އިރާނުން އެމެރިކާގެ ޑްރޯން ވައްޓާލި މައްސަލައާއި ގުޅިގެން ފުލައިޓްތަކުގެ ރޫޓް ބަދަލުކޮއްފި

ޖޫން 20 ވަނަ ދުވަހު އީރާނުގެ ވައިގެ ސަރަހައްދަށް ވަން އެމެރިކާގެ ޖާސޫސީ ޑްރޯން ވައްޓާލި ހާދިސާއާއި ގުޅިގެން ގިނަ އެއާލައިން ތަކުން ފްލައިޓް ދަތުރުކުރާ ރޫޓް ބަދަލުކޮށްފިއެވެ.

އެމެރިކާގެ ފެޑެރަލް އޭވިއޭޝަން އެޑްމިނިސްޓްރޭޝަން އިން ވަނީ އެމެރިކާގެ އެއާލައިން ތަކަށް ޕާރސިއަން ގަލްފް އަދި ގަލްފް އޮފް އޮމާންގެ މަތިން އުދުހުން މަނާކޮށް އިމެޖެންސީ އޯޑަރެއް ނެރެފައެވެ.

އިރާނުގެ އިސްލާމިކް ރިވޮލުޝަނަރީ ގާޑް ކޯޕްސް އިން ބުރާސްފަތިދުވަހު ޑްރޯން ވައްޓާލުމާގުޅިގެން ވައިގެ މަގުން ދަތުރުކުރުމުގެ މަގު ބަދަލު ކޮށްފައިވާ އެއާލައިން ތަކުގެ ތެރޭގައި ހިމެނެނީ ކެތޭ ޕެސިފިކް، އެމިރޭޓްސް، ފްލައި ޑުބާއީ، ބްރިޓިޝް އެއާވޭސް، ކޭއެލްއެމް، ސިންގަޕޯރ އެއާލައިންސް އަދި ލުފްތަންސާ އެވެ.

އެމެރިކާގެ ޑްރޯން އީރާނުގެ ވައިގެ ސަރަހައްދަށް ވަން ތާ ހަވަރަކަށް މިނެޓުގެ ތެރޭގައި އެބޯޓު ވައްޓާލިކަމަށް ރިވޮލިއުޝަނަރީ ގާޑުންގެ އޭރޯ ސްޕޭސް ކޮމާންޑުން ވަނީ ބުނެފައިވެއެވެ.

އީރާނުގެ ވައިގެ ސަރަހައްދަށް ވަން ޑްރޯންއަކީ އެމެރިކާގެ ނޯތު ގްރުމަން ކޮޕަރޭޝަން އިން އުފައްދާ "ގްލޯބަލް ހާކް މަރުކާގެ އެމްކިޔޫ ފޯ ސީ ޓްރައިޓޮން" ގެ ހައިޓެކް ޑްރޯން އެއްކަމަށްވެއެވެ.