ޖިންސީ ކުށުގެ ޝިކާރައަކަށްވާ މީހުންގެ ތެރެއިން ނަފްސާނީ އެހީތެރިކަން ބޭނުންވާ މީހުންނަށް، ދައުލަތުގެ ހަރަދުގައި ކައުންސެލިންގ ދޭން ނިންމައިފިއެވެ.

ފެމިލީ ޕްރޮޓެކްޝަން ޔުނިޓުން ހޯމަ ދުވަހު ނެރުނު ނޫސް ބަޔާނެއްގައި ބުނެފައިވަނީ، ކައުންސެލިންގ ދޭނީ އިންސްޓިޓިއުޓް އޮފް މެންޓަލް ވެލްބީންގް މެދުވެރިކޮށް ކަމަށެވެ. މިއީ ޖިންސީ ކުށުގެ ގާނޫނުގެ ދަށުން ފެމިލީ ޕްރޮޓެކްޝަން އޮތޯރިޓީގެ މައްޗަށް ލާޒިމްކުރާ ކަމަކެވެ.

ޖިންސީ ކުށުގެ ގާނޫނު (ގާނޫނު ނަންބަރު 17/2014) ގެ 64 ވަނަ މާއްދާގައި ވަނީ އެ ގާނޫނުގައި ބަޔާންކޮށްފައިވާ ކުށެއްގެ ޝިކާރައަކަށްވީ މީހާއަށް، ނަފްސާނީގޮތުން ދިމާވެދާނެ އުނދަގުލެއް ލުއިކޮށްދިނުމަށާއި، ޒިންމާދާރު ރައްޔިތެއްގެ ގޮތުގައި ދިރިއުޅުމަށް ބޭނުންވާ ކައުންސެލިންގ އެ އޮތޯރިޓީގެ ހަރަދުގައި، އެ އޮތޯރިޓީން އިންތިޒާމްކުރާ އުސޫލެއްގެ މަތިން، އެ އޮތޯރިޓީން ކަނޑައަޅާ ތަނެއް ނުވަތަ ބަޔަކު މެދުވެރިވެގެން ހަމަޖައްސައިދޭންވާނެ ކަމަށެވެ. މި ގާނޫނު ރައްދުވާ އޮތޯރިޓީއަކީ ފެމިލީ ޕްރޮޓެކްޝަން އޮތޯރިޓީއެވެ.

ފެމިލީ ޕްރޮޓެކްޝަން އޮތޯރިޓީން ވަނީ ޖިންސީ ކުށުގެ ޝިކާރައަކަށްވާ މީހުންގެ ތެރެއިން ނަފްސާނީ އެހީތެރިކަން ބޭނުންވާ މީހުންނަށް ކައުންސެލިންގް ހިދުމަތް ދިނުމުގައި އަމަލުކުރާނެ އުސޫލް ގެޒެޓްކޮށްފައެވެ. އެ އުސޫލުގެ ތެރެއިން ނަފްސާނީ އެހީތެރިކަމަށް ބޭނުންވާ މީހުންނަށް ފެމިލީ ޕްރޮޓެކްޝަން އޮތޯރިޓީ އާއި އެ މީހަކު ދިރިއުޅޭ ރަށެއްގެ ފުލުހުން ނުވަތަ ހޮސްޕިޓަލް އަދި ޖެންޑަރ މިނިސްޓްރީ މެދުވެރިކޮށް ވެސް ހުށައެޅޭނެއެވެ.

ފެމިލީ ޕްރޮޓެކްޝަން އޮތޯރިޓީން ބުނެފައިވަނީ ކައުންސެލިންގ ދިނުމުގެ ހުރިހާކަމެއް ކުރިޔަށް ދާނީ އެ އޮތޯރިޓީގެ ބެލުމުގެ ދަށުން ކަމަށެވެ.

މީގެ ފަސް އަހަރު ކުރިން ގެޒެޓްކުރެވި، 2014 ވަނަ އަހަރުގެ މޭ 13 ވަނަ ދުވަހުން ފެށިގެން މި ގާނޫނަށް އަމަލުކުރަން ފަށާފައިވީ ނަމަވެސް، މިހާތަނަށް އެ ހިދުމަތް އެކި ސަބަބުތަކާއި ހުރެ ފޯރުކޮށްދީފައެއް ނުވެއެވެ.