ޖަލުގައި އަނިޔާކުރި މައްސަލައާ ގުޅިގެން ކަމާ ބެހޭ ފަރާތްތަކުގެ އިސްވެރިން ކޮމެޓީއަށް ހާޒިރުކުރަނީ
22 ޖޫން 2019 | ހޮނިހިރު 08:33އިސްވެރިން ހާޒިރު ކުރާނެ ވަކި ދުވަހެއް ނުނިންމާ
ކޮމެޓީގެ ބައްދަލުވުމުގެ ތެރެއިން
ކ. މާފުށީ ޖަލުގައި ގައިދީންނަށް އަނިޔާކުރި މައްސަލައާ ގުޅިގެން ދައުލަތުގެ ކަމާ ބެހޭ ފަރާތްތަކުގެ އިސްވެރިން ރައްޔިތުންގެ މަޖިލިހުގެ ހިއުމަން ރައިޓްސް އެންޑް ޖެންޑަރ ކޮމެޓީ އަށް ހާޒިރުކުރަން ނިންމައިފި އެވެ.
ހޮނިހިރު ދުވަހު ބޭއްވި ކޮމެޓީގައި ހާޒިރުކުރުމަށް ނިންމީ ކޮމިޝަނަރ އޮފް ޕްރިޒަންސް އާއި މޯލްޑިވްސް ކަރެކްޝަނަލް ސާވިސްގެ އިސްވެރިންގެ އިތުރުން ހޯމް މިނިސްޓްރީ އިސްވެރިންނާއި ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް) ގެ މެމްބަރުންނެވެ. ނަމަވެސް ހާޒިރު ކުރާނެ ވަކި ދުވަހެއް ކޮމެޓީން ނިންމާފައެއް ނުވެއެވެ.
މި ކޮމެޓީގެ ބައްދަލުވުމުގައި މަކުނުދޫ ދާއިރާގެ މެމްބަރު މުހައްމަދު ރާއީ ވިދާޅުވީ މާފުށި ޖަލުގެ ހަމަނުޖެހުންތަކުގައި ހޯމް މިނިސްޓްރީން ނެރުނު ބަޔާނުގައި ހާލަތާއި ނުބައްދަލު ބާރުގެ ބޭނުންކޮށްފައިވާކަން ބަޔާންކޮށްފައި އޮތުމަކީ މި ސަރުކާރުން ރައްޔިތުންނަށް ދޮގު ހަދާ އޮޅުވާނުލާނެ ކަމުގެ އެއް ހެކި ކަމަށެވެ. އަދި ހުރިހާ މަސައްކަތްތަކެއް ވެސް ކުރިއަށް ގެންދަނީ އިންސާފާއި، ދެ ފުށް ފެންނަ ނިޒާމެއްގެ ތެރެއިން ކަމަށް މެމްބަރު ރާއީ ވިދާޅުވިއެވެ.
މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ ވިދާޅުވީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ވައުދުފުޅާ އެއްގޮތަށް ޖަލުތަކުގެ އޮޑިޓް ރިޕޯޓެއް އެކުލަވާލެވިފައިވާ ކަމަށާއި، އެންމެ މުހިންމު ކަމަކީ އެރިޕޯޓުގައި ހިމަނަފައިވާ ކަންކަމަށް މަޖިލީހުން ގޮތެއް ނިންމުން ކަމަށެވެ.
މެމްބަރު އިމްތިޔާޒު ވިދާޅުވީ މިއީ ވަރަށް ސީރިއަސް މައްސަލައެއް ކަމަށާއި، ދައުލަތުގެ ބެލުމުގެ ދަށުގައި ހުރި މީހަކަށް އަނިޔާ ލިބުމަކީ ބަލައިގަނެވޭނެ ކަމެއް ނޫން ކަމަށެވެ.
މާފުށީ ޖަލުގައި ހަމަނުޖެހުން ހިނގީ ގައިދީއަކު ޖަލު އޮފިސަރަކަށް ހަމަލާ ދިނުމުންނެވެ. އެ އޮފިސަރު މާލެ ގެނެސް އައިޖީއެމްއެޗްގައި ވަނީ ފަރުވާ ހޯދާފައެވެ. މީގެ އިތުރުން ނަހަމަ ބާރުގެ ބޭނުންކޮށް ގައިދީންނަށް އަނިޔާކޮށްފައިވާކަމުގެ ތަހުމަތުތައް ދަނީ ކުރަމުންނެވެ.
