މިނިސްޓްރީ އޮފް ކޮމިއުނިކޭޝަން ސައިންސް އެންޑް ޓެކްނޮލޮޖީގެ ކުރީގެ ސްޓޭޓް މިނިސްޓަރ މުހައްމަދު ޝާފިއީ، އައިޖީއެމްއެޗާއި ބެހޭގޮތުން ދައްކާފައިވަނީ އެއްވެސް އަސާސެއްނެތް ދޮގުވާހަކަތަކެއް ކަމަށް އެ ހޮސްޕިޓަލުން ބުނެފިއެވެ.
ޝާފީ ސްޓޭޓް މިނިސްޓަރުކަމުން އިސްތިއުފާދެއްވީ، ކުރީގެ ރައީސް އަބްދުﷲ ޔާމީންގެ ސަރުކާރުގައި ކޮރަޕްޝަނަށް މަގުފަހިވާ ގޮތަށް އައިޖީއެމްއެޗްއަށް ބޭނުންވާ ސްފޮޓްވެއާ ޕްރޮޖެކްޓެއް މި ސަރުކާރުން ކުރިޔަށް ގެންދާތީވެކަމަށް ވިދާޅުވުމަށްފަހު އެވެ.
ޝާފީގެ އެ ވާހަކަތަކަށް ރައްދުދެއްވާ އެ ހޮސްޕިޓަލުން އާންމުކުރި ބަޔާނެއްގައި ބުނެފައިވަނީ ހޮސްޕިޓަލަށް ހޯދާ، ހޮސްޕިޓަލް މެނޭޖްމެންޓް ސިސްޓަމް ހޯދުމުގެ މަސައްކަތް ކުރިއަށް ގެންދާނީ ދެ ފުށްފެންނަ ހުޅުވާލެވިފައިވާ ބިޑިން ޕްރޮސެސްގެ ތެރެއިން ކަމަށެވެ. އަދި އެއީ ގާނޫނުތަކާއި، ގަވާއިދުތަކާއި އެއްގޮތްވާގޮތުގެ މަތިން ކުރާ މަސައްކަތެއްކަމަށް ހޮސްޕިޓަލުން ބުންޏެވެ.
މަސައްކަތް ކުރިއަށް ދަނީ މިނިސްޓްރީ އޮފް ކޮމިއުނިކޭޝަން ސައިންސް އެންޑް ޓޭކްނޮލޮޖީ އާއި އަދި ކަމާއި ގުޅޭ މުއައްސަސާތަކާއި ގުޅިގެން ކަން ފާހަގަކޮށް އައިޖީއެމްއެޗް ބުނީ ރައީސުލްޖުމުހުރިއްޔާގެ އޮފީހުގެ އިސްފަރާތްތަކާއިއެކު މި މަހުގެ 12 ވަނަ ދުވަހު އަދި ކަމާއި ގުޅުންހުރި މުއައްސަސާތަކާއިއެކު މި މަހުގެ 19 ވަނަ ދުވަހު މަޝްވަރާތައް ކުރިއަށްގެންގޮސްފައިވާކަމަށެވެ. އަދި އޭގެއިތުރުން މިފަދަ ބައްދަލުވުންތަކެއް ބޭއްވުމަށް ތާވަލު ކުރެވިފައިވާ ކަމަށްވެސް އެ ހޮސްޕިޓަލުން ބުނެފައިވެއެވެ.
އައިޖީއެމްއެޗުން ބުނީ ރައްޔިތުނަށް ބޭނުންވާ ސިއްހީ ޚިދުމަތް ފޯރުކޮށްދިނުމަށް ބޭނުންވާ މި ސޮފްޓްވެއާރ ހޯދަނީ އެ ހޮސްޕިޓަލްގެ މެނޭޖްމެންޓާއި ޑޮކްޓަރުންނާއި އަދި ކަމާއި ގުޅުންހުރި ފަރާތްތަކުގެ މަޝްވަރާއާއި އެކު ތައްޔާރު ކުރެވޭ ސްކޯޕްގެ މައްޗައް ބިނާކޮށް ސަރުކާރުގެ ގުޅުންހުރި މުއައްސަސާތަކުގެ މަޝްވަރާއާއި ވެސް އެކުގައި ކަމަށެވެ. މީގެ އިތުރުން ބައިނަލްއަގުވާމީ އެކި ހޮސްޕިޓަލްތަކުގައި ބެނުންކުރާ މިފަދަ ސޮފްޓްވެއާތައް އަޅާކިއުމަށްފަހު ރާއްޖޭގެ މާހައުލަށް އެންމެ އެކަށީގެންވާ ސިސްޓަމެއް ހޯދުމަށް ހޮސްޕިޓަލުން މަސައްކަތް ކުރަމުން ދާ ކަމަށްވެސް ބުނެއެވެ.
