ސިޓީގެ އެއްބަސްވުން އާކުރަން ވޯކާ ނިންމައިފި

މެންޗެސްޓާ ސިޓީއާއެކު ހަދާފައިވާ އެއްބަސްވުން އާކުރަން އިނގިރޭސި ރައިޓް ބެކް ކައިލް ވޯކާ ނިންމައިފި ކަމަށް ރިޕޯޓްތައް ބުނެފިއެވެ.

ދަ އިވްނިންގ ސްޓޭންޑާޑުން ބުނީ، ސިޓީއާ އެކު ވޯކާ ހަދާފައިވާ އެއްބަސްވުން ދެ އަހަރަށް އިތުރުކުރަން ނިންމާފައިވާ ކަމަށާއި، އާ އެއްބަސްވުމުގެ ދަށުން އޭނާއަށް ހަފްތާއަކު 180،000 ޕައުންޑު ލިބޭނެ ކަމަށެވެ.

ކުރިޔަށް އޮތް ސީޒަނަށް އަމާޒުކޮށް ގިނަ ކްލަބްތަކުން ހޯދުމަށް މަސައްކަތް ކުރަމުން އަންނަ ވޯކާ ސިޓީއާއެކު ހަދާފައިވާ އެއްބަސްވުން 2022 ވަނަ އަހަރު ހަމަވާއިރު، އާ އެއްބަސްވުމާއެކު 2024 ނިޔަލަށް އޭނާ ކްލަބުގައި މަޑުކުރާނެއެވެ.

ޓޮޓެންހަމް ހޮޓްސްޕާ ދޫކޮށް ވޯކާ ސިޓީއަށް ބަދަލުވީ 2017 ވަނަ އަހަރު 45 މިލިއަން ޕައުންޑުގެ އަގަކަށެވެ. އޭނާ ވަނީ އެ ކްލަބަށް މިހާތަނަށް 100 މެޗު ކުޅެ، ދެ ލަނޑު ކާމިޔާބުކޮށްފައެވެ.

ވޯކާ ވަނީ ސިޓީއާއެކު ޕްރިމިއާ ލީގު ދެފަހަރު، ލީގް ކަޕް ދެފަހަރު، އެފްއޭ ކަޕް އެއްފަހަރު އަދި އެފްއޭ ކޮމިއުނިޓީ ޝިލްޑް އެއްފަހަރު ކާމިޔާބުކޮށްފައެވެ.

ޝެފިލްޑް ޔުނައިޓެޑުން ކެރިޔަރު ފެށި ވޯކާ ޓޮޓެންހަމް އަށް ބަދަލުވީ 2009 ވަނަ އަހަރެވެ. އޭނާ ވަނީ އެ ކްލަބުގައި 8 ސީޒަން ހޭދަކޮށް ކުޅުނު 228 މެޗުގައި ހަތަރު ލަނޑު ކާމިޔާބުކޮށްފައެވެ. އޭނާ ވަނީ ޓޮޓެންހަމްގައި ހުރެ ޝެފިލްޑް ޔުނައިޓެޑް، ކުއީންސް ޕާކް ރޭންޖާސް އަދި އެސްޓަން ވިލާ އަށް ލޯން އެއްބަސްވުމެއްގެ ދަށުންވެސް ކުޅެފައެވެ.

އިންގްލޭންޑް ގައުމީ ޓީމަށް 48 މެޗު ކުޅެފައިވާ ވޯކާ ވަނީ 2011 ވަނަ އަހަރު އޮތް ޔުއެފާ ޔޫރޯގެ ޓީމް އޮފް ދަ ޓޯނަމަންޓްގައިވެސް ހިމެނިފައެވެ. މީގެއިތުރުން އޭނާ ވަނީ ޕީއެފްއޭގެ އެންމެ ޒުވާން ކުޅުންތެރިޔާގެ މަގާމު 2011 ވަނަ އަހަރު ހޯދާފައެވެ.