ޖަމާލް ޚާޝުގްޖީ:ސައުދީ ވަލީއަހުދާ މެދު ތަހުގީގު ހިންގަން ޖެހޭނެ ކަމަށް އދ. ގެ ފަންނީ މާހިރަކު ބުނެފި
20 ޖޫން 2019 | ބުރާސްފަތި 06:29ޚާޝުގްޖީ މަރާލާފައިވަނީ ސައުދީ ކޮންސިއުލޭޓް ތެރޭގައި
ޚާޝުގްޖީ ދިރިހުއްޓައި އެންމެ ފަހުން ފެނިފައި ވަނި 2018 އޮކްޓޯބަރ 2 ވަނަ ދުވަހު
ޖަމާލް ޚާޝުގްޖީގެ މަރާލުމުގައި ސައުދީ ވަލީއަހުދު މުހައްމަދު ބިން ސަލްމާނާއި މަތީ ފަންތީގެ އިސް މުވައްޒަފުންގެ އަތެއް ވާކަމުގެ ސައްހަ ހެކި ލިބިފައިވާ ކަމަށް އދ. ގެ ފަންނީ މާހިރަކު ވިދާޅުވެއްޖެއެވެ.
ސްޕެޝަލް ރެޕަޓުއަރ އެގްނިސް ކެލަމާޑް ވިދާޅުވީ ހެކިތައް ބާރުއަޅަނީ، މިނިވަން ވަކި ފަރާތަކަށް ނުޖެހޭ ބައިނަލްއަގްވާމީ އިތުރު ތަހުގީގެއް ހިންގުމަށް ކަމަށެވެ.
ޚާޝުގްޖީ މަރާލާފައި ވަނީ އިސްތަންބޫލްގައި ހުންނަ ސައުދީ ކޮންސިއުލޭޓްގެ ތެރޭގައި ސައުދީގެ އޭޖެންޓުންނެވެ.
ސައުދީގެ އިދާރާތަކުންދަނީ އެ މީހުން އެކަން ކޮށްފައި ވަނީ ވަލީއަހުދު މުހައްމަދުގެ އަމުރަށް ނޫން ކަމަށް ތަކުރާރުކޮށް ބުނަމުންނެވެ.
ޚާޝުގްޖީގެ މަރުގެ މައްސަލައިގައި ސައުދީ އަރަބިއާ އިން ގެންދަނީ ކޮން ބައެއް ކަން ނޭނގޭ 11 މީހެއްގެ މައްޗަށް ސިއްރުކޮށް ހިންގާ ޝަރީއަތްތަކެއް ހިންގައި އެ މީހުންނަށް މަރުގެ އަދަބު ދިނުމަށް ކޯޓުގައި ވަކާލާތުކުރަމުންނެވެ.
ކެލަމާޑް ވިދާޅުވީ ހިންގުނު ތަހުގީގު ބައިނަލްއަގްވާމީ އިޖުރާއަތްތަކާއި ކަނޑައެޅިފައި ހުންނަ މިންގަޑުތަކަށް ނުފެތޭތީ އިތުރު ތަހުގީގަކަށް ގޮވާލައްވާ ކަމަށެވެ.
ޚާޝުގްޖީ ދިރިހުއްޓައި އެންމެ ފަހުން ފެނިފައި ވަނީ ސައުދީ ކޮންސިއުލޭޓަށް ލިއުމެއް ބަލާ އޮކްޓޯބަރު މަހުގެ ދެ ވަނަ ދުވަހު ދަނިކޮށެވެ. އޭގެ ފަހުން އޭނާގެ ޚަބަރެއް ވެފައި ނުވާއިރު އޭނާ މަރާލާފައިވާ ކަމަށް ތުރުކީން ބުނަމުންދާތާ އެތައް ދުވަހެއްފަހުން ސައުދީ އިން އެކަމަށް އެއްބަސްވެފައި ވަނީ 2018 ވަނަ އަހަރުގެ އޮކްޓޯބަރު މަހުގެ 20 ވަނަ ދުވަހުއެވެ.
