ރިޔާސީ ކޮމިޝަންތަކުގެ ބިލް ރައީސް ސޯލިހު ތަސްދީގުކުރައްވައިފި

މިދިޔަ ހަފުތާގެ ތެރޭގައި ރައްޔިތުންގެ މަޖިލީހުން ފާސްކުރި ރިޔާސީ ކޮމިޝަންތަކަށް ބާރުދިނުމުގެ ބިލު ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ތަސްދީގު ކުރައްވައިފިއެވެ.

ރައީސް ސޯލިހު އުފެއްދެވި ގެއްލުވާލާފައިވާ މީހުންނާއި މަރާލާފައިވާ މީހުންގެ މައްސަލަތައް ތަހުގީގު ކުރާ ކޮމިޝަނާއި ކޮރަޕްޝަން އެންޑް އެސެޓްސް ރިކަވަރީ ކޮމިޝަނަށް ގާނޫނީ ބާރުވެރިކަން ދިނުމުގެ ބިލު ރައްޔިތުންގެ މަޖިލީހުން ފާސްކުރީ މިދިޔަ ބުދަ ދުވަހު އެވެ. އެ ބިލް ފާސްކޮށްފައިވަނީ އެ ވަގުތު ޖަލްސާއަށް ހާޒިރުވެ ތިއްބެވި މެމްބަރުންގެ ތެރެއިން 67 މެމްބަރުންގެ ތާއީދާއެކުގައެވެ.

ރިޔާސީ ކޮމިޝަންތަކަށް ބާރުދިނުމުގެ ބިލު ނިމިދިޔަ 18 ވަނަ ރައްޔިތުންގެ މަޖިލީހަށް ހުށައެޅި ނަމަވެސް، ހަތަރު ފަހަރު މަޖިލީހުގެ ތަޅުމަށް ފޮނުވުމުން ވެސް އެ ބިލް ވަނީ އެކި ސަބަބުތަކާއި ހުރެ ފާސްނުކޮށް ތަޅުމުން ބޭރުކޮށްލާފައެވެ.

މި ބިލާ ދެކޮޅު ހެދި ފަރާތްތަކުގެ ތެރޭގައި ސަރުކާރު ކޯލިޝަންގައި ހިމެނޭ ޕާޓީތަކަށް ނިސްބަތްވެވަޑައިގަންނަވާ މެމްބަރުން ވެސް ހިމެނިވަޑައިގަންނަވައެވެ. އެ ބިލް ފާސްކުރަން ދެކޮޅު ހެދި މެމްބަރުން އޭރު ވިދާޅުވަމުން ގެންދިޔައީ އެ ބިލުގައި ގާނޫނު އަސާސީއާ ފުށުއަރާ އެތައް ކަމެއް ހިމެނޭ ކަމަށް ބުނެފައިވެއެވެ.

ބިލު އަލުން ފާސްކޮށްފައިވަނީ ގިނަ އިސްލާހުތަކާއި އެކުގައެވެ. މި ބިލުގެ ތެރެއިން ރިޔާސީ ކޮމިޝަންތަކަށް ލިބިދޭ ބާރުތަކަގެ ތެރޭގައި ބަލާ ފާސްކުރަން މުއައްސަސާތަކަށް އެންގުމާއި، މީހުން ހާޒިރު ކުރަމާއި ބަޔާން ނެގުމުގެ ބާރު ހިމެނެއެވެ. ރިޔާސީ ކޮމިޝަންތަކަށް ބާރު ދިނުމަކީ ރައީސް ސޯލިހުގެ މުހިންމު ވައުދެކެވެ.