ތިން އެކްސިޑެންޓެއްގައި އިހުމާލުވި ފަރާތްތަކާއި މެދު ފިޔަވަޅު އަޅައިފި
އެކްސިޑެންޓްވެ އަންގަން ޖެހޭ ފަރާތްތަކަށް ނޭންގުމުން މީހަކު ޖުރިމަނާކޮށްފައިވޭ
ސައިކަލު އެކްސިޑެންޓެއް ހިނގާފައި
ޖޫން މަހު ހިނގި ބޮޑު ތިން އެކްސިޑެންޓެއްގައި އިހުމާލުވި ތިން ފަރާތާއި މެދު ޓްރާންސްޕޯރޓް މިނިސްޓްރީން ފިޔަވަޅު އަޅައިފިއެވެ.
ފިޔަވަޅު އަޅާފައިވަނީ ޖޫން މަހުގެ 4 ވަނަ ދުވަހު, މާލެ ހުޅުމާލެ ލިންކު ރޯޑްގެ ޑިވައިޑަރ ތަކުގައި ޖެހި ހިނގި އެކްސިޑެންޓެއްގައި ކާރު ދުއްވަން އިން މީހާއަށެވެ. އެމީހާގެ ލައިސަންސް 1 އަހަރު ދުވަހަށް ހިފަހައްޓާފައިވާއިރު، އެކްސިޑެންޓްވެ އަންގަން ޖެހޭ ފަރާތްތަކަށް ނާންގާ ސިއްރުކުރި މައްސަލައާއި ގުޅިގެން ކާރު ދުއްވި މީހާ ޖުރިމަނާ ކޮށްފައިވެއެވެ.
އޭގެއިތުރުން ދެން ފިޔަވަޅު އަޅާފައިވަނީ މި މަހުގެ 7 ވަނަ ދުވަހުގެ ރޭ ބުރިޖުމަތިން ބާރު ސްޕީޑްގައި ދުއްވާފައި ދިޔަ ކާރު ކޮންޓްރޯލް ނުވެގޮސް، މެރިން ރިސާރޗް ސެންޓަރުގެ ފާރުގައި ޖެހި ހިނގި އެކްސިޑެންޓެއްގައި ކާރު ދުއްވި މީހާއަށެވެ. އޭނާގެ ލައިސަންސް 1 އަހަރާއި 6 މަސް ދުވަހަށް ހިފަހައްޓާފައިވާ ކަމަށް މިނިސްޓްރީން ބުނެއެވެ.
އެ ދެ އެކްސިޑެންޓުގެ އިތުރުން މި މަހުގެ 8 ވަނަ ދުވަހު މާލެ ހުޅުމާލެ ލިންކުރޯޑް ރާޑަރ ހިމެނޭ ސަރަހައްދުން ބާރު ސްޕީޑްގައި ދުއްވި ކާރު ކޮންޓްރޯލް ނުވެ، ޑިވައިޑަރ ތަކުގައި ޖެހި އެކްސިޑެންޓްވި މައްސަލައާއި ގުޅިގެން ކާރު ދުއްވި މީހާގެ ލައިސަންސް 1 އަހަރު ދުވަހަށް ހިފަހައްޓާފައި ވެއެވެ.
ފުލުހުން ބުނީ ޓްރާންސްޕޯރޓް މިނިސްޓްރީން މި މައްސަލަ ތަކުގައި ހިމެނޭ ފަރާތްތަކާއި މެދު ފިޔަވަޅު އަޅާފައިވަނީ ފުލުހުންގެ އިދާރާއިން މި އެކްސިޑެންޓް ތަކުގައި ހިމެނޭ މީހުންނާއި މެދު އިދާރީ ފިޔަވަޅު އެޅުމަށް ޓްރާންސްޕޯރޓް އޮތޯރިޓީއަށް ފޮނުވުމުން ކަމަށެވެ.
