އެސްޓްރަޒެނެކާގެ ކޮވިޑް ވެކްސިން ޓްރައަލްތައް އެމެރިކާގައި އަލުން ފަށާނީ ބައެއް ކަންކަން ބެލުމަށްފަހު

އެސްޓްރާޒެނެކާގެ ކޮވިޑް ވެކްސިންގެ ހިއުމަން ޓްރައަލްސް (އިންސާނުންގެ ގަޔަށް ޖަހައިގެން އަޖުމަ ބެލުމުގެ މަރުހަލާ) އެމެރިކާގައި އަލުން ފަށާނީ، އެ ގައުމުން ބައެއް ކަންކަން ބެލުމަށްފަހު ކަމަށް ރޮއިޓަރޒްއިން ރިޕޯޓްކޮށްފިއެވެ.

އެސްޓްރާޒެނެކާގެ ވެކްސިން ޓްރައަލްތައް މަޑުޖައްސާލީ، ވެކްސިން ޓެސްޓުކުރުމުގެ ތިންވަނަ މަރުހަލާގައި ބައިވެރިވި މީހަކު ގޮތްނޭނގޭ ގޮތަކަށް ބަލިވުމާ ގުޅިގެން ސެޕްޓެމްބަރު 9 ގައެވެ. އަދި އަލުން ޓްރައަލްތައް ފަށާފައިވަނީ ސެޕްޓެމްބަރު މަހުގެ 12 ގައެވެ. އެމެރިކާގައި ޓްރައަލް މަރުހަލާ ފެށުމަށް އަލުން ހުއްދަ ދޭނީ އެ ގައުމުގެ ފުޑް އެންޑް ޑްރަގް އެޑްމިނިސްޓްރޭޝަނުން ބަލަންޖެހޭ ކަންކަން ބެލުމަށް ފަހުގައި ކަމަށް ވެސް ރޮއިޓަރޒްއިން ވަނީ ރިޕޯޓްކޮށްފައެވެ.

އެސްޓްރާޒެނެކާއިން ބުނީ ޓްރެއަލްތައް ފަށާފައިވަނީ ވެކްސިން ބޭނުން ކުރުމަކީ ރައްކާތެރިކަމެއް ކަމަށް އެކަން ބެލި ފަރާތްތަކުން ކަނޑައެޅުމުން ކަމަށެވެ. ވެކްސިން ބޭނުން ކުރުން ރައްކާތެރިކަމަށް ކަނޑައަަޅާފައިވަނީ ބްރިޓަން މެޑިސިންސް ހެލްތު ރެގިޔުލޭޓަރީ އޮތޯރިޓީން ކަމަށް އެ ކުންފުނިން ބުނެއެވެ.

އެމެރިކާގައި ޓްރައަލްސްތައް ފަށާނެ ސީދާ ތާރީހެއް އެސްޓްރާޒެނެކާގެ ތަރުޖަމާނު ބުނެފައިވަނީ އަލުން ޓެރެއަލް ފެށުމަށް ދުނިޔޭގެ އެކި ގައުމުތަކުގެ ސަރުކާރު ތަކާއި ސިއްހީ އިދާރާތަކާއި އެކު މަސައްކަތްކުރަމުންދާ ކަމަށެވެ. އިނގިރޭސިވިލާތާއި، އެމެރިކާގެ އިތުރުން އެ ކުންފުނިން އަންނަނީ ދެކުނު އެފްރިކާ، އިންޑިއާ އަދި ބްރެޒިލްގައި ވެސް ޓްރައަލްސްތައް ފަށާފައެވެ. މީގެ ތެރެއިން އަލުން ޓްރައަލްސްތައް ފަށާފައިވަނީ އިނގިރޭސިވިލާތައި ބްރެޒިލްގައި އެކަންޏެވެ.

އެސްޓްރާޒެނެކާ އާއި އޮކްސްފޯރޑް ޔުނިވަރސިޓީ ގުޅިގެން ތަރައްގީ ކުރަމުން އަންނަ ވެކްސިނަކީ ކޮވިޑުން ރައްކާތެރިވާން ތަރައްގީ ކުރަމުން އަންނަ ވެކްސިންތަކުގެ ތެރެއިން ކާމިޔާބުވުމުގެ ފުރުސަތު އެންމެ ބޮޑު ވެކްސިނެވެ. މި ވެކްސިން އުފެއްދުމުގައި އިސްކޮށް ހަރަކާތްތެރިވި އޮކްސްފޯޑުގެ ސައިންސްވެރިންގެ ޓީމުން ބުނެފައިވަނީ، މި ވެކްސިން ކާމިޔާބު ވާނެ ކަމުގެ 80 އިންސައްތަ ޔަގީންކަން އެބައޮތް ކަމަށެވެ.