ބަންގްލަދޭޝްގައި ބާއްވާ ޑާންސް ފެސްޓިވަލެއްގައި ބައިވެރިވުމުގެ ފުރުސަތު ހުޅުވާލައިފި
ފެސްޓިވަލްގައި ބައިވެރިވެވޭނީ ހަ ފަންނާނުން ހިމެނޭ ގުރޫޕްތަކަށް
ރާއްޖޭގެ ބޮޑުބެރު ގްރޫޕެއް
ބަންގްލަދޭޝްގައި ބާއްވާ ދިވެހި ސަގާފީ ޑާންސް ސެސްޓިވަލެއްގައި ބައިވެރިވުމުގެ ފުރުސަތު ނެޝަނަލް ސެންޓަރ ފޯ ދި އާޓްސް (އެންސީއޭ) އިން ހުޅުވާލައިފިއެވެ.
އެންސީއޭއިން އަންގާރަ ދުވަހު ކޮށްފައިވާ އިއުލާނެއްގައި ބުނެފައި ވަނީ މިއަންނަ ޑިސެމްބަރުމަހު ބަންގްލަދެޝްގައި ބޭއްވުމަށް ހަމަޖެހިފައިވާ "ސާކް ކަލްޗަރަލް ފެސްޓިވަލް އޮން ޓްރެޑިޝަނަލް ޑާންސް 2017" ގައި ބައިވެރިވުމުގެ ފުރުސަތު ހުޅުވާލާ ކަމަށެވެ. އެ ފެސްޓިވަލްގައި ބައިވެރިވެވޭނީ ހަ ފަންނާނުން ހިމެނޭ ގުރޫޕްތަކަށް ކަމަށާއި މި ފެސްޓިވަލަށް ދާ ފަންނާނުންނަށް ތިބުމާއި ކެއުން އަދި ލޯކަލް ޓްރާންސްޕޯޓުގެ ހިދުމަތް ހަމަޖައްސައިދޭނީ ސާކް ކަލްޗަރަލް ސެންޓްރުން ކަމަށް އެ އިއުލާނުގައި ވަނީ ބުނެފައެވެ. އެހެން ނަމަވެސް ފެސްޓިވަލްގައި ބައިވެރިވުމަށް ބަންގްލަދޭޝަށް ދިއުމާއި އެނބުރި އައުމުގެ ހަރަދު ކުރަންޖެހޭނީ އަމިއްލައަށް ކަމަށް އެ ސެންޓަރުން ނެރެފައިވާ އިއުލާނުގައި ވަނީ ބުނެފައެވެ.
މި ފެސްޓިވަލްގައި ބައިވެރިވުމަށް ބޭނުންވާ ފަރާތްތަކުން މި މަހުގެ 29 ވަނަ ދުވަހުގެ ކުރިން އެ ފަންނާނެއްގެ ނަން، މަޤާމް، މޮބައިލް ނަންބަރ، އީމެއިލް އެޑްރެސް، ބައޮގްރަފީ އޮފް ޕާޓިސިޕަންޓްސް/ޓުރޫޕް، ބްރީފް ޑިސްކްރިޕްޝަން އޮފް ސްޕެޝަލައިޒޭޝަން އަދި ފޮޓޯ އޮފް ޕާޓިސިޕަންޓްސް/ޓުރޫޕް ހުށަހެޅުމަށް އެންސީއޭ އިން ވަނީ ބުނެފައެވެ.
