ބްރޯޑްކާސްޓިންގ ކޮމިޝަންގެ ނައިބް ރައީސް ކަމަށް އެ ކޮމިޝަންގެ މެމްބަރު ފާތިމަތު ޒައިނާ އިންތިހާބުކޮށްފި އެވެ.

ބްރޯޑްކާސްޓިންގ ކޮމިޝަނުން ބުނީ، ޒައިނާ އެ މަގާމަށް އިންތިހާބުވެ ވަޑައިގެންނެވީ ނައިބު ރައީސްގެ މަގާމުގައި ހުންނެވި އިސްމާޢީލް ސޮފްވާން، އެ މަގާމުން 13 ޖޫން 2019 ގައި އިސްތިޢުފާ ދެއްވުމާ ގުޅިގެން، ހުސްވެފައިވާ އެ މަގާމަށް ބޭފުޅަކު ހޮވުމަށް ހޯމަ ދުވަހު ބޭއްވި ބައްދަލުވުމުގައި ބައިވެރިވަޑައިގެންނެވި މެމްބަރުންގެ އިއްތިފާގުން ކަމަށެވެ.

މޯލްޑިވްސް ބްރޯޑްކާސްޓިންގ ކޮމިޝަންގެ މެންބަރަކަށް ފާޠިމަތު ޒައިނާ، ރައީސުލްޖުމްޙޫރިއްޔާ އައްޔަނު ކުރެއްވީ 5 އޭޕްރީލް 2016 ގައެވެ.

ޒައިނާ ބްރޯޑްކޮމްގެ ނައިބް ރައީސްގެ މަގާމަށް އިންތިހާބުވެ ވަޑައިގެންފައިވާއިރު، ކުރިން އެ މަގާމު އަދާކުރައްވަމުން ގެންދެވި ސޮފްވާން މަގާމުން އިސްތިއުފާ ދެއްވާފައިވަނީ ވަޒީފާގެ މަސްއޫލިއްޔަތު އަދާނުކުރައްވާ މުސާރަ ނަންގަވާތާ ހަ މަސް ދުވަހަށް ވުރެ ގިނަ ދުވަސްވެސް ވީ ފަހުންނެވެ. އެ ކޮމިޝަންގެ މެމްބަރު އަންނަ ހަފްތާގައި ބާއްވާ ރައްޔިތުންގެ މަޖިލީހުގެ ކޮމެޓީއަށް ހާޒިރުކުރުމަށް ވަނީ ފާސްކޮށްފަ އެވެ.

ބްރޯޑްކޮމް ކޮމިޓީއަށް ހާޒިރުކުރަނީ ފާއިތުވި 5 އަހަރު ދައުލަތުގެ މީޑިޔާ ސަރުކާރުން ހިސޯރުކޮށްފައި އޮތުމާއި، މިނިވަން މީޑިޔާތަކައް ހިންގުމަށް ކޮމިޝަނުން ހުރަސްއަޅާފައިވާތީ، އެކަމާއި ގުޅޭ ގޮތުން ސުވާލުކުރުމަށެވެ. އަދި އިސްތިއުފާ ދެއްވި ބްރޮޑްކޮމްގެ ކުރީގެ ނައިބް ރައީސް އިސްމާއިލް ސޮފްވާން ވަޒީފާއަށް ނުނިކުމެ މުސާރަ ނެންގެވި މައްސަލަ އާއި ގުޅޭ ގޮތުން ސުވާލު ކުރުން ހިމެނެއެވެ.