ރަށުގެ ތަރައްޤީއަށްޓަކައި ކުރެވޭ މަސައްކަތްތައް ބާރަށް ކުރިއަށްގެންދިއުމަށްޓަކައި ކައުންސިލުން ރައްޔިތުންނާ ގާތުން މަސައްކަތް ކޮށްދެއްވުމަށް ނިލަންދެއަތޮޅު ދެކުނުބުރި ރިނބުދޫ ކައުންސިލް މެންބަރުންނާއި ބައްދަލުކުރައްވައި ރައީސުލްޖުމްހޫރިއްޔާގެ ނައިބު ފައިޞަލް ނަސީމް އެދިވަޑައިގެންފިއެވެ.
ހޯމަ ދުވަހު މެންދުރުފަހު ރައީސުލްޖުމްހޫރިއްޔާގެ އޮފީހުގައި ބޭއްވެވި މި ބައްދަލުކުރެއްވުމުގައި ކައުންސިލުން ރަށުގެ ތަރައްޤީއަށް ރާއްވަވާފައިވާ މަސައްކަތްތަކާއި މިހާރު ކުރިއަށްދާ މަސައްކަތްތަކާއި ރަށަށް ބޭނުންވެފައިހުރި ކަންކަމުގެ މަޢުލޫމާތާއި ރަށުގެ ކުރިއެރުމަށް ހުރި ދަތިތައް ވަނީ ނައިބް ރައީސާއި ޙިއްޞާ ކުރައްވައިފައެވެ.އެގޮތުން ރަށުގެ ރައްޔިތުންނަށް ކުރިމަތިވެފައިވާ ގޯތި ގެދޮރުގެ މައްސަލައާއި، އިޖްތިމާޢީ މައްސަލަތައް ޙިއްޞާ ކުރެއްވިއެވެ.
އަދި އެކަމަށް އަވަސް ހައްލެއް ހޯއްދަވައިދެއްވުމަށް ނައިބް ރައީސްގެ އަރިހުން އެދިވަޑައިގެންނެވިއެވެ. މީގެއިތުރުން ފަތުރުވެރިކަން ރަށުގައި ތަރައްޤީ ކުރެވޭނެ މަގުފަހިކޮށްދެއްވުމަށް ކައުންސިލުން ވަނީ އެދިފައެވެ. ނައިބް ރައީސް ދެއްކެވި ވާހަކަފުޅުގައި، ރަށަށް ކުރިމަތިވެފައިވާ ގޯތި ގެދޮރުގެ މައްސަލައަށް ހައްލު ހޯދުމަށާއި ރަށަށް ކުރިމަތިވެފައިވާ އިޖްތިމާޢީ މައްސަލަތައް ހައްލުކުރުމަށް ކަމާބެހޭ ފަރާތްތަކާއިއެކު މަޝްވަރާކުރެއްވުމަށްފަހު އެކަންކަމަށް އަވަސް ޙައްލެއް ހޯއްދަވައިދެއްވަން މަސައްކަތް ކޮށްދެއްވާނެ ކަމަށް ވިދާޅުވިއެވެ.
މީގެ އިތުރުން ސުކޫލުގައި އުގަންނައިދިމުގެ ތެރެއިން ދަރިވަރުންނަށް އުފާވެރި ޙަޔާތެއް ބިނާކޮށްދިނުމަށް ބޭނުންވާ މަޢުލޫމާތު ދިނުމަށް ޚާއްޞަ އަހަންމިއްޔަތުކަމެއް ދެއްވުމަށް ނަޞޭޙަތްތެރިވެ ވަޑައިގެންނެވިއެވެ.
އަދި ދުޅަހެޔޮ ޞިއްޙަތެއްގައި ދެމިތިބުމަށްޓަކައި ބޭނުންވާ ރަނގަޅު އާދަތައް އަށަގެންނެވުމަށް އާންމުން ހޭލުންތެރި ކުރުވުމަށް އިތުރު ހަރަކާތްތައް ރާއްވަވައިގެން ކުރިއަށް ގެންދެވުމަށް ނައިބް ރައީސް އެދިވަޑައިގެންނެވިއެވެ.
