އަދިތްޔާ ކަޕޫރް އަންނަ އަހަރު ކައިވެނި ކުރަނީ

''އާޝިގީ 2'' އިން ގިނަ ބައެއްގެ މަގޫބުލްކަން ހޯދާފައިވާ އަދިތްޔާ ރޯއި ކަޕޫރް އަންނަ އަހަރު ކައިވެނި ކުރަން އުޅޭ ކަމަށް ރިޕޯޓްތައް ބުނެފިއެވެ. އިންޑިއާގެ މުނިފޫހީފިލުވުމުގެ ހަބަރުތައް ގެނެސްދޭ ނޫހެއްގައި ބުނެފައިވާ ގޮތުން އަދިތްޔާ އޭނާގެ ލޯބިވެރިޔާ ދިވާ ދަވަންއާ އަންނަ އަހަރު ކައިވެނި ކުރަން ވަނީ ނިންމާފައެވެ.

އަދިތްޔާ އާއި ދިވާ ރައްޓެހިވެގެން އުޅޭތާ ގިނަ ދުވަސްތަކެއް ވެއްޖެއެވެ. ދެމީހުން އެކުގައި ޕާޓީތަކާއި ހަފްލާތަކުން ވަނީ ފެނިފައެވެ. ''ކޮފީ ވިތް ކަރަން'' ޝޯ ގައި ދިވާއާ ބެހޭ ގޮތުން ވާހަކަ ދައްކަމުން އަދިތްޔާ ބުނެފައިވަނީ ދިވާއާ ދިމާވީ އަހަރުތަކެއް ކުރިން ފެޝަން ޝޯ އަކުން ކަމަށެވެ. އަދި އޭގެ ފަހުން ދެމީހުންގެ ދެމެދު އޮންނަނީ ގާތްގުޅުމެއް ކަމަށް އޭނާ ބުންޏެވެ. އަދިތްޔާ ވަނީ މީގެ ކުރިން އާޝިގީގެ ތަރި ޝްރައްދާ ކަޕޫރްއާ ވެސް ރަށްޓެހިވެފައެވެ. އަދިތްޔާ ދެން އެންމެ އަވަހަށް ފެނިގެންދާނީ މިއަހަރު ޖުލައި މަހު ނެރޭ '' ސަޅަކް 2'' ފިލްމުންނެވެ.