ސުޕްރީމް ކޯޓްގެ އަމުރާ ގުޅިގެން، މަޖިލީހުގެ ރައީސްގެ ފަރާތުން މަޖިލީހަށް މައްސަލައެއް!
19 ޖޫން 2019 | ބުދަ 05:59ރައްޔިތުންގެ މަޖިލީހުގެ މައްޗަށް ސުޕްރީމް ކޯޓަށް އެ އަމުރު ކަނޑަނޭޅޭނެ ކަމަށް ދެކިވަޑައިގަންނަވާ ކަމަށް ވަނީ ވިދާޅުވެފައި
މަޖިލީހުގެ ރައީސް މުހައްމަދު ނަޝީދު
ސުޕްރީމް ކޯޓްގެ އަމުރާ ގުޅިގެން ރައްޔިތުންގެ މަޖިލީހުގެ ރައީސް މުހައްމަދު ނަޝީދު މަޖިލީހަށް މައްސަލައެއް ހުށަހަޅުއްވައިފިއެވެ.
ރައީސް ނަޝީދު މި މައްސަލަ ހުށަހެޅުއްވީ މަޖިލީހުގެ ރައީސްގެ މޭޒުން ހުށަހަޅާ މައްސަލައެއްގެ ގޮތުގައެވެ.
ރައީސް ނަޝީދު ވިދާޅުވީ ދައުލަތުގެ ތިން ބާރުގެ ތެރެއިން އެއް ބާރަކީ ގާނޫނު ހަދާ މަޖިލިސް ކަމަށާއި، ދައުލަތުގެ ބާރުތައް ފެށިގެން އަންނަނީ ވެސް އަދި ނިމެނީ ވެސް ރައްޔިތުންގެ ކިބައިން ކަމަށެވެ. ރައްޔިތުންގެ މަޖިލީހުގައި ތިއްބެވީ ރައްޔިތުންގެ މަންދޫބުން ކަން ފާހަގަކުރައްވައި ރައީސް ނަޝީދު ވިދާޅުވީ ސުޕްރީމް ކޯޓުން މަޖިލީހުގެ ނިންމުމަކީ ބާތިލް ނިންމުމެއް ކަމަށް ނިންމާފައިވާތީ، އެކަމާ ގުޅިގެން މަޖިލީހުގެ މެމްބަރުންނަށް، އެއްޗެއް ދެންނެވުމަށް އެދިވަޑައިގަންނާވާ ކަމަށެވެ.
ސުޕްރީމް ކޯޓްގެ ފަނޑިޔާރު އަބްދުﷲ ދީދީގެ ސަސްޕެންޝަން މަޑުޖައްސާލުމަށް، އެ ކޯޓުން ނެރުނު އަމުރާ ޚިލާފަށް ދައުލަތުގެ އެއްވެސް މުއައްސަސާއަކުން ނިންމާ ނިންމުމަކީ ބާތިލް ނިންމުމެއް ކަމަށް ބުނެ ސުޕްރީމް ކޯޓުން ވަނީ އަމުރެއް ނެރެފައެވެ. އަދި އެ އަމުރަކީ ޤާނޫނު އަސާސީއާ ޚިލާފް އަމުރެއް ކަމަށް އަންގާރަ ދުވަހު އޮތް މަޖިލީގެ ޖަލްސާގައި ވަނީ ކަނޑައަޅާފައެވެ.
މަޖިލީހުގެ ޖުޑިޝަރީ ކޮމިޓީއަށް ޖޭއެސްސީ ހާޒިރުކޮށް އެއްކުރެވުނު މައުލޫމާތުގެ މައްޗަށް ބިނާކޮށް، އެކުލަވާލި ކޮމިޓީގެ ރިޕޯޓަށް، މަޖިލީހުގެ ތަޅުމުގައި ބަހުސްކުރެވުނު ވަގުތު، ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ވަނީ އިސްލާހެއް ވެސް ހުށަހަޅުއްވާފައެވެ. އެ އިސްލާހުގައި ބުނެފައިވަނީ، ހޯމަ ދުވަހު ސުޕްރީމް ކޯޓުން ނެރުނު އަމުރަކީ ގާނޫނު އަސާސީއާ ޚިލާފު އަމުރެއް ކަމަށް ކޮމިޓީގެ ރިޕޯޓްގައި ހިމެނުމަށެވެ
ހަސަން ލަތީފްގެ މި އިސްލާހަށް މަޖިލީހުގައި ވޯޓަށް އެހުމުން ފާސްކުރަން ފެންނަ ކަމަށް 64 މެމްބަރުން ތާއީދުކުރެއްވިއެވެ.
