އަލިފުއްޓާއި ވެލިދޫ ސިއްހީ މަރުކަޒު ހޮސްޕިޓަލަކަށް ބަދަލުކުރުމުގެ ޑިޒައިނިންގ މަސައްކަތް ބަޔަކާ ހަވާލުކޮށްފި
ރ އަލިފުށީ ސިއްހީމަރުކަޒުގެ މަސައްކަތް ހަވާލުކުރީ އެމްޓީސީސީއާ
ހެލްތު މިނިސްޓްރީގައި އޮތް ރަސްމިއްޔާތުގެ ތެރެއިން
ރ. އަލިފުއްޓާއި ނ. ވެލިދޫ ސިއްހީ މަރުކަޒު ހޮސްޕިޓަލަކަށް ބަދަލުކުރުމަށް އަޅަންޖެހޭ އިމާރަތް ޑިޒައިންކޮށް ބިލް އޮފް ކުއެންޓިޓީ (ބީއޯކިއު) ތައްޔާރުކޮށްދިނުމަށް ބަޔަކާ ހަވާލުކޮށްފިއެވެ.
އާދިއްތަ ދުވަހު މިނިސްޓްރީ އޮފް ހެލްތުގައި އޮތް ރަސްމިއްުޔާތެއްގައި ރ. އަލިފުށީ ސިއްހީ މަރުކަޒު ހޮސްޕިޓަލަކަށް ބަދަލު ކުރުމަށް އަޅަންޖެހޭ އިމާރަތް ޑިޒައިން ކުރުމާއި، އެ އިމާރާތުގެ އާކިޓެކްޗަރަލް އަދި ސްޓްރަކްޗަރަލް ސާރވިސަސް ކުރެހުންތަކާއި ބީއޯކިއު ތައްޔާރު ކުރުމަށް އެމްޓީސީސީއާ ހަވާލުކޮށްފައިވާއިރު، މި މަޝްރޫއުގައި ހެލްތު މިނިސްޓްރީން ސޮއިކުރެއްވީ މިނިސްޓަރ އޮފް ހެލްތު އަބްދުﷲ އަމީނެވެ. އަދި އެމްޓީސީސީގެ ފަރާތުން ސޮއިކުރެއްވީ އެ ކުންފުނީގެ ޗީޕް އޮޕަރޭޓިންގ އޮފިސަރ ޝާހިދު ހުސައިން މޫސާއެވެ.
މި މަޝްރޫއު ނިންމުމަށް އެމްޓީސީސީއަށް 28 ދުވަސް ދީފައިވާއިރު، މަޝްރޫއުގެ އަގަކީ 237،613.10 (ދެލައްކަ ތިރީސް ހަތް ހާސް ހަ ސަތޭކަ ތޭރަ ރުފިޔާ ދިހަ ލާރި ) އެވެ.
އޭގެ އިތުރުން، ނ ވެލިދޫ ސިއްހީ މަރުކަޒު ހޮސްޕިޓަލަކަށް ބަދަލުކުރުމުގެ މަޝްރޫއު އިޕޮކް އެސޯސިއޭޓްސް ޕްރައިވެޓް ލިމިޓެޑާއި ހަވާލު ކޮށްފައިވާއިރު، މި މަޝްރޫއުގެ އަގަކީ 96،000 ރުފިޔާ (ނުވަދިހަ ހަ ހާސް ރުފިޔާ) އެވެ. އަދި މަޝްރޫއު ނިންމަން އެ ކުންފުންޏަށް 25 ދުވަހުގެ މުއްދަތެއް ދީފައިވާއިރު، ބ އަތޮޅު ހޮސްޕިޓަލުގެ އެކްސްޓެންޝަން އިމާރަތް ޑިޒައިން ކުރުމުގެ މަސައްކަތް ވެސް އެ ކުންފުންޏާ ވަނީ ހަވާލުކޮށްފައެވެ. އެގޮތުން އެ މަޝްރޫއު ނިންމަން 35 ދުވަހުގެ މުއްދަތެއް ދީފައިވާއިރު، އަގަކީ 120،000 (އެއްލައްކަ ވިހި ހާސް ރުފިޔާ) ރުފިޔާއެވެ.
ރ. އަލިފުއްޓާއި ނ. ވެލިދޫ ސިއްހީ މަރުކަޒު ހޮސްޕިޓަލަކަށް ބަދަލުކުރެވުމުން އެ ރަށްރަށުގައި ދަރަޖަ 1 ގެ ހޮސްޕިޓަލުތައް ޤާއިމުކުރެވި، އަންހެނުންގެ ޚާއްސަ ޑޮކްޓަރުންގެ ޚިދުމަތާއި، ކުޑަކުދިންގެ ބަލިތަކަށް ޚާއްސަ ޚިދުމަތްތަކާއި، ހޭނައްތާ ޑޮކްޓަރުންނާއި، އެތެރެހަށި އަދި އޮޕަރޭޝަން ޑޮކްޓަރުންގެ ޚިދުމަތްވެސް އެ ހޮސްޕިޓަލުތަކުން ލިބިގެންދާނެ ކަމަށް ހެލްތު މިނިސްޓްރީން މައުލޫމާތުދެއެވެ.
އޭގެ އިތުރުން، ދަތުގެ ޚާއްސަ ފަރުވާ އާއި، 4 އެނދުގެ ޑަޔަލިސިސް ޚިދުމަތާއި، އެކްސްރޭ، ލޭބަރ ރޫމް އަދި އަލްޓްރާ ސައުންޑް ސްކޭން ފަދަ ޚިދުމަތްތައްވެސް ފެށިގެންދާއިރު، ހޮސްޕިޓަލުގައި 5 ވާރޑާއި، 6 ޕްރައިވެޓް ރޫމް ހިމެނޭނެ ކަމަށް ވެސް ހެލްތު މިނިސްޓްރީން ވަނީ ބުނެފައެވެ.
ރަށްރަށުގެ ސިއްހީ ޚިދުމަތްދޭ ތަންތަން ތަރައްޤީ ކުރުމަށް ސަރުކާރުން މަސައްކަތްތަކެއް ކުރަމުންދާއިރު، ސިއްހީ ޚިދުމަތްތައް އެއް ތަނަކަށް ތޮއްޖެހިފައި އޮންނަ އޮތުން ބަދަލު ކުރުމަކީ މި ސަރުކާރުގެ އަމާޒެއް ކަމަށާއި، އެގޮތުން މާލެއާ އެއް ފެންވަރެއްގައި ހުރިހާ ޚިދުމަތެއް ލިބޭ ގޮތަށް 10 ރަށެއްގައި ހޮސްޕިޓަލުތައް ތަރައްޤީ ކުރުމަށް ވިސްނަވާ ކަމަށް ހެލްތު މިނިސްޓަރ ވިދާޅުވެފައި ވެއެވެ.
