ޖަލުގެ ތެރޭގައި ހުރެގެން ނުވާނެ ސާމާނު މާފުށީ ޖަލުން ހޯދިފައިވޭ: ހޯމް މިނިސްޓްރީ
23 ޖޫން 2019 | އާދީއްތަ 14:50އެތަކެތި މިހާރު ވަނީ މޯލްޑިވްސް ކަރެކްޝަނަލް ސާރވިސްގެ ބެލުމުގެ ދަށަށް ގެންދެވިފައި
މާފުށީ ޖަލު
ކ. މާފުށީ ޖަލުގައި ހިންގި ބަލައި ފާސްކުރުމުގެ އޮޕަރޭޝަންގައި ޖަލުތެރޭގައި ހުރެގެން ނުވާނެ ސާމާނު ހޯދިފައިވާ ކަމަށް ހޯމް މިނިސްޓްރީން ބުނެފިއެވެ.
ހޯމް މިނިސްޓްރީން އާދިއްތަ ދުވަހުގެ ރޭ ކޮށްފައިވާ ޓްވީޓްގައި ވަނީ މާފުށީ ޖަލުގައި ހިންގި ބަލައި ފާސްކުރުމުގެ އޮޕްރޭޝަން މިއަދަށް ނިންމާލާފައިވާ ކަމަށާއި އޮޕްރޭޝަން ކުރިއަށް ދިޔައީ އަމާން ކަމާއި އެކުގައި ކަމަށެވެ.
އަދި ޖަލުތެރޭގައި ހުރެގެން ނުވާނެ ސާމާނު މި އޮޕްރޭޝަންގައި ހޯދިފައިވާ ކަމަށާއި އެތަކެތި މިހާރު ވަނީ މޯލްޑިވްސް ކަރެކްޝަނަލް ސާރވިސްގެ ބެލުމުގެ ދަށަށް ގެންދެވިފައި ކަމަށެވެ.
މާފުށީ ޖަލު ބަލައި ފާސްކުރުމަށް ހޯމް މިނިސްޓްރީން ނިންމާފައިވަނީ މާފުށީ ޖަލުގެ ރިމާންޑް މީހުން ބަންދުކޮށްފައިވާ ޔުނިޓްގެ ކެމެރާތައް ތަޅާލައި އެ ޔުނިޓްގައި ޖަލުގެ ސަލާމަތަށް ނުރައްކާވާނެ ފަދަ ތަކެތި ގެންގުޅޭ ކަމަށް ބެލެވޭތީ ކަމަށް ހޯމް މިނިސްޓްރީން ވަނީ ބުނެފައެވެ.
އެ މިނިސްޓްރީން ނެރުނު ބަޔާނެއްގައި ބުނެފައިވަނީ ޖޫން 20 ވަނަ ދުވަހު ހިނގާދިޔަ ހަމަނުޖެހުމަށް ފަހު ބައެއް ބަންދުގެ މީހުންގެ މެދުގައި އުފެދިފައިވާ ނުތަނަވަސް ކަމުގެ ސަބަބުން ޖަލުގެ ކަންކަން އާންމު ހާލަތަށް ގެނައުމަށް ގޮންޖެހުމާއި ކުރިމަތިވެފައިވާ ކަމަށެވެ.
މިނިސްޓަރ އޮފް ހޯމް އެފެއާޒްގެ އިރުޝާދުގެ މަތިން ކޮމިޝަނަރ އޮފް ޕްރިޒަންސް އާއި ޑެޕިއުޓީ ކޮމިޝަނަރ އޮފް ޕްރިޒަންސްއާ އިންސްޕެކްޓަރ އޮފް ކަރެކްޝަނަލް ސަރވިސްގެ ހާޒިރުގައި ފުރިހަމައަށް އޯޑިއޯ އަދި ވީޑިއޯ ރިކޯޑް ކުރެވިގެން ބަލާ ފާސްކުރުމުގެ ކަންތައްތައް ކުރިއަށް ގެންދިޔުމަށް ނިންމާފައިވާ ކަމަށް ބަޔާނުގައިވެއެވެ.
މި އޮޕަރޭޝަން ކުރިއަށް ގެންދާނީ ޤާނޫނުތަކާއި ޤަވާއިދުތަކާއި ހެދިފައިވާ އުސޫލުތަކާއި ޖަލު އޮފިސަރުން ހިފަހައްޓަން ޖެހޭ ސުލޫކީ އަދި އަހްލާޤީ މިންގަނޑުތަކާއި އެއްގޮތްވާ ގޮތުގެ މަތިންކަމާއި ބާރުގެ ބޭނުން ކުރާނީ ކޮންމެހެން ބޭނުންކުރަން ޖެހިއްޖެ ހާލަތެއްގައި އެ ހާލަތާއި އެކަށީގެންވާ އެންމެ ދަށް މިންވަރަށްކަން މިނިސްޓްރީން ކަށަވަރު ކުރާނެ ކަމަށް ވަނީ ބުނެފައެވެ.
މި އޮޕަރޭޝަން ގާތުން ބެލުމުގެ ފުރުސަތު ހިއުމަން ރައިޓްސް ކޮމިޝަން އޮފް ދަ މޯލްޑިވްސް އިން ބޭނުންވާނަމަ އެ ފުރުސަތު ފަހިކޮށްދޭނެ ކަމަށް ހޯމް މިނިސްޓްރީން ވަނީ ބުނެފައެވެ.
ޖޫން 20 ވަނަ ދުވަހު މާފުށީ ޖަލުގައި ހިނގާ ދިޔަ ހާދިސާއާ ގުޅިގެން އެ މިނިސްޓްރީން ގެންގުޅޭ ސިޔާސަތަކީ ސިއްރު ކުރުމުގެ ސަޤާފަތް ނޫން ކަމަށް ވެސް އެ މިނިސްޓްރީން ބުނެއެވެ.
