އެކްސިޑެންޓަށް ފަހު މެމްބަރު ހަސަންޓޭ މަޖިލީހަށް ނިކުންނަވައިފި
1 ޖުލައި 2019 | ހޯމަ 04:34އެކްސިޑެންޓްވެ އަނިޔާވެފައިވަނީ މިދިޔަ މަހުގެ 12 ވަނަ ދުވަހުގެ ރޭ
އިނގުރައިދޫ ދާއިރާގެ އެމްޑީޕީ މެމްބަރު ހަސަން މުހައްމަދު (ހަސަންޓޭ) ހޯމަ ދުވަހުގެ ޖަލްސާގައި
އެކްސިޑެންޓެއްގައި އަނިޔާވެވަޑައިގެންނެވި އިނގުރައިދޫ ދާއިރާގެ އެމްޑީޕީ މެމްބަރު ހަސަން މުހައްމަދު (ހަސަންޓޭ) ފަރުވާއަށްފަހު މަޖިލީހަށް ނިކުންނަވައިފިއެވެ.
ހަސަންޓޭ އެކްސިޑެންޓްވެ އަނިޔާވެފައިވަނީ މިދިޔަ މަހުގެ 12 ވަނަ ދުވަހުގެ ރޭ ކުއްލިއަކަށް މަގު ހުރަސްކުރަން އުޅުނު މީހެއްގެ ގައިން ނައްޓައިގެން އުޅުމުގެ ތެރޭގައި ކަހާލައިގެން ކަމަށް ފުލުހުން ވަނީ ބުނެފައެވެ.
އެހާދިސާއާއި ގުޅިގެން ހަސަންޓޭ ވަނީ ލަންކާއިން ވެސް އިތުރު ފަރުވާ ހޯއްދަވާފައެވެ. މި އެކްސިޑެންޓެއްގައި ހަސަންޓޭގެ ފަޔަށް އަނިޔާވެފައިވާއިރު ނިއްކުރި ވެސް ފަޅައިގެން ދިޔައެވެ.
ހޯމަ ދުވަހު ބޭއްވި މަޖިލީހުގެ ޖަލްސާގައި މަޖިލީހުގެ ރައީސް މުހައްމަދު ނަޝީދު ވަނީ ހަސަންޓޭ މަޖިލީހަށް އެނބުރި ވަޑައިގަތުމުން މަރުހަބާ ދަންނަވާފައެވެ.
މަޖިލިސް މެމްބަރަކަށް ވުމުގެ ކުރިން ހަސަންޓޭ ވަނީ އެމްޑީޕީގެ އިސް ސަފުގައި މަސައްކަތް ކުރައްވާފައެވެ.
