުދީ ސަރުކާރުން ނިންމުމުން، ޓްވިޓާގައި ކުރި ޕޯސްޓެއްގައި ސައުދީ އަންހެނަކު ވަނީ ސަރުކާރަށް ވަރަށް ބޮޑަށް ފާޑުކިޔާފައެވެ. އެގޮތުން އޭނާ ވަނީ މި ފެސްޓިވަލަށް ދާ އަންހެނުންނަށް އަބާޔާ ލުމަށް މަޖުބޫރުކޮށްފައިވާ އިރު، ނިކީ މިނާޖް ގެންނަން ނިންމުމުން ހަމަ ހައިރާންވާ ކަމަށް ބުނެފައެވެ.
ޖިއްދާ މިއުޒިކް ފެސްޓްއަށް ވަދެވޭނީ 16 އަހަރުން މަތީގެ މީހުންނަށް އެކަންޏެވެ. އެ ކޮންސަޓުގައި ބަނގުރަލާއި މަސްތުވާތަކެތި ބޭނުންކުރުން މަނާކޮށްފައިވާ އިރު، ކޮންސަޓް އޮންނާނީ ކިންގް އަބްދުﷲ ސްޕޯޓްސް ސްޓޭޑިއަމްގައެވެ.
