ކުވެއިތުގެ ބޮޑުވަޒީރާއި އޭނާގެ ކެބިނެޓް އިސްތިއުފާދީފި

ކުވެއިތުގެ ޤާނޫނު ހަދާ މަޖިލީހާއި ދެމެދު އުފެދުނު ޚިޔާލުތަފާތުވުންތަކުގައި އެގައުމުގެ ބޮޑުވަޒީރާއި އޭނާގެ ކެބިނެޓް އިސްތިއުފާދީފި އެވެ.

ކުވެއިތުގެ ބޮޑުވަޒީރު ޝެއިޚް ޖާބިރު އަލް މުބާރަކް އަލް ސަބާހްގެ އިސްތިއުފާ، އެޤައުމުގެ އަމީރަށް ހުށަހަޅުއްވާފައި ވަނީ ހޯމަ ދުވަހުގެ މެންދުރުފަހުގެ ވަގުތެއްގައެވެ. ބޮޑުވަޒީރު ޝެއިޚް ޖާބިރާއި އޭނާގެ ކެބިނެޓްގެ އިސްތިއުފާ ކުވެއިތުގެ އަމީރު ޝެއިޚް ސަބާޙް އަލް އަހުމަދު އަލް ޖާބިރު އަލް ސަބާޙް ވަނީ ގަބޫލު ކުރައްވާފައެވެ.

ގަލްފްގެ ގައުމެއް ކަމަށްވާ ކުވެއިތުގެ ބޮޑުވަޒީރު އިސްތިއުފާ ދެއްވާފައި ވަނީ، އެޤައުމުގެ މިނިސްޓަރ އޮފް ސްޓޭޓް ފޯ ކެބިނެޓް އެފެއަރޒް އަދި ވަގުތީ ގޮތުން އެގައުމުގެ އިންފޮމޭޝަން މިނިސްޓްރީ ހިންގެވުމާއި ހަވާލުވެވަޑައިގެން ހުންނެވި ޝެއިޚް މުޙައްމަދު އަބްދުﷲ އަލް މުބާރަކް އަލް ސަބާހް އާއިދެކޮޅަށް އިތުބާރު ނެތް ކަމުގެ ދެ މައްސަލައެއްގެ ވޯޓު، އަންގާރަ ދުވަހާއި ބުދަ ދުވަހު ބާއްވާ ގާނޫނު ހަދާ މަޖިލީހުގެ ޖަލްސާއަށް ތާވަލް ކޮށްފައިވަނިކޮށް ކަމަށް ކުވެއިތު ނިއުސް އޭޖެންސީ (ކޭޔޫއެންއޭ) އިން ރިޕޯޓް ކުރެއެވެ.

ޤާނޫނު ހަދާ މަޖިލީހުގެ ޖަލްސާގެ އެޖެންޑާގައިވާ ގޮތުން، ޤާނޫނު ހަދާ މަޖިލީހުގެ ޖަލްސާ އަށް ޝެއިޚް މުޙައްމަދު އަބްދުﷲގެ އިތުބާރު ނެތް ކަމުގެ ވޯޓަށް އަހަނީ، ތަފާތު އެކި މައްސަލަތަކާއި ގުޅިގެން އޭނާގެ މައްޗަށް އިތުބާރު ނެތް ކަމުގެ ވޯޓެއް ނެގުމަށް ޤާނޫނު ހަދާ މަޖިލީހުގެ 10 މެމްބަރަކު ހުށަހަޅާފައިވާ ހުށަހެޅުމަކާއި ގުޅިގެންނެވެ.

އެޖަލްސާ އަށް އެޖެންޑާ ކޮށްފައިވާ މައްސަލަތަކުގެ ތެރޭގައި ޒުވާނުންނާއި ކުޅިވަރު، އަދި ޙާއްސަ އެހީއަށް ބޭނުންވާ މީހުންނަށް ޙާއްސަ ބޯހިޔާވަހިކަމާއި، ވިޔަފާރީގެ މާހައުލެއް ގާއިމް ކުރުމާއި، އަންހެނުންނާއި އާއިލީ ކަންކަމާއި ތިމާވެށްޓާއި ގުޅޭ މައްސަލަތަކަށް ހާއްސަ ވަގުތީ ކޮމިޓީތަކެއް އެކުލަވާލުން ހިމެނެއެވެ.

އެހެންނަމަވެސް ބޮޑުވަޒީރުގެ އިސްތިއުފާއާއެކު، އައު ސަރުކާރެއް އެކުލަވާލެވެންދެން ޤާނޫނު ހަދާ މަޖިލީހުގެ ޖަލްސާތައް މިހާރު ވަނީ މެދުކަނޑާލާފައެވެ.

ކުވެއިތުގެ ބޮޑުވަޒީރުގެ މަގާމާއި ޝެއިޚް ސަބާހް ހަވާލުވެވަޑައިގެންނެވީ 2011 ވަނަ އަހަރުގެ ޑިސެމްބަރު މަހު، އޭރު ހުންނެވި ބޮޑުވަޒީރު ނާސިރު މުޙައްމަދު އަލް އަހުމަދު އަލް ސަބާހް އިސްތިއުފާ ދެއްވުމާއި ގުޅިގެންނެވެ. އޭރު ޝެއިޚް ޝަބާހް ހުންނެވީ ބޮޑުވަޒީރުގެ ނައިބުގެ މަގާމުގައެވެ. އޭގެ ފަހުން ޖެހިގެން އައި އަހަރު ބޭއްވި ޤާނޫނު ހަދާ މަޖިލީހުގެ އިންތިޚާބު ކާމިޔާބުކޮށް، ޝެއިޚް ސަބާހް ވަނީ ބޮޑުވަޒީރުގެ މަގާމް ދިފާއު ކުރައްވާފައެވެ.

ފަހުގެ ތާރީޚުގައި ކުވެއިތުގެ ކެބިނެޓްގެ މަގާމްތަކަށް އަވަސް އަވަހަށް، ބޮޑެތި ބަދަލުތަކެއް އައިސްފައިވެއެވެ. އެންމެ ފަހުން ކުވެއިތުގެ ކެބިނެޓަށް ބޮޑު ބަދަލެއް އައިސްފައިވަނީ މިދިޔަ ފެބްރުއަރީ މަހުގެ ތެރޭގައެވެ.