ސުޕްރީމު ކޯޓުގެ ފަނޑިޔާރު އަބްދުﷲ ދީދީގެ އަނބިކަނބަލުން ޣަނިޔާ އަބްދުލްޣަފޫރު މަގަމުން ވަކިކޮށްފިއިވާ ކަމަށް ރާއްޖެއެމްވީއަށް އެނގިއްޖެއެވެ.
ކުރީގެ ރައީސް އަބްދުﷲ ޔާމީން އަބްދުލްގައްޔޫމުގެ ވެރިކަމުގައި ޣަނިޔާ އައްޔަންކުރައްވާފައިވަނީ ރާއްޖެއިން މެލޭޝިއާ އަށް ކަނޑައަޅާފައި ހުންނަ ޑެޕިއުޓީ އެމްބެސެޑަރުގެ މަގާމުގައެވެ.
ސުޕްރީމް ކޯޓުގެ ފަނޑިޔާރު އަބްދުﷲ ދީދީގެ އިތުރު ތިން މައްސަލައެއް ބަލަމުންދާ ކަމަށާއި، މިހާރު އެ ކޮމިޝަނުން ބަލަމުން ދަނީ ދީދީގެ ފަސް މައްސަލަ ކަމަށް ޖުޑީޝަލް ސަރވިސް ކޮމިޝަނުން ވަނީ ބުނެފައެވެ. ދީދީއާ ގުޅޭ ދެ މައްސަލައެއް ޖޭއެސްސީ އަށް ހުށައެޅި، އެ މައްސަލަ ތަހުގީގު ކުރުމަށް ހޯމަ ދުވަހުގެރޭ ދީދީ ވަނީ ޖޭއެސްސީ އަށް ހާޒިރުވެވަޑައިގެންފައެވެ.
އެ ދެ މައްސަލައަކީ ވެސް ދީދީއާ ގުޅުން ހުރި ސުލޫކީ މައްސަލަތަކެވެ.
އަންގާރަ ދުވަހު ޖޭއެސްސީން ބޭއްވި ޕްރެސްކޮންފަރެންސްގައި އެ ކޮމިޝަންގެ ޑިރެކްޓަރު މުއުމިނާ އުމަރު ވިދާޅުވީ، އެ ކޮމިޝަނުން މިހާރު ތަހުގީގު ކުރަމުންދާ ދެ މައްސަލައިގެ އިތުރުން އިތުރު ތިން މައްސަލައެއް ހުށައެޅިފައިވާ ކަމަށެވެ.
މުއުމިނާ ވިދާޅުވީ ދީދީގެ ދެ މައްސަލަ އާއްމުކޮށް ހުޅުވާލައިގެން ކުރިޔަށް ގެންދިޔުމަށް ނިންމާފައިވާއިރު، ދީދީ ބޭނުންފުޅުވާ ނަމަ އެ ތިން މައްސަލަ ވެސް ކުރިޔަށް ގެންދާނީ ހުޅުވާލައިގެން ކަމަށެވެ. އެހެން ނަމަވެސް އެއީ ކޮން ތިން މައްސަލައެއް ކަމެއް މުއުމިނާ ވިދާޅެއްނުވެއެވެ. ފަނޑިޔާރު ދީދީގެ މައްސަލަ ބަލަން ޖޭއެސްސީން ވަނީ ކޮމިޓީއެއް އެކުލަވައިލާފައެވެ.
