އޭސީސީގެ ރައީސް ލުތުފީ މަޤާމުން ވަކިކުރަން ހުށައަޅައިފި
19 ޖޫން 2019 | ބުދަ 13:26ލުތުފީ މަޤާމުން ވަކި ކުރަން ހުށައެޅީ ވެލިދޫ ދާއިރާގެ މެމްބަރު ޝަފީޤް
އޭސީސީގެ މެމްބަރުން، ރައްޔިތުންގެ މަޖިލީހުގެ ކޮމެޓީގައި
އެންޓި ކޮރަޕްޝަން ކޮމިޝަން (އޭސީސީ)ގެ ރައީސް ހަސަން ލުތުފީ މަޤާމުން ވަކި ކުރަން ރައްޔިތުންގެ މަޖިލީހުގެ މިނިވަން މުއައްސަސާތަކާ ގުޅޭ ކޮމިޓީއަށް ހުށައަޅައިފިއެވެ.
ބުދަ ދުވަހު އޮތް ކޮމިޓީ ބައްދަލުވުމުގައި ލުތުފީ މަޤާމުން ވަކި ކުރަން ހުށައެޅީ ރައްޔިތުންގެ މަޖިލީހުގެ ވެލިދޫ ދާއިރާގެ މެމްބަރު މުހައްމަދު އަބްދުﷲ ޝަފީޤެވެ. ޝަފީޤުގެ މި ހުށައެޅުއްވުމަށް ގަމު ދާއިރާގެ މެމްބަރު މުހައްމަދު ވިސާމް ވަނީ ތާއީދުކުރައްވާފައެވެ.
އޭސީސީގެ ރައީސް މަޤާމުން ވަކި ކުރުމަށް ހުށައަޅާފައިވާއިރު، ކުރީގެ ރައީސް އަބްދުﷲ ޔާމީންގެ މައްޗަށް ކުރެވޭ ކަރަޕްޝަންގެ މައްސަލަތަކުން އެމަނިކުފާނު ސަލާމަތް ކުރައްވަން މަގުފަހި ކުރެވޭ ގޮތަށް ލުތުފީ އަމަލު ކުރެއްވި ކަމުގެ ތުހުމަތުތައް އޭނާގެ މައްޗަށް ވަނީ ކުރެވިފައެވެ. އެގޮތުން އެމްއެމްޕީއާރުސީގެ ހިޔާނާތުގައި ޔާމީންގެ އެކައުންޓަށް ވަން އެއްމިލިއަން ޑޮލަރުގެ މައްސަލަ ބަލަން އޭސީސީން ހިންގި ތަހުގީގުގައި ވެސް އެއްމިލިއަން ޑޮލަރު ޖަމާކުރި ޔާމީންގެ އެކައުންޓް ފްރީޒްނުކޮށް އެކްސްކްރޯ އެކައުންޓެއް ހުޅުވައި، ފައިސާ ޖަމާކުރުމަށް އެއްބަސްވުމެއް ހެދުމަށް އުޅުއްވިކަމުގެ ތުހުމަތު އޭނާގެ މައްޗަށް ކުރެވެއެވެ.
އޭގެ އިތުރުން، ލުތުފީގެ މަނީ ލޯންޑަރިންގެ މައްސަލައެއް ތަހުގީގު ކުރަމުން އަންނަ ކަމަށް ފުލުހުން ވަނީ ކަށަވަރު ކޮށްދީފައެވެ. އަދި މި އަހަރުގެ ފެބްރުއަރީ މަހުގެ 10 ވަނަ ދުވަހުން ފެށިގެން ލުތުފީ އޮފީހަށް ނުނިކުންނަވާ ކަމަށާއި، މި މުއްދަތުގައި ލުތުފީ ފުރިހަމަ މުސާރަ ވެސް ނަންގަވަމުން ގެންދަވާކަން އޭސީސީގެ މަސްދަރަކުން ޔަޤީން ކޮށްދީފައިވާއިރު، ލުތުފީގެ އެއްވެސް ހަބަރެއް ނުވާކަމަށް އޭސީސީގެ މެމްބަރުންވެސް ވަނީ ކޮމިޓީގައި ބުނެފައެވެ.
