ތިމާވެއްޓާއި ހަރުކަށި ފިކުރުތަކުގެ ސަބަބުން ރާއްޖޭގެ ސަގާފަތަށް ނުރައްކާވެފައިވޭ: އދގެ ޚާއްސަ ރެޕަޓުއަރ
18 ޖޫން 2019 | އަންގާރަ 13:10ބެނޫންގެ ރިޕޯޓް ތައްޔާރުކުރެއްވުމަށް މައުލޫމާތު އެއްކުރެއްވުމަށް އައްޑޫ ސިޓީ އަށް ވެސް ވަޑައިގެންނެވި
އދ. ގެ ސްޕެޝަލް ރެޕަޓުއަރއަކަށް ބެނޫން އައްޔަން ކުރައްވާފައި ވަނީ 2015 ވަނަ އަހަރު
ތިމާވެެއްޓާއި ހަރުކަށި ފިކުރުތަކުގެ ސަބަބުން ސަގާފަތަށް އޮތް ނުރައްކަލާ ހެދި ދިވެހީންގެ ސިޔާސީ އުންމީދަށް ހުރަސް އެޅޭ ކަމަށް ސަގާފީ ހައްގުތަކާ ބެހޭ އދ. ގެ ޚާއްސަ ރެޕަޓުއަރ، ކަރީމާ ބެނޫން އަންގާރަ ދުވަހު ވިދާޅުވެެއްޖެއެވެ.
ޖޫން މަހުގެ 9 ން 18އަށް ރާއްޖެއަށް ކުރެއްވި ދަތުރުފުޅުގައި އެއްކުރައްވާފައިވާ މައުލޫމާތުގެ އަލީގައި ނެރުއްވާފައިވާ ޕްރިލިމިނަރީ އޮބްޒަވޭޝަންއާ ބެހޭ ގޮތުން އިތުރު މައުލޫމާތުދެއްވުމަށް މާގިރި ހޮޓަލުގައި ބޭއްވި ނޫސްވެރިންގެ ބައްދަލުވުމުގައި ބެނޫން ވިދާޅުވީ ދިވެހިރާއްޖޭގައި ހަރުކަށި ފިކުުރުތަކާއި ފަލްސަފާތައް އަށަގެންނެވުމަށް ކުރެވެމުންދާ ކަންކަމާ ގުޅޭ ގޮތުން ކަންބޮޑުވާވަރުގެ ރިޕޯޓްތައް ވަނީ ލިބިފައިވާ ކަމަށެވެ.
އިންޓަރނެޓްގައި ހަރުކަށި ޚިޔާލު ފާޅުކުުރުން އިތުރުވާއިރު މި ކަންކަން ކުރުމުގައި ބައެއް ފަހަރު ޓީޗަރުން ވެސް ހިމެނޭކަން ފާހަގަކުރެވިފައިވާ ކަމަށް އެ ކަމަނާ ވިދާޅުވިއެވެ.
އަދި ބައެއް ފަރާތްތަކާ ދެކޮޅަށް ބިރުދެއްކުމާއި ފުރައްސަރަކުރުމުގެ އަމަލުތައް ވެސް ހަރުކަށި ފިކުރުތައް ގަބޫލްކުރާ މީހުން ހިންގާފައިވާކަން ވަނީ ފާހަގަކުރެވިފަވާ ކަމަށް ވިދާޅުވިއެވެ.
ދާރުލް އާސާރަށް 2012 ވަނަ އަހަރު ބަޔަކު ވަދެ، އެތަނުގައި ހުރި އާސާރީ ތަރިކައަށް ގެއްލުންދިން ހާދިސާ ފާހަގަކުރައްވައި އެކަމަނާ ވިދާޅުވީ ހަރުކަށި ފިކުރުތަކުގެ ފަލްސަފާތަކުގެ ސަބަބުން ވޭތުވެދިޔަ އަހަރުތަކުގައި ނުރައްކާތެރި ހަމަނުޖެހުންތަކާ ކުރިމަތިލާން ޖެހިފައިވާ ކަމަށެވެ.
ހެރިޓޭޖް މިނިސްޓްރީއެއް އުފައްދަވައި އަދި އެނޫން ވެސް ގޮތްގޮތުން ސަގާފަތް ދިރުވުމަަށް ސަރުކާރުން މަސައްކަތްކުރާކަން ފާހަގަކުރައްވައި އެކަމަނާ ވަނީ ދިވެހިރައްޔިތުންގެ ކިބައިން ފެނުނީ ސަގާފަތް ދިރުވާ އާލާ ކުރުމުގެ ޝައުގުވެރިކަން ކަމަށް ފާހަގަކުރައްވާފައެވެ.
ބެނޫންގެ ރިޕޯޓަށް މައުލޫމާތު އެއްކުރެއްވުމަށް ދައުލަތުގެ ގިނަ ވުޒާރާތަކާއި ސިޔާސީ ފަރާތްތަކާ އެކު ބައްދަވުންތައް ބާއްވާފައިވާއިރު ހޯމް މިނިސްޓްރީ އާއި ނޭޝަނަލް ކައުންޓަރ ޓެރެރިޒަމް ސެންޓަރާ ބައްދަލުކުރުމުގެ ފުރުސަތު ލިބިފައިނުވާކަން އެކަމަނާ ފާހަގަކުރެއްވިއެވެ.
ދިވެހިރާއްޖެއަށް ކުރެެއްވި ދަތުރުފުޅާ ގުޅޭ ގޮތުން ޚާއްސަ ޚާއްސަ ރެޕަޓުއަރ އެކުލަވާލާ ރިޕޯޓާއި އަދި ހުށަހަޅުއްވާ ހުށަހެޅުއްވުންތަކުގެ ތަފްސީލްތައް 2020 ވަނަ އަހަރުގެ މާރޗު މަހު ބާއްވާ އދ. ގެ އިންސާނީ ހައްގުތަކާ ބެހޭ ކައުންސިލްގެ ސެޝަނަށް ހުށަހެޅުމަށް ވަނީ ނިންމާފައެވެ.
އދ. ގެ ސްޕެޝަލް ރެޕަޓުއަރއަކަށް ބެނޫން އައްޔަން ކުރައްވާފައި ވަނީ 2015 ވަނަ އަހަރުއެވެ.
އެ ކަމަނާގެ މި ދަތުރުފުޅަކީ 2013 ވަނަ އަހަރަށް ފަހު އދ. ގެ ޚާއްސަ ރެޕަޓުައަރއަކު ރާއްޖެއަށް ކުރެއްވި ފުރަތަމަ ދަތުރުފުޅެވެ.
