ޖަލު އޮފިސަރުން ޑިއުޓީއަށް ނުނިކުމެ ހަޅުތާލުކުރާ ވާހަކަ ކަރެކްޝަންސްއިން ދޮގުކޮށްފި

މާފުށީ ޖަލު އޮފިސަރުންނާއި ޤައިދީންނާ ދެމެދުގައި އުފެދުނު ހަމަނުޖެހުންތަކާ ގުޅިގެން ޖަލު އޮފިސަރުން ޑިއުޓީއަށް ނުނިކުމެ ހަޅުތާލުކުރާ ކަމަށް ދެކެވޭ ވާހަކަތައް މޯލްޑިވްސް ކަރެކްޝަނަލް ސާރވިސް އިން ދޮގުކޮށްފިއެވެ.

އާދިއްތަ ދުވަހު "ރާއްޖެޓީވީއަށް" މައުލޫމާތު ދެއްވަމުން ކަރެކްޝަންސްގެ މީޑިއާ އޮފިސަރ އަހުމަދު ނަސީމް ވިދާޅުވީ، ޖަލު އޮފިސަރުން ހަޅުތާލުކުރަމުންދާ ކަމަށް ދެކެވޭ ވާހަކައަކީ ދޮގެއް ކަމަށާއި، އޮފިސަރުން މިއަދުވެސް ޑިއުޓީއަށް ނުކުންނެވި ކަމަށެވެ. އަދި އެފަދަ މައްސަލައެއް ފާހަގަވެފައި ނުވާ ކަމަށް ވެސް ނަސީމް ވިދާޅުވިއެވެ.

މީގެ ދެ ދުވަސްކުރިން މާފުށީ ޖަލުގައި ހިނގާދިޔަ ހަމަނުޖެހުމުގައި ގައިދީއަކު އޮފިސަރަކަށް ހަމަލާދީ ޒަހަމްކޮށްލުމާ ގުޅިގެން ޖަލު އޮފިސަރުން އެކަމާ ހިތްހަމަ ނުޖެހިގެން ހަޅުތާލު ކުރަމުންދާ ކަމަށް މީސްމީޑިއާގައި ދެކެވެމުންދާ ވާހަކަތައް ކަރެކްޝަނުން ދޮގު ކޮށްފައިވާއިރު، އެ ހަމަނުޖެހުންތަކާއި ގުޅިގެން ހާދިސާ ތަހުޤީގުކޮށް ނިމެންދެން އެމަޖެންސީ ސަޕޯރޓް ގްރޫޕްގެ ކޮމާންޑަރަކު ވެސް ސަސްޕެންޑް ކުރުމަށް ވަނީ ނިންމާފައެވެ.

ހަމަނުޖެހުންތަކާ ގުޅިގެން ޤައިދީންނަށް ވެސް އެކިވަރުގެ އަނިޔާތައް ލިބިފައިވާ ކަމަށް ރިޕޯރޓު ކުރެވިފައިވާއިރު، މި މައްސަލައިގައި ހާލަތާ ނުބައްދަލު ބާރު ބޭނުންކޮށްފައިވާ ކަން ގަބޫލުކުރައްވާ ކަމަށާއި، އެ މީހުންނާ ދެކޮޅަށް މައްސަލައިގެ ފުރިހަމަ ތަހުގީގެއް ހިންގުމަށް ފަހު ފިޔަވަޅު އަޅުއްވާނެ ކަމަށް ކޮމިޝަނަރ އޮފް ޕްރިޒަންސް އަބްދުﷲ މުނާޒް ވެސް ވަނީ ވިދާޅުވެފައެވެ.