އާޒިމާއަށް ޗިޓު ހަވާލުކުރަން އަނެއްކާވެސް މަސައްކަތް ކުރަނީ

ކުރީގެ ރައީސް އަބްދުﷲ ޔާމީނުގެ ވެރިކަމުގައި ލީގަލް އެފެއާޒް މިނިސްޓަރ އައިޝަތު އާޒިމާ ޝަކޫރުގެ މައްޗަށް އުފުލާފައިވާ މަނީލޯންޑްރިންގެ މައްސަލައިގައި"ޗިޓު ހަވާލުކުރުމަށް މަސައްކަތް ކުރަމުންދާކަމަށް"ކޯޓުތަކާއި ބެހޭ އިދާރާ ޖުޑީޝަލް އެޑްމިނިސްޓްރޭޝަން (ޑީޖޭއޭ)އިން ބުނެފިއެވެ.

އާޒިމާގެ މައްޗަށް އުފުލާފައިވާ ދައުވާގައި އޭނާގެ މައްސަލަ ކުރިއަށް ނުގެންދެވިގެން އުޅެނީ އޭރު ރާއްޖޭގައި ނޫޅުއްވާތީ ކަމަށް ޑީޖޭއޭއިން ބުނެފައި ވެއެވެ .އެމައްސަލައިގައި ކޯޓަށް ހާޒިރުވުމަށް އަންގާ ޗިޓު އޭނާއާއި ހަވާލު ކުރަން އޮތް ދުވަހު ރާއްޖޭގައި ނޫޅުއްވާކަން ކަމާބެހޭ އިދާރާތްތަކާއި ގުޅިގެން ބެލި ބެލުމުން އެނގިފައިވާ ކަމަށް އޭރު ޑީޖޭއޭއިން ބުންޏެވެ.

އެ މައްސަލައިގައި ދައުވާއާ ގުޅޭ ލިޔެކިޔުންތަކާއި މައްސަލައަށް ޖަވާބުދާރީ ވުމަށް ތައްޔާރުވާން ލިޔެކިޔުންތައް ކްރިމިނަލް ކޯޓުން މިދިޔަ ފެބްރުއަރީ މަހުގެ 21 ވަނަ ދުވަހު އޭނާއާއި ހަވާލު ކުރުމަށް މަސައްކަތް ކުރިއެވެ. އެކަމަކު އެ ލިޔުންތަކާއި ޗިޓުތައް ހަވާލު ނުކުރެވުނީ ރާއްޖެއިން ބޭރުގައި އުޅުއްވާތީއެވެ.

ރާއްޖެއެމްވީއަށް އެނގިފައިވާ ގޮތުގައި އާޒިމާ ރާއްޖެ ވަޑައިގެން އުޅުއްވާތާ ގާތްގަނޑަކަށް މަހެއްހާ ދުވަސް ވެއްޖެއެވެ.

އެކަމާއި ގުޅިގެން ޑީޖޭއޭގެ ތަރުޖަމާން ފައިސަލް އާދަމް ވިދާޅުވީ އާޒިމާގެ މައްސަލައަށް ވުރެ ކުރިން ދުވަސްވީ ބޮޑެތި މައްސަލަތައް އެބަހުރި ކަމަށާއި ކޯޓުގެ ފަނޑިޔާރުން މަދުވުމުގެ ސަބަބުން މައްސަލަތައް ލަސްވަމުން ދާކަމަށެވެ. އަދި އާޒިމާގެ މައްސަލައަކީ މިއަހަރު ހުށައެޅި މައްސަލައެއް ކަމަށާއި އާޒިމާގެ މައްސަލައިގައި ޗިޓު ހަވާލު ކުރުމުގެ މަސައްކަތް ކްރިމިނަލް ކޯޓުން ކުރަމުން އަންނަ ކަމަށް ވިދާޅުވިއެވެ.

އާޒިމާގެ މައްސަލައިގައި އަލުން ޗިޓު ހަވާލު ކުރުމަށް ކްރިމިނަލް ކޯޓުން މަސައްކަތް ފެށީ ކޮން ތާރީޚެއްގައި ކަމެއް އޭނާ ވިދާޅެއް ނުވިއެވެ.

އެނގިފައިވާ ގޮތުގައި ރާއްޖެއަށް އެނބުރި ވަޑައިގެންނެވުމަށްފަހު އާޒިމާ ދިރިއުޅުއްވަނީ ހުޅުމާލޭގައެވެ.

އާޒިމާ ރާއްޖެއިން ބޭރަށް ފުރާވަޑައިގެންފައިވަނީ ޕްރޮސެކިއުޓަރ ޖެނެރަލްގެ އޮފީހުން ކްރިމިނަލް ކޯޓަށް އޭނާގެ މަނީ ލޯންޑަރިންގެ ދައުވާ ކުރުމަށް ފޮނުވި ތަނާހެންނެވެ.

ރައީސް ޔާމީނަށް މަނީ ލޯންޑަރ ކުރުމަށް އެހީތެރިވެދިނުމާއި ދައުލަތުގެ އިދާރާއަކަށް ދޮގު މައުލޫމާތު ދިނުމުގެ ކުށުގެ ދައުވާގެ ތަހުގީގަށް އާޒިމާ ފުލުސް އޮފީހަށް ވެސް ހާޒިރުކޮށްފައި ވެއެވެ.

ރައީސް ޔާމިންގެ މައްޗަށް ވެސް ދައުވާ ކޮށްދޭން ފުލުހުން އެދުނީ އާޒިމާގެ މައްޗަށް ވެސް ދައުވާކޮށްދޭން އެދުނު ދުވަހުއެވެ. ޔާމިންގެ މައްޗަށް ދައުލަތުން އުފުލި ދައުވާއާ ގުޅިގެން އެމަނިކުފާނުގެ މައްޗަށް ޝަރީއަތް ދަނީ ހިންގަމުންނެވެ. އެދައުވާގެ ޝަރީއަތުގެ ދެ އަޑުއެހުމެއް ކްރިމިނަލް ކޯޓުގައި މިހާތަނަށް ވަނީ ބާއްވާފައެވެ. އޭގެ ފަހުން އެމައްސަލައިގެ ޝަރީއަތެއް ވެސް ބާއްވާފައެއް ނުވެއެވެ.

ރައީސް ޔާމީނާއި އާޒިމާގެ މައްސަލަތައް ނުބެލި ހުއްޓިފައި ވަނީ ކީއްވެތޯ އެހުމުން ފައިސަލް ވިދާޅުވީ އެހެން މައްސަލަތަކެކޭ އެއްގޮތަށް އެމައްސަލަތައް ވެސް ކުރިއަށް ދާކަމަށެވެ.