އަދިތްޔާ އަށް ލުޔެއް ދިނުމަށް ވަގުތީ އަމުރެއް ނެރެފި
އޭނާގެ މައްޗަށް ތުހުމަތު ކުރެވެނީ އަންހެނަކު ރޭޕްކުރި ކަމުގެ ތުހުމަތު
އަދިތްޔާ ޕަންޗޯލީ ކޯޓުން ނިކުންނަނީ
އަންހެނަކަށް ޖިންސީ ގޯނާކުރި ކަމުގެ ތުހުމަތު ކުރެވިފައިވާ ބޮލީވުޑްގެ ޑައިރެކްޓަރ އަދިތްޔާ ޕަންޗޯލީ އަށް ލުޔެއް ދިނުމަށް މުމްބާއިގެ ކޯޓަކުން ވަގުތީ އަމުރެއް ނެރެފިއެވެ.
އުމުރުން ފަންސާސް ހަތަރު އަހަރުގެ އަދިތްޔާއާ ދެކޮޅަށް މުމްބާއިގެ ފުލުހުންނަށް މައްސަލަ އެއް ހުށައަޅާފައި ވަނީ ނިމިގެން ދިޔަ ހަފްތާގައެވެ.
އޭނާއާ ބެހޭ ގޮތުން މައްސަލަ ހުށައެޅި 36 އަހަރުގެ އަންހެނެކެވެ. އެ އަންހެން މީހާ ވަނީ އަދިތްޔާ އޭނާއާ އެކު ގަދަކަމުން ބަދު އަޙުލާގީ އަމަލު ހިންގިކަމަށް ތުހުމަތު ކޮށްފައެވެ.
އަންގާރަ ދުވަހު މުމްބާއީގެ ކޯޓުން ވަނީ އެ މައްސަލަގައި ވަގުތީ އަމުރެއް މި މަހުގެ 19 އާ ހަމަޔަށް އޭނާޔަށް ލުޔެއް ދީފައެވެ.
އަދިތްޔާ ދެކޮޅަށް ކުރާ ތުހުމަތުތައް ދޮގު ކުރަމުން އޭނަ ބުނީ، އެ އަންހެން މީހާ އޭނާއާ ދެކޮޅަށް ކުރާ ތުހުމަތު ތަކަކީ އެއްވެސް ހަގީގަތެއް ނެތް ތުހުމަތުތަކެއް ކަމަށެވެ. އަދި އެ މައްސަލައިގެ ހެކި އެބަހުރި ކަމަށާއި، ފުލުހުންގެ ތަހުގީގަށް އެއްބާރުލުން ދޭން ތައްޔާރަކަށް ހުރި ކަމަށް ވެސް ބުންޏެވެ.
