ފަރުމަސް ބާވަތްތައް ގިނަ، އަގުތައް ދަށަށް!

މަސް މާރުކޭޓުގައި ގިނަ އަދަދެއްގެ ފަރުމަހުގެ ބާވަތްތަކުގެ މިންވަރު އިތުރުވަމުންދާ އިރު ، އަގުތަކަށްވެސް އަންނަނީ ހެޔޮ ބަދަލުތަކެއް އަންނަމުންނެވެ.

ރަމަޟާން މަހުގެ ކުރިއަށް އޮތް ދުވަސްތަކުގައިވެސް ފަރުމަހުގެ އަގުތަކަށް ހެޔޮ ބަދަލުތަކެއް އަންނާނެ ކަމަށް މަސް ވިއްކާ ފަރަތްތަކުންބުނެ އެވެ.

މަސް މާރުކޭޓުގައި މަސް ލިބެން ހުރި އަގުތަކަށް ބަލާ އިރު، ފަސް ކިލޯގެ ރަތް މަހެއްގެ އަގު އުޅެނީ 500ރ. ށެވެ. 3 ކިލޯ ހަމަވާ ފާނާއިގެ އަގު އުޅެނީ 350ރ އަށެވެ. ގިނި މަހުގެ އަގު 40ރ. އިން ފެށިގެން 80ރ. އާ ދެމެދުގެ އަގުތަކެއްގައި ހުރި އިރު ފަނިހަނދި އުޅެނީ 70ރ. އާއި 90ރ އާއި ދެމެދުގެ އަގުތަކެއްގަ އެވެ. މަސް މާރުކޭތުގައި 70ރ. އަށް ލިބެންހުރި ފަނިހަނދީގައި ބައި ކިލޯ ހަމަނުވެ އެވެ.

މާނިޔާ މަހުގެ އަގު 60ރ. އަށް ލިބެން ހުރި އިރު ކަރޭރު މަހުގެ އަގު އުޅެނީ 15ރ. އަށެވެ. ނޫ މަހުގެ އަގު 10ރ. އަށް އުޅޭ އިރު ރިން މަސް 20ރ. އަށް ފަސް މަހުގެ ރޭޓުންވެސް މާރުކޭޓުގައި ލިބެން އެބަހުއްޓެވެ. މީގެ އިތުރުން ރެހި ޖޯޑެއް 15ރ. އަށް ލިބެން ހުރި އިރު ދޮންމަސް ލިބެން ހުރީ 15ރ. އަށެވެ. ބައެއް ފަރާތްތަކުން ދޮން މަސް 25ރ. އަށް ތިން މަހުގެ ރޭޓުން ވެސް ވިއްކަމުންދެ އެވެ.

ކުދި ރާގޮނޑިއެއް 15ރ. އަށް ލިބެން ހުރި އިރު، މާރުކޭޓުގައި ކަނޑު މަސް ކިލޯ އެއްގެ އަގު އުޅެނީ 40ރ. އާއި 45ރ. އަށެވެ.

ރަތް މަހާއި ގިނި މަހުގެ އިތުރަށް ފަނިހަނދިފަދަ ބާވަތްތަކަކީ އާއްމުކޮށް ދިވެހިން ބޭނުން ކުރަމުންދާ ފަރުމަހުގެ ބާވަތްތަކެވެ. އަދި މިފަދަ މަސްތަކަށް ރަމަޟާން މަހުގައި އޮންނަ ޑިމާންޑްވެސް އެހާ ބޮޑެވެ. ރަމަޟާން މަސް ފެށުނު އިރާއި މިހާރާ އަޅާ ބަލާ އިރު މަސް މާރުކޭޓުގައި ފަރުމަސް ލިބެން ހުރި މިންވަރު ވަނީ ވަރަށް ބޮޑުތަން އިތުރުވެފަ އެވެ. އާއްމުގޮތެއްގައި ކަނޑުމަހަށްވުރެ، ފަރުމަހުގެ އަގުތައް ބޮޑު އިރު ރަމަޟާން މަހުގައި ފަރުމަހުގެ އަގުތައް އެތަށް ގުނައެއް އިތުރުވެގެންދެ އެވެ.