އެމެރިކާގެ ރައީސްކަމަށް ޑޮނަލްޑް ޓްރަމްޕް ވަޑައިގެންނެވި ފަހުން ހެއްދެވި ފުރަތަމަ މެޑިކަލް ޓެސްޓް ހުކުރު ދުވަހު ހައްދަވާފައިވާއިރު، އެމަނިކުފާނު ހުންނެވީ "ވަރަށް ރަނގަޅު ސިއްހަތެއްގައި ކަމަށް" އެ މެޑިކަލް ޓެސްޓުން ހާމަވެއްޖެއެވެ.
މެރީލޭންޑް ސްޓޭޓްގެ ބިތީސްޑާގައި ހުންނަ ވޯލްޓާ ރީޑް ނެޝެނަލް މިލިޓަރީ މެޑިކަލް ސެންޓަރުގައި ތިންގަނޑިއެއްހާ އިރަށް ރައީސް ޓްރަމްޕް، އަސްކަރީ ޑޮކްޓަރުންނާ އެކު މެޑިކަލް ޓެސްޓް ހެއްދެވުމަށްޓަކައި ހޭދަ ކުރެއްވިއިރު، އެ ޓެސްޓާ ބެހޭ ގޮތުން ވައިޓް ހައުސްގެ ޑޮކްޓަރު ރޮނީ ޖެކްސަން ވިދާޅުވީ ޓެސްޓް ދިޔައީ "ވަރަށް ރަނގަޅަށް ކަމަށެވެ."
ޖެކްސަން ވިދާޅުވީ ރައީސް ޓްރަމްޕް ހުންނެވީ ވަރަށް ފުރިހަމަ ސިއްހަތެއްގައި ކަން އެނގިގެން ދިޔަ ކަމަށާއި ރައީސް ޓްރަމްޕްގެ ސިއްހަތާ ގުޅޭ ބައެއް ތަފްސީލީ މައުލޫމާތު އަންގާރަ ދުވަހު ހާމަކުރައްވާނެ ކަމަށެވެ.
ރައީސް ޓްރަމްޕް އެމަނިކުފާނު މެޑިކަލް ޓެސްޓެއް ހެއްދެވިއިރު ރައީސް ޓްރަމްޕްގެ ނަފްސާނީ ދުޅަހެޔޮކަމާ މެދު ބައެއް ފަރާތްތަކުން ވަނީ ސުވާލު އުފައްދަވާފައެވެ. އަދި އެމަނިކުފާނުގެ ސިއްހީ ހާލުކޮޅު މިހާރު ހުރީ ރައީސްކަމުގެ މަގާމަށް އެކަށީގެންނުވާ ހާލަތެއްގައި ކަމަށް ބައެއް ފަރާތްތަކުން ދަނީ ބުނަމުންނެވެ. އެ ފަރާތްތަކުން އެމޭރުމުން ވާހަކަދައްކަމުން ދަނީ ސަރުކާރުގެ ސިޔާސަތުތަކާ މެދު އެކި ފަހަރު އެކި ގޮތްގޮތަށް ރައީސް ޓްރަމްޕް ވާހަކަފުޅުދައްކަވާތީ އާއި ދާދި ފަހުން ރައީސް ޓްރަމްޕް ދެއްކެވި ވާހަކަފުޅެއްގައި އެމަނިކުފާނު އަޅައަޅައިގެން ބައެއް ބަސްތައް ވިދާޅުވުމާ ގުޅިގެންނެވެ.
މިހާތަނަށް އެމެރިކާގެ އެއްވެސް ރައީސަކު އެ ރައީސެއްގެ ނަފްސާނީ ދުޅަހެޔޮކަމާ މެދު ރައީސްކަމުގެ ދައުރުގައި ޓެސްޓެއް ހެއްދެވި ކަމެއް އެނގިފައެއް ނުވެއެވެ.
އެމެރިކާގެ ރައީސް ޑޮނަލްޑް ޓްރަމްޕާ ބެހޭ ގޮތުން ލިޔެފައިވާ ފޮތެއްގައި އެ މަނިކުފާނަކީ "ކުޑަކުއްޖެއް"ގެ ގޮތުގައި އެމަނިކުފާނުގެ މުވައްޒަފުން ވެސް ދެކޭ ކަމަށް ލިޔެފައިވާ ވާހަކައަށް ރައްދު ދެއްވައި، އެ މަނިކުފާނުގެ ނަފްސާނީ ދުޅަހެޔޮކަމާ މެދު ދުވަހަކު ވެސް ސުވާލު ނުއުފައްދަވާ ކަމަށް އެމެރިކާގެ ސެކްރެޓަރީ އޮފް ސްޓޭޓް ރެކްސް ޓިލާސަން ދާދިފަހުން ވަނީ ވިދާޅުވެފައެވެ. "ފަޔަރ އެންޑް ފިޔުރީ: އިންސައިޑް ދި ޓްރަމްޕް ވައިޓް ހައުސް" އަކީ 200 އިންޓަވިއުއެއްގެ މައްޗަށް ބިނާކޮށް މައިކަލް ވުލް ލިޔުއްވާފައިވާ ފޮތެކެވެ. ރައީސް ޓްރަމްޕް ވިދާޅުވެފައި ވަނީ އެ ފޮތަކީ "ދޮގުން ފުރިގެންވާ" ފޮތެއް ކަމަށެވެ.
ދާދިފަހުން ކުރެއްވި ޓްވީޓްތަކެއްގައި ވެސް ރައީސް ޓްރަމްޕް ވަނީ އެމަނިކުފާނުގެ ނަފްސާނީ ދުޅަހެޔޮކަން ދިފާއު ވެސް ކުރައްވާފައެވެ.
