ޚާޝުގްޖީގެ ހަށިގަނޑު ކުދިކުދި ކޮށްލުމުގެ ވާހަކަ ދައްކާފައިވޭ: އދ
20 ޖޫން 2019 | ބުރާސްފަތި 06:43ގުރުބާން ކުރަންޖެހޭ ޖަނަވާރު އައިސްފިތޯ ބިން ސަލްމާންގެ ބޮޑީގާޑަކު އަހާފައިވޭ
ނޫސްވެރިޔާ ޖަމާލް ޚާޝުގްޖީ
ސައުދީގެ ނޫސްވެރިޔާ ޖަމާލް ޚާޝުގްޖީ، އިސްތާންބުލްގައި ހުންނަ ސައުދީ ކޮންސިއުލޭޓްގެ ތެރެއަށް ވަނުމުގެ 13 މިނިޓް ކުރިން، އެތަނުގެ އެ ތެރޭގައި ތިބި ސައުދީ އޮފިޝަލުން، މީހެއްގެ ހަށިގަނޑު ވަކިވަކި ކުރުމުގެ ވާހަކަ ދައްކާފައިވާ ކަމަށް އދ. ގެ ސްޕެޝަލް ރެޕަޓުއަރ ފޯރ އެކްސްޓްރާ ޖުޑީޝަލް ކިލިންގސް އޯރ އަރބިޓްރަރީ އެކްސިކިއުޝަންސް އެގްނިސް ކަލަމަރޑް ތައްޔާރުކޮށްފައިވާ ރިޕޯޓެއްގައި ބުނެފިއެވެ.
ޚާޝުގްޖީގެ މަރާ ގުޅޭ ގޮތުން ކަލަމަރޑް ތައްޔާރު ކޮށްފައިވާ ރިޕޯޓްގައިވާ އޯޑިއޯ ރިކޯޑިންއެއްގައި ވާ ގޮތުން، "ގުރުބާން ކުރަންޖެހޭ ޖަނަވާރު" އައިސްފިތޯ ސައުދީގެ އިންޓެލިޖެންސްގެ ސީނިއަރ އޮފިސަރ އަދި ސަޢޫދީ ޢަރަބިއްޔާގެ ވަލީޢަޙުދު މުޙައްމަދު ބިން ސަލްމާންގެ ބޮޑީގާޑެއް ކަމަށްވާ މާހާ އަބްދުލް އަޒީޒް އަލް މުތްރިބް އަހާފައި ވެއެވެ.
އޭނާ ކުރި ސުވާލަށް ޖަވާބު ދެމުން އެހެން މީހަކު "އޭނާ އައިއްސި" ކަމަށް ބުނާކަން އެ އޯޑިއޯ އިން އިނގެއެވެ.
ޚާޝުގްޖީ ކޮންސިއުލޭޓަށް ހާޒިރުވުމުގެ ކުރިން، މުތްރިބް ވަނީ، ހަށިގަނޑަށް ހަދާނެ ގޮތަކާ މެދު ސައުދީގެ ނަން މަޝްހޫރު ފޮރެންސިކް ޑޮކްޓަރެއް ކަމަށްވާ ސަލާހް މުހައްމަދު ތުބައިގީ ކައިރި ސުވާލު ކޮށްފައެވެ. އޭގެ ޖަވާބުގައި ކަށިތައް ވަކިވަކި ކުރެވިދާނެ ކަމަށާއި ހަށިގަނޑު ބަރު ނަމަވެސް ބިންމަތީގަ ވަކިވަކި ކުރުމަށް ފަހު، ކޮތަޅު ކޮތަޅަށް އަޅާ ބަންދު ކުރާނީ ކަމަށް ތުބައިގީ ބުނެފައިވާ ކަމަށް ކަލަމަރޑްގެ ރިޕޯޓުގައި ވެއެވެ.
ބިން ސަލްމާންގެ ބައިވެރިވުމާ ނުލާ ޚާޝުގްޖީ މަރާލުމުގެ ޖަރީމާ ނުހިންގޭނެ ކަމަށް ވިދާޅުވެ، ކުރިން ވެސް ކަލަމަރޑް ވަނީ ތުހުމަތުކޮށްފައެވެ.
ޚާޝުގްޖީގެ މަރުގެ މައްސަލައާ ގުޅިގެން ވަލީ އަހުދު މުހައްމަދު ބިން ސަލްމާންގެ އިސްތަށިފުޅުގައި ޚާޝުގްޖީ މަރާލަން އަމުރުކުރެއްވި ކަމަށް ތުހުމަތު ކުރެއްވި ކަމުގައިވީ ނަމަވެސް، ސައުދީ ސަރުކާރުން ތަކުރާރުކޮށް ބުނެފައި ވަނީ ޚާޝުގްޖީ މަރާލުމުގައި ވަލީއަހުދުގެ އެއްވެސް އަތެއް ނޯންނާނެ ކަމަށެވެ.
މި ކަމާ ގުޅޭ ގޮތުން، އެމެރިކާގެ ސީއައިއޭ އިން ނިންމާފައި ވަނީ ޚާޝުގްޖީ މަރާލުމުގެ އޯޑަރު ދިން ކަމަށް ބެލެވެނީ ވަލީއަހުދު ކަމަށެވެ. އަދި ސީދާ ވަލީއަހުދުގެ ނަން ގަނެފައި ނުވި ނަމަވެސް، މި ކަމުގައި ސައުދީ ސަރުކާރުގެ އެންމެ "މަތީ ފަންތިން" ބައިވެރިވެފައިވާ ކަމަށް ތުރުކީއިން ވެސް ތުހުމަތުކޮށްފައެވެ.
