ނާސާއިން ޓައިޓަންގައި ދިރުމެއްވޭތޯ ބެލުމަށް ޑްރޯންއެއް ފޮނުވަނީ

އެމެރިކާގެ ޖައްވީ އިދާރާ ނާސާއިން މިހާރު ކުރަމުންދާ މަސައްކަތަކީ ސޯލާ ސިސްޓަމްގައި އިތުރު ދިރުމެއްވޭތޯބެލުމަށް ކުރާ މަސައްކަތުގެ ތެރެއިން ސެޓާންގެ އެންމެ ބޮޑު ހަނދު ކަމަށްވާ ޓައިޓަންއަށް ޑްރޯން ހެލިކަޕްޓަރެއް ފޮނުވުން ކަމަށް އެ އިދާރާއިން ބުނެފިއެވެ.

ޑްރެގަންފްލައިގެ ނަން ދީފައިވާ، ގޮލްފް ކާރޓެއްވަރުގެ އެ ޑްރޯން ލޯންޗުކުރަން ހަމަޖެހިފައި ވަނީ 2026 ގައެވެ. ނިއުކްލިއަރ ހަކަތައިގެ އެހީގައި މި ޑްރޯން ޓައިޓަންގެ ޖައްވުގެ ވައިގެ ފަށަލާގައި 100 މޭލަށް ދަތުރުކުރުމުގެ ގާބިލުކަން ހުންނާނެކަމަށް ނާސާއިން ބުނެއެވެ.

ސައިންސުވެރިން ބުނާ ގޮތުގައި ޓައިޓަންއަކީ ސޯލާ ސިސްޓަމްގައި ދުނިޔެއާ އެއްގޮތަށް ޖައްވީ ފަށަލައެއް ލެވިފައިވާ ހަމައެކަނި ހަނދެވެ. އަދި ދުނިޔެ އެންމެ ކުރިން އޮތްގޮތާ ޓައިޓަންއާ އެއްގޮތް ކަމަށްވެސް އެފަރާތްތަކުން ބުނެއެވެ.

ޓައިޓަންގައި ދުނިޔެއެކޭ އެއްގޮތަށް ކޯރުތައް އުފެދިފައި ވެއެވެ. ނަމަވެސް އެ ކޯރުތައް އުފެދިފައި ވަނީ ފެނުގެ ބަދަލުގައި ލިކުއިޑް މީތޭންއިންނެވެ. އަދި ބައެއް ސައިންސްވެރިން ވަނީ ދުނިޔޭގެ ފެނުގައި ދިރުންތައް އުޅޭ ގޮތަށް ޓައިޓަންގެ މެތޭން ކޯރުތަކުގައިވެސް ދިރުންތައް އުޅެދާނެ ކަމަށް ލަފާކޮށްފައެވެ.