ޤާނޫނު އަސާސީ އުވާލައިގެން ވިޔަސް ޖުޑީޝަރީ އިސްލާހު ކުރާނަން: މެމްބަރު ނިހާދު

ޤާނޫނު އަސާސީ އުވާލައިގެން ވިޔަސް ޖުޑީޝަރީ އިސްލާހުކުރާނެ ކަމަށް ފޭދޫ ދާއިރާގެ މެމްބަރު މުހައްމަދު ނިހާދު ވިދާޅުވެއްޖެއެވެ.

އަންގާރަ ދުވަހު މަޖިލީހުގެ ޖަލްސާގައި ވާހަކަދައްކަވަމުުން ނިހާދު ވިދާޅުވީ، ޤާނޫނުއަސާސީގައި ޖުޑީޝަލް ސާރވިސް ކޮމިޝަން (ޖޭއެސްސީ) އަށް ބޮޑެތި ބާރުތަކެއް ދީފައިވާ ކަމަށާއި، ނަމަވެސް ޖޭއެސްސީ ވަނީ ހިިސޯރުކުރެވިފައި ކަމަށެވެ. އަދި ޖޭއެސްސީ މިނިވަން ވެގެން ނޫނީ މި ޤައުމުގައި އިންސާފުވެރި ޖުޑީޝަރީއެއް ނުއުފެއްދޭނެ ކަމަށް ވެސް އޭނާ ވިދާޅުވިއެވެ. އެގޮތުން އެކަމަށްޓަކައި ޤާނޫނުއަސާސީ އުވާލައިގެން ވިޔަސް ފަނޑިޔާރު ގެއާއި ޖުޑީޝަރީ އިސްލާހު ކުރާނެ ކަމަށް ނިހާދު ވިދާޅުވިއެވެ.

ސުޕްރީމް ކޯޓުގެ ފަނޑިޔާރު އަބްދުﷲ ދީދީ ސަސްޕެންޑްކުރުމަށް ޖޭއެސްސީން ނިންމުމާ ގުޅިގެން، ޖޭއެސްސީގެ ނިންމުމަށް އަމަލުނުކުރުމަށް އަންގާ ސުޕްރީމް ކޯޓުން ނެރުނު އަމުރާ ގުޅިގެން ގިނަ ބައެއްގެ ފާޑުކިއުން ސުޕްރީމް ކޯޓަށް އަމާޒުވެފައިވާއިރު، ގިނަ މެމްބަރުންތަކެއް ވަނީ ކޯޓުތަކުގައި ތިއްބެވި ފަނޑިޔާރުން ބަދަލުކޮށް މުޅި ޖުޑީޝަރީ އިސްލާހު ކުރުމަށް މިއަދުގެ ޖަލްސާގައި ގިނަ މެމްބަރުންތަކެއް ވަނީ ގޮވާލާފައެވެ.

މަޖިލީހުން ޖޭއެސްސީގެ ނިންމުމަށް ތާއީދުކުރުމުން، ހޯމަ ދުވަހު ސުޕްރީމް ކޯޓުން އިތުރު އަމުރެއް ނެރެ، ހުރިހާ މުއައްސަސާއަކުން ވެސް އެ މައްސަލާގައި ނިންމާ ނިންމުންތައް ބާތިލްވާނެ ކަމަށް އަމުރުކޮށްފައި ވެއެވެ. އޭގެ ތެރޭގައި ރައްޔިތުންގެ މަޖިލިހުން ނިންމާ ނިންމުންތައް ވެސް ބާތިލް ވާނެ ކަމަށް އެ ކޯޓުން އަމުރުކޮށްފައި ވެއެވެ. އަދި އެކަމާ ގުޅިގެން އެ ކޮމިޝަން ޖަވާބުދާރީކުރެވޭނީ ރައްޔިތުންގެ މަޖިލީހަށް އެކަނި ކަމަށާއި، ޤާނޫނުއަސާސީގައި ބަޔާންކޮށްފައިވާ ހަމަތަކާއި އުޞޫލުތައް ނެގެހެއްޓުމަށް ދައުލަތުގެ އެންމެ އިސްވެރިޔާގެ ޙައިޘިއްޔަތުން ކުރަންޖެހޭ އެންމެހާ ކަންކަން ފަސްޖެހުމެއް ނެތި ކުރައްވާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ވެސް ވަނީ ވިދާޅުވެފައެވެ.