"ޖިހާދީ ޖެކް" އަށް އޭނާގެ މައިންބަފައިން ފަންޑު ކުރިކަމަށް ސާބިތުވެއްޖެ
22 ޖޫން 2019 | ހޮނިހިރު 05:40އިތުރު ދެ ދައުވާއެއް ސާބިތުނުވާ ކަމަށް ނިންމާފައިވޭ
ޖިހާދީ ޖެކް، އަސްލު ނަމުން ނަމަ ޖެކް ލެޓްސް ސީރިޔާގައި
އިސްލާމް ދީން ގަބޫލުކޮށް އައިސިސްއާ ގުޅުނު އިނގިރޭސިވިލާތުގެ ޒުވާނެއް ކަމުގައިވާ "ޖިހާދީ ޖެކް" އަށް އޭނާގެ މައިންބަފައިން ފައިސާ ފޮނުވުމުން، ޓެރަރިޒަމްއަށް ފަންޑުކުރުމުގެ ކުށް އެ މީހުންގެ މައްޗަށް ސާބިތުވެއްޖެއެވެ.
ޖެކް ލެޓްސް ނަމަކަށް ކިޔާ ޒުވާނާގެ މަންމަ ސެލީ ލޭން އަދި ބައްޕަ ޖޯން ލެޓްސްގެ މައްޗަށް ސާބިތުވީ، ޖެކް ސީރިޔާގައި ހުއްޓާ 223 ޕައުންޑް ފޮނުވި މައްސަލައެކެވެ. އަދި އެ މީހުން އެ ފައިސާ ފޮނުވީ އޭނާ އައިސިސްއާ ގުޅިފައިވާ ކަން އެނގިހުރެ ކަމަށް ކޯޓުން ނިންމާފައިވެއެވެ.
ޖެކްގެ މައިންބަފައިންގެ މައްޗަށް އުފުލުނު އިތުރު ދައުވާތައް އެކަށީގެންވާ ހެކި ނުލިބުމާއި ގުޅިގެން ދެން އުފުލި ދެ ދައުވާ އެ މީހުންގެ މައްޗަށް ސާބިތެއް ނުވެއެވެ. އެ ދެމީހުންނަށް 15 އަހަރުގެ ޖަލު ހުކުމެއް އިއްވި ނަމަވެސް، އެ ހުކުމް ވަނީ އަހަރު ދުވަހަށް ސަސްޕެންޑްކޮށްފައެވެ. އެ ދެމީހުން ފައިސާ ފޮނުވާފައިވަނީ، އެހެން އެކަން ކޮށްފި ހާލަތެއްގައި ދައުވާ އުފުލާނެ ކަމަށް ފުލުހުން ބުނެފައި ވަނިކޮށެވެ.
އެ ދެމީހުންނަށް އިއްވި ހުކުމް އަޑުއިއްވަމުން ގާޒީ ބުނީ، ދަރިން ދެކެ ލޯބިވުމަކީ މައްސަލައެއް ނޫން ކަމަށް ވިޔަސް، މި ހާލަތުގައި ކަނަކަން ކޮށްފައިވަނީ ގާނޫނާ ޙިލާފަށް ކަމަށެވެ. ކޯޓުން ބޭރުގައި ވާހަކަދައްކަމުން އޭނާގެ ބެލެނިވެރިން ބުނީ، ދެން ހުރި ދައުވާތައް ސާބިތު ނުވުމުން ދޭހަކޮށްދެނީ އެ މީހުން ދެއްކި ވާހަކަތައް ޖޫރީން ބަލައިގެންފާ ކަމަށެވެ.
"ޖިހާދީ ޖެކް" ގެ ނަމުން މަޝްހޫރުވެފައިވާ ޒުވާނާ މިހާރު ހުރީ ކުރުދީންގެ ލަޝްކަރެއް ކަމުގައިވާ، ވައިޕީޖީގެ ޖަލެއްގައި ބަންދުކޮށްފައެވެ. އޭނާ އަނބުރާ ގައުމަށް ގެންނަން މައިންބަފައިން ބޭނުން ވިޔަސް، އިނގިރޭސި ސަރުކާރުން ވަނީ އެކަމާއި މެދު ގޮތެއް ނިންމަން ދެކޮޅު ހަދާފައެވެ.
