ދުންފަތުގެ ބާވަތްތައް ވިއްކަނީ ޤާނޫނާ އެއްގޮތްތޯ ބަލައި މޮނިޓަރ ކުރަނީ

ދައުލަތުގެ އިދާރާތަކާ ގުޅިގެން ދުންފަތް ވިއްކާ ތަންތަން ޤާނޫނާ އެއްގޮތްތޯ ބަލައި މޮނިޓަރ ކުރަން ނިންމާފައިވާ ކަމަށް ހެލްތު ޕްރޮޓެކްޝަން އެޖެންސީން ބުނެފިއެވެ.

"ނުވަގަޑި މީޑިއާއާ އެކު" ނަމުގައި މިނިސްޓްރީ އޮފް ހެލްތުގެ ސެކްޝަން ތަކުން ކުރިއަށްގެންދާ މަސައްކަތްތަކާ ގުޅޭ ގޮތުން މީޑިއާއަށް މައުލޫމާތު ދެއްވަމުން ހެލްތު ޕްރޮޓެކެޝަން އެޖެންސީގެ ޑެޕިއުޓީ ޑިރެކްޓަރ އަދި ދުންފަތް ކޮންޓްރޯލް ކުރާ ބޯޑުގެ ސްޕޯކްސްޕާރސަން ހަސަން މުހައްމަދު ވިދާޅުވީ، ދައުލަތުގެ އެކި އިދާރާތަކާ ގުޅިގެން ދުންފަތުގެ އިސްތިއުމާލުކުރާ ބާވަތްތައް ވިއްކަމުންދަނީ ޤާނޫނުތަކާއި ޤަވާއިދުތަކާ އެއްގޮތަށްތޯ ބަލައި މޮނިޓަރ ކުރަން ފަށާނެ ކަމަށެވެ. އެގޮތުން ފުލުހުންނާއި، ކަސްޓަމްސްއާއި، މިނިސްޓްރީ އޮފް އިކޮނޮމިކް ޑިވޮލޮޕްމަންޓު ފަދަ މުއައްސަސާތަކާ ގުޅިގެން ވަރަށް އަވަހަށް އެ މަސައްކަތް ފަށާނެ ކަމަށް ހަސަން ވިދާޅުވިއެވެ.

ހަސަން ވިދާޅުވީ، މި ޤަވާއިދުގެ ދަށުން ޖޫރިމަނާކުރާ ފަރާތްތަކުގެ ފައިސާ މީރާއިން ބަލައިގަންނަ ގޮތަށް މިއަހަރު ހަމަޖެއްސުމާ ގުޅިގެން ތަފާތު ފެންނަމުންދާ ކަމަށާއި، ޖޫރިމަނާ ނުދައްކާ ފަރާތްތަކާ މެދު އަޅަންޖެހޭ ފިޔަވަޅުތައް އެޅުމަށް ފަސޭހަވެފައިވާ ކަމަށެވެ. އެގޮތުން އެ ފަރާތްތަކުގެ މައުލޫމާތު މީރާގައި ރެކޯޑުވެފައި އޮތުމަކީ ވިޔަފާރި ކުރާ ފަރާތްތައް ޤާނޫނާއި ޤަވާއިދުތަކަށް ބޯލަނބާކަން ޔަޤީން ކުރުމަށް އޮތް މަގެއް ކަމަށް ވެސް އޭނާ ވިދާޅުވިއެވެ.

ދުންފަތް ކޮންޓްރޯލް ކުރުމުގެ ޤާނޫނުގެ ދަށުން ދެ ޤަވާއިދެއް ހެދިފައިވާއިރު، 31 މެއި 2019 އިން ފެށިގެން ވަނީ ވަކިން ސިނގިރޭޓު ވިއްކުން މަނާކޮށް ދުންފަތާއި ދުންފަތް ހިމެނޭ ބާވަތްތައް ޤަވާއިދާ އެއްގޮތަށް ބަންދުކުރުމަށް އަންގާފައެވެ. އަދި 31 ޖުލައި 2019 އިން ފެށިގެން ދުންފަތުގެ ބާވަތްތައް ވިއްކާއިރު މިނިސްޓްރީން އާންމުކޮށްފައިވާ އިންޒާރުގެ ނޯޓިސް ޖެހުމަށް ލާޒިމުކޮށްފައިވާއިރު، ޤަވާއިދުގައި ބަޔާންކުރާ މިންގަނޑުތަކާ ޚިލާފަށް ސިނގިރޭޓު ވިއްކުން 30 ނޮވެމްބަރު 2019 އިން ފެށިގެން މުޅިން މަނާ ވެގެންދާނެއެވެ.