ބ. އަތޮޅު އިންނަފުށީގައި ރިސޯޓު ތަރައްގީކުރުމުގެ މަސައްކަތް މަޑުޖައްސާލުމަށް ޓޫރިޒަމް މިނިސްޓްރީން އަންގައިފިއެވެ.

ޓޫރިޒަމް މިނިސްޓްރީން ބޭއްވި ނޫސްވެރިންގެ ބައްދަލުވުމުގައި މިނިސްޓަރު އަލީ ވަހީދު ވިދާޅުވީ އިންނަފުއްޓަކީ ޕްރޮޕޯސަލް ހުށަހެޅުމުގެ ގަވައިދުގެ ދަށުން ދޫކޮށްފައިވާ ރަށެއްކަމަށާއި، އެމްއެމްޕީއާރްސީ އާ ގުޅުން ހުރި ރަށެއް ނޫން ކަމަށެވެ. 7 އޮގަސްޓް 2017 ގައި ސީމާ ޕްރައިވެޓް ލިމިޓެޑް އާ ހަވާލުކޮށްފައިވާ ރަށުގެ ކޮންސްޓްރަކްޝްން ޕީރިއެޑް ހަމަވާ ތާރީހަކީ 7 އޮގަސްޓް 2019 އެވެ. ނަމަވެސް އަދި ފަޅު ހިއްކުމުގެ މަސައްކަތް ކުރިޔަށް ނުދާކަމަށް އަލީ ވަހީދު ފާހަގަކުރެއްވި އެވެ.

އަލީ ވަހީދު ވިދާޅުވީ، ރަށް ހިމެނޭ ގޮއިދޫ އަތޮޅު ސަރަހައްދަކީ ގުދުރަތީ ގޮތުން ހާއްސަ ސިފަތަކެއް ލިބިގެންވާ ސަރަހައްދެއްކަމަށާއި އެއީ ޖަޒީރާވަންތަ ވަރަށް ރީތި އަތޮޅެއްކަމަށެވެ.

އަލީ ވަހީދު ވިދާޅުވީ، އިންނަފުށީގެ ކޮންސްޓްރަކްޝްން ޕީރިއެޑްގެ މުއްދަތު އޮގްސްޓަށް ހަމަވާއިރު، އެ މުއްދަތު އިތުރުކޮށްދޭން އެދިފައިވާކަމަށެވެ. ނަމަވެސް މުއްދަތު އިތުރު ނުކޮށްދިނުމަށް ނިންމާފައިވާކަމަށް އަލީ ވަހީދު ވިދާޅުވި އެވެ.

މިނިސްޓަރ ވިދާޅުވީ، ސަރުކާރުގެ އަމާޒަކީ ޖަޒީރާ ރަށްތައް ހިމާޔާތްކޮއްގެން ސަސްޓެއިންބަލް ޓޫރިޒްމް ގެނައުންކަމަށާއި ތަންތަން ހިމާޔަތްވާ ގޮތްނޫން ގޮތަކަށް ތަރައްގީ ނުކުރުމަށް ރައީސް ވަނީ އިލްތިމާސް ކުރައްވާފައިވާކަމަށެވެ.